Read Kaqchikel Isa 36 Bible Online

Isa 36 - Kaqchikel bible

Isa 36

¹Chupan k'a ri juna' kajlajuj richin ri q'atbel-tzij richin ri rey Ezequías, jari' toq ri Senaquerib rey richin Asiria xeruchop chi oyowal konojel tinamit ri tz'apen-kij chi tz'aq chiri' pa Judá.

²Y chiri' pa Laquis xuteq-el ri aj-raqen pa kiwi' jun tzobaj aj-labal richin xebe pa Jerusalem, richin xech'on rik'in ri rey Ezequías. Y chiri' pa jotol xek'oje-wi-qa akuchi k'o-wi ri yakbel-ya', ri k'o chunaqaj ri akuchi yeban-wi tzieq.

³Y chupan ri q'ij ri' ri Eliaquim ruk'ajol ri Hilquías ja rija' ri aj-raqen pa ruwi' ri rachoch ri rey, ri Sebná ja rija' ri tz'ibanel, y ri Joah ruk'ajol ri Asaf ja rija' ri nipixaban richin ri rey. Y rije' xe'el-el richin xech'on rik'in ri aj-raqen pa kiwi' ri aj-Asiria.

⁴Jari' toq ri aj-raqen ri' xubij: Tiq'axaj re jun taqikil re' chire ri rey Ezequías. Ri nimalej rey richin Asiria nrajo' nretamaj ri achike banayon chire richin janila rukuquban ruk'u'x.

⁵Ri Ezequías nubij chi k'o ruch'obon y rix k'o iwuchuq'a' richin niben labal, jak'a ronojel re' kan xaxe ok ri ruchi' ri nibin. Y jak'a re wakami, ¿achoq ik'in ikuquban-wi ik'u'x richin niwajo' yixyakatej chuwij?

⁶Rix aj-Judá kan ikuquban-wi ik'u'x kik'in ri winaqi' aj-Egipto, jak'a rije' xa e achi'el jun aj ri maneq ruchuq'a'. Y achike k'a ri xtuto-ri' kik'in, xa kan achi'el jun wineq ri nuto-ri' rik'in ri aj ri'. Xa xtiq'aj y xtok-el pa ruq'a'. Kan keri' nuben ri rey richin Egipto kik'in konojel ri nikikuquba' kik'u'x rik'in.

⁷Rix rik'in juba' nibij chuwe chi xaxe rik'in ri Jehová ikuquban-wi ik'u'x. Jak'a ri Ezequías xa kan xerelesaj yan el ri akuchi niya-wi ruq'ij rija' pa kiwi' taq juyu', y chuqa' ri porobel. Y xubij chiwe chi xtiya' ruq'ij xaxe pa ruwi' ri porobel ri k'o wawe' pa Jerusalem.

⁸Wakami k'a yin xtinya' chiwe 2,000 kiej, wi rix ye'iwil achi'a' richin yech'oke' chikij. Xtiqaben oyowal, y xtiqatz'et achike k'a ri' xkech'akon, rix aj-Judá ó roj aj-Asiria.

⁹Yin kan maneq ok wejqalen chikiwech ri ch'aqa' chik aj-raqen aj-Asiria, jak'a rix kan man xkixtikir ta wik'in, stape' ikuquban ik'u'x kik'in ri aj-Egipto, kik'in ri ki-carruaje y ri kikiej.

¹⁰Y toqaqa chi'ik'u'x chi yin man in peteneq ta nuyon k'a re wawe' richin nonch'aka' re iruwach'ulew. Jak'a ri Jehová ri i-Dios ri xbin-pe chuwe richin xipe, xcha'.

¹¹Ronojel re' ri aj-raqen kichin ri aj-Asiria xubij pa ch'abel hebreo. Jak'a ri Eliaquim, ri Sebná y ri Joah xkibij chire chi tich'on kik'in pa ch'abel arameo, richin man niq'ax ta chikiwech ri kiwinaq ri ek'o pa ruwi' ri tz'aq.

¹²Jak'a rija' xubij chike: ¿In taqon kami pe richin xaxe chiwe rix y chire ri iwajaw nonbij-wi kan re ch'abel re'? Xa kan chike chuqa' re iwinaq ri ek'o pa ruwi' ri tz'aq. Roma kan xtapon ri q'ij richin rije' y rix k'o chi xtitej-qa ri nipamaj, y xtiqum ri ichul.

¹³K'ari' rija' xpa'e-q'anej; kan janila kow xch'on pa ch'abel hebreo y xubij: Tiwak'axaj rix ri ixk'o pa ruwi' ri tz'aq, jare' ri ruch'abel ri nimalej rey richin Asiria.

¹⁴Rija' nubij chi man tiya' q'ij richin ri rey Ezequías yixruq'ol, roma kan man xtitikir ta xkixrukol chupan ri ruk'ayewal.

¹⁵Kan man tinimaj rutzij toq xtubij chiwe richin tikuquba' ik'u'x rik'in ri Jehová. Man tich'ob chi ri i-Dios yixrukol roma ix ruwinaq. Kan qitzij wi ri itinamit kan xtitzaq pa qaq'a'.

¹⁶Man tiwak'axaj ri Ezequías. Más utz tiwak'axaj ri nu-rey, y tijunamatej-iwech rik'in, y kan tijacha-iwi'. Y wi keri' xtiben, chi'ijujunal rix kan xtiqum ri vino ri nel-pe pan itiko'n rix; kan xtiwux ruwech ri iwíkix; y chuqa' kan xtiqum ri iya' chupan ri i-pozo,

¹⁷k'a toq ri nu-rey xtipe richin xkixruk'uaj-el pa jun chik ruwach'ulew ri kan jubama junan rik'in ri iruwach'ulew rix, akuchi niwachin-wi ri jalajoj kiwech ixin richin niben ikaxlan-way, y akuchi niwachin-wi ri uva richin niben i-vino.

¹⁸Man tiya' q'ij richin yixruq'ol ri Ezequías toq nubij chi ri Jehová xkixrukol kan. ¿Ja kami jun chike ri ki-dios kichin ri ch'aqa' chik ruwach'ulew ri xukol pa ruq'a' ri rey richin Asiria?

¹⁹¿Akuchi kami k'o-wi ri ki-dios ri aj-Hamat y ri aj-Arpad? ¿Akuchi kami k'o ri ru-dios ri tinamit Sefarvaim? ¿Xetikir kami xekikol kan ri aj-Samaria pa ruq'a' ri nu-rey?

²⁰¿Achike kami chike konojel re dios re' kichin ronojel ri ruwach'ulew ri' ri xtikir xukol kan ri ruwinaq pa ruq'a' rija'? ¿Y nich'ob kami rix chi ri Jehová xtitikir chuqa' xkixrukol kan?, xcha'.

²¹Jak'a ri winaqi' ri' man xeq'ajan ta, y kan man jun ch'abel xkibij, roma ri Ezequías kan keri' rubin chike chi kan man jun ch'abel tikibij.

²²K'ari' ri Eliaquim, ri Sebná y ri Joah xebe rik'in ri Ezequías, y xkiretz-el ri kitziaq chikij retal richin bis. Y toq xe'apon, k'ari' xbekitzijoj chire ronojel ri xubij kan ri aj-raqen pa kiwi' ri aj-labal aj-Asiria.