Read Kaqchikel Isa 35 Bible Online

Isa 35 - Kaqchikel bible

Isa 35

¹Kan xtikikot k'a ri tz'iran ruwach'ulew, y ri ruwach'ulew ri kan janila chaqi'j kan xtikotz'ijan, y roma ri' janila k'a xtikikot.

²Kan chi'anin xtikotz'ijan achi'el nuben ri lirio. Kan xtikikot k'a y chiri' xtak'axatej-wi bix richin kikoten. Ri Dios kan xtuben janila jebel ok chire achi'el ri juyu' Líbano. Kan janila k'a xtiwachin achi'el ri juyu' Carmelo y ri taq'aj richin Sarón. Konojel xtikitz'et ri ruk'ojlen ri Jehová, y ri runimirinen ri qa-Dios.

³Jare' k'a jun rutzijol chike ri winaqi' ri kimalin kik'u'x, ri janila e kosinaqi' y ri janila nikixibij-ki':

⁴Tikuquba' ik'u'x rix ri janila nixibij-iwi', y man chik tixibij-iwi', roma ri Dios xtipe richin xkixrukol. Rija' xtuya' rutojbalil-mak pa kiwi' ri etzelanel iwichin, achi'el ri ruk'amon.

⁵K'ari' ri e moyi' xketzu'un; ri man ye'ak'ex ta xke'ak'ex;

⁶ri e jetz' kan xketzopiyaj achi'el nuben ri masat; y ri e memurneq kan xkesik'in rik'in kikoten. Ri pa tz'iran ruwach'ulew kan xtibebulbu'x ri ya', y kan xkebiyin raqen taq ya'.

⁷Pa ruk'exel yepa'e' ta pa ruwi' k'aten sanayi', xa xkepa'e' chupan jun choy. Y pa ruk'exel ri ruwach'ulew nutz'u' ta qa ri ya', kan xkek'oje' alaxibel taq ya'. Ri akuchi wakami ek'o-wi ri utiwa', chiri' xtik'oje-wi pa ruk'iyal ri q'os y aj. Y chuqa' chiri' xtik'oje' pa ruk'iyal ri pop.

⁸Y chiri' xtik'oje' jun nimalej bey, y xtubini'aj Bey Kichin ri Winaqi' ri Janila e Ch'ajch'oj. Man jun wineq ri man ch'ajch'oj ta rik'in ri ruk'aslen ri xtiq'ax ta chiri', jak'a kichin ri ch'ajch'oj kik'aslen chuwech ri Dios. Y ri achike xkebe chupan ri bey ri', stape' man nel ta kánima, man xkesach ta.

⁹Chiri' man xkeq'ax ta koj, ni man xke'apon ta k'uxunela' taq chikopi'. Xaxe winaqi' ri e kolotajineq chik ri xkeq'ax chiri'.

¹⁰Ri xketzolin-pe, ja ri winaqi' ri xkerukol-pe ri Jehová. Y rije' rik'in bix xke'ok-apo chupan ri tinamit Sión. Jantape' xkek'oje' rik'in kikoten, y kan xtikil utz k'aslen. Y chuqa' kan xtik'is ri bis y ri oq'ej.