Read Kaqchikel Isa 37 Bible Online

Isa 37 - Kaqchikel bible

Isa 37

¹Kere' k'a xbanatej, toq ri rey Ezequías xrak'axaj ri ch'abel ri': Kan xuretz k'a ri rutziaq chirij, y xukusaj tzieq richin bis, y keri' xok-apo pa rachoch ri Jehová.

²Ri Eliaquim ri aj-raqen pa ruwi' ri rachoch ri rey, ri Sebná ri tz'ibanel y ri más e rijita'q taq sacerdote, rije' chuqa' xkikusaj tzieq richin bis. Y ri Ezequías xeruteq-el richin xebe rik'in ri Isaías ri q'alajirisey ruch'abel ri Dios.

³Y kere' xbekibij chire: Jare' k'a ri rutzijol ri xuya-pe ri Ezequías. Re q'ij re', q'ij richin bis, q'ij richin ruk'ayewal y q'ij richin k'ixbilal. Roma ri qawinaq kan maneq chik kuchuq'a', achi'el jun ixoq toq nalex yan ri ti ral, y rija' xa maneq chik ruchuq'a'.

⁴Rik'in juba' ri Jehová ri qa-Dios xrak'axaj ri ch'abel ri xubij ri aj-raqen pa kiwi' ri aj-labal aj-Asiria, richin noruya' ruk'ix ri k'aslik Dios. Y rik'in juba' ri Dios xtuya' rutojbalil pa ruwi' roma ri ch'abel ri'. Wakami kach'on k'a rik'in ri qa-Dios pa qawi' roj y pa kiwi' ri k'a ek'o kan, xecha'.

⁵Toq ri e ya'ol rutzijol xkibij re', ri Isaías

⁶xubij chike: Kere' k'a xtibebij chire ri qa-rey: Ri Jehová nubij chi man tixibij-iwi' roma ri ch'abel ri xiwak'axaj roma ri aj-raqen ri', ri xuben xaxe richin xuqasaj ruq'ij ri Dios.

⁷Rija' kan xtuben chire ri rey aj-Asiria richin nrak'axaj jun itzel rutzijol, xaxe richin titzolej pa ruruwach'ulew. Y toq xtapon chiri', ri Dios xtukamisaj, xcha' ri Isaías.

⁸Toq ri aj-raqen pa kiwi' ri aj-labal aj-Asiria xrak'axaj chi ri ru-rey xel yan el chiri' pa tinamit Libná, rija' chuqa' xel-el chiri' y xutzeqelibej-el k'a pa tinamit Laquis, ri akuchi nikiben-wi oyowal ri ruwinaq.

⁹Jari' toq ri rey richin Asiria xrak'axaj chi ri Tirhaca rey richin Egipto, ri aj-Etiopía xel-pe chiri' richin norubana' oyowal kik'in ri aj-Asiria. Y toq xrak'axaj re ch'abel re', jari' toq xeruteq chik pe ch'aqa' taqonela' rik'in ri Ezequías. Y kere' k'a ri xubij chike ri taqonela' ri':

¹⁰Kere' k'a tibij chire ri Ezequías ri rey richin Judá: Man karuq'ol ri a-Dios ri achoq ik'in akuquban-wi ak'u'x, toq nubij chawe chi ri Jerusalem man xtujech ta pa nuq'a' yin.

¹¹Rat awak'axan ronojel ri xkiben ri ch'aqa' chik rey richin Asiria chike konojel ruwach'ulew ri kan xekik'is jumul, y rat, ¿kan xkatikir kami xtakol-awi' pa nuq'a' yin?

¹²¿Xeto'on kami ri ch'aqa' chik dios, toq ri wati't-numama' xk'is ri kiruwach'ulew? ¿Akuchi k'o-wi ri ki-dios ri tinamit Gozán, ri Harán, ri Résef y ri aj-Bet-edén ri xek'oje' pa tinamit Telasar?

¹³¿Akuchi kami ek'o-wi ri rey richin ri tinamit Hamat, ri rey richin ri tinamit Arpad, ri rey richin ri tinamit Sefarvaim, ri Hená y ri Ivá?, xcha' ri Senaquerib. Re ch'abel re' xtz'ibex-el pa jun wuj richin xuteq-el.

¹⁴Y toq ri Ezequías xuk'ul k'a ri wuj chuwi-kiq'a' ri aj-Asiria y xusik'ij, jari' toq xjote-el pa rachoch ri Jehová y kan xurik' k'a ri wuj ri' chuwech rija'.

¹⁵Y ri Ezequías xch'on rik'in ri Dios y xubij:

¹⁶Jehová k'iytisanel richin ronojel, ri at qa-Dios roj israelita. Rat atk'o pan atz'uyubal richin q'atoj-tzij chikikojol ri querubín. Xaxe k'a rat ri at Dios kichin konojel q'atoy taq tzij richin ri ruwach'ulew. Rat xabanon ri kaj y ri ruwach'ulew.

¹⁷Roma ri' kan jebel k'a taya' axikin rat Jehová, y tawak'axaj. Kan jebel tajaqa' ri runaq' taq awech y tatz'eta'. Tawak'axaj k'a ronojel ri ruch'abel ri Senaquerib, ri rutaqon-pe rubixik richin nuya' ak'ix rat, ri k'aslik Dios.

¹⁸Kan qitzij na wi, Jehová, chi konojel ri rey richin ri Asiria kan xekik'is ri winaqi' ri' y xwulaj kan ri kiruwach'ulew.

¹⁹Y kan xkiya' ri ki-dios richin xekibox pa q'aq', y kan xekik'is konojel, roma re' man e qitzij dios ta. Xa ja ri achi'a' e banayon, e kibanon rik'in che' y abej.

²⁰Re wakami k'a, Jehová Dios ri at qichin roj, kan qojakolo' k'a pa ruq'a' ri Senaquerib, richin chi konojel ri winaqi' richin ri ruwach'ulew xtiketamaj chi kan xaxe rat ri Jehová ri atk'o, xcha'.

²¹K'ari' ri Isaías xuteq rubixik chire ri Ezequías, y xubij chire: Jare' ri rutzijol ri nuya' ri Jehová ri qa-Dios roma xach'on rik'in pa ruwi' ri Senaquerib rey richin Asiria.

²²Ja bix re' ri xubij ri Jehová pa ruwi' rija': Ri tinamit Sión kan xtimulun ruk'u'x chawij rat Senaquerib. Chuqa' ri tinamit Jerusalem kan xtitze'en chawij. Kan xtikiben kipalej chawij rokik rat xkatanimej.

²³¿Achike ta k'a ri xaya' ruk'ix, y kan xaqasaj ruq'ij? ¿Achoq chirij xajeq pan achi', y kan janila xanimirisaj-awi' chuwech? Kan chuwij yin ri in Loq'olej ri ink'o wawe' pan Israel.

²⁴Xe'akusaj ri ataqonela' richin xaqasaj nuq'ij yin, Jehová. Rat xanimirisaj-awi' toq xabij chi rik'in ri janila a-carruaje xajote-el pa ruwi' la juyu', y chuwi' taq juyu' richin Líbano. Xabij chi rat kan ayon xe'aqasaj ri nima'q taq tiox-che', y ri nima'q taq jebelej k'isis. Xabij chi rat kan ayon xatapon-el pa ruwi' ri k'echelaj ri ek'o más nej, y kan xatapon chupan ri jebelej taq k'echelaj.

²⁵Chuqa' xabij chi rat ayon xe'ak'ot pozo, y chiri' xatuk'ya-wi, y rik'in ri pan awaqen, xaben richin ronojel raqen taq ya' ri k'o pan Egipto kan xechaqi'j-qa.

²⁶Jak'a rat kan man awetaman ta chi yin kan ojer yan ri' ri nuch'obon-pe re kere'. Kan k'o yan chik q'ij ri nuch'obon-pe re', y re wakami jare' xk'achoj; roma kan xe'ak'is konojel tinamit ri jebel tz'apen-kij rik'in tz'aq y kan xewuluwu' kan jumul.

²⁷Y ri winaqi' aj chiri' kan man jun xetikir xkiben, janila xkixibij-ki' y xek'ixbitej. Xa xemayamo-qa achi'el ri q'ayis ri k'o pa juyu', achi'el ri q'os rex-rex, chuqa' achi'el ri q'ayis ri yek'iy-pe pa ruwi' ri jay ri xa yek'at, roma ri k'aten kaq'iq' ri nipe kere' pa relebel-q'ij.

²⁸Jak'a yin kan jebel wetaman toq rat yayakatej-el, toq yatok-pe y toq yatel-el. Chuqa' wetaman jebel toq awoyowal chuwe yin.

²⁹Roma xayakatej chuwij, y xanimirisaj-awi', roma ri' re wakami kan xtinya' k'a jun ch'ich' pan atza'n y jun chik ch'ich' pan achi' richin yaruq'et. Rik'in ri' kan xtinben chawe richin yatzolin ri akuchi at peteneq-wi, xcha' ri Dios chire ri Senaquerib.

³⁰Y k'ari' xubij chire ri Ezequías: Re' jare' jun retal chawe rat, ri achike xtibebanatej: Re juna' re' y ri ruka'n apo juna', rix xtitej trigo ri choj keri' nel-pe. Jak'a pa rox juna' yixbetikonej. Jari' toq yixtikir nitik-qa ruwech ri iwulew rik'in uva, y xtitej ri ruwech.

³¹Y ri e rijatzul kan ri Judá kan k'a xkek'ase' na jujun chike rije'. Y rije' kan jebel chik xtijike' ri kixe', y xkewachin achi'el nuben jun che'.

³²Roma ri chiri' pa Jerusalem xtel-pe jun ti tzobaj, y ri pa tinamit Sión xkek'oje' janipe' ri xkekolotej kan. Ja ri nurayibel yin Jehová k'iytisanel richin ronojel ri xtibanon re'.

³³Roma ri' yin Jehová kere' ninbij pa ruwi' ri rey richin Asiria: Rija' man xtok ta chupan re tinamit re'. Man jun ch'ab xtuk'eq-pe. Man xtipe ta ruk'amon ta pe jun tobel, ni man nikimontonij ta el ulew chirij ri tz'aq richin yetikir ye'ok-apo chupan ri tinamit.

³⁴Xa chupan k'a ri bey akuchi peteneq-wi, xa kan chiri' chik xtitzolin-wi. Y kan man xtok ta chupan re tinamit re'. Yin Jehová ri yibin.

³⁵Yin kan xtinto' re tinamit re', y kan xtinkol, roma kan xinjikiba' nutzij, y chuqa' roma ri wajowabal chire ri David ri nusamajel.

³⁶Y chupan ri aq'a' ri', xpe k'a ri ángel richin ri Jehová richin xerukamisaj e 185,000 aj-Asiria ri chiri' akuchi ek'o-wi-qa. Y toq xseqer-pe, konojel e kaminaqi' chik.

³⁷K'ari' ri Senaquerib rey richin Asiria xbe k'a, y xtzolin pa tinamit Nínive. Y chiri' xk'oje-wi kan.

³⁸Y kere' k'a xbanatej: Rokik ri rey nuya' ruq'ij ri ru-dios rubini'an Nisroc, chiri' chupan ri rachoch ri dios ri', jari' toq ri e ruk'ajol kibini'an Adramélec, y ri Sarézer xkikamisaj kan chi espada. Chirij re' rije' xe'animej-el, y xebe pa ruwach'ulew Ararat. Y ri xq'aton kan tzij pa ruk'exel ja ri Esarhadón, jun chik chike ri ruk'ajol.