Read Kaqchikel Isa 38 Bible Online

Isa 38 - Kaqchikel bible

Isa 38

¹Chupan ri q'ij ri', ri Ezequías xuk'uluwachij jun nimalej yabil, y kan richin kamik. K'ari' ri Isaías ri q'alajirisey ruch'abel ri Dios xbe rik'in y xubij chire: Ri Jehová nubij chi tachojmirisaj kan ronojel ri abeyomel, roma rat kan man xkak'achoj ta chik chire ri yabil. Xa kan xkabeken, xcha' ri Isaías.

²Toq ri Ezequías kotz'ol chik, kan xtzu'un-apo ri chuwa-xan, y xch'on rik'in ri Jehová,

³y xubij: Jehová, nink'utuj utzil chawe re wakami chi yinoqaqa ta chi'ak'u'x chi yin kan choj ri nuk'aslen ri nubanon-pe chawech, y rik'in ronojel wánima nubanon ronojel ri niqa' chawech rat, xcha'. K'ari' xuchop janila oq'ej.

⁴K'ari' ri Jehová xch'on chik rik'in ri Isaías y xuya' jun rutzijol richin nubij chire

⁵ri Ezequías. Y jare' k'a ri rutzijol: Yin in Jehová ri xya'ox nuq'ij roma ri David ri amama'. Kan xinwak'axaj ri ach'owen, y kan xintz'et ri ruya'al runaq'-awech. Wakami k'a kan xtinsipaj chik wolajuj juna' ak'aslen.

⁶Yin xkatinkol rat y chuqa' re tinamit re' pa ruq'a' ri rey richin Asiria, xcha' ri Jehová. K'ari' ri Isaías xubij chire ri rey chi tuya' juba' wíkix ke'en chuwech ri ch'a'k richin xtik'achoj. Y ri Ezequías xuk'utuj chire ri Isaías ri achike retal xtuk'ul, richin chi rija' xtik'achoj-el richin nitikir nibe chik el pa rachoch ri Jehová.*f8*

⁷Y ri Isaías xubij: Ja retal re' ri nuya' ri Dios chawe richin niq'alajin chi kan xtuben awik'in ri nubij.

⁸Rija' kan xtuben chi ri muj ri k'o chupan ri ru-reloj ri Acaz kan xtitzolin k'a lajuj grada, xcha'.*f9* Y keri' k'a ri q'ij xtzolin chirij lajuj grada ri kan ik'owineq chik.

⁹Toq ri rey Ezequías xk'achoj chire ri yabil ri chapayon-qa richin, jari' toq xuben re jun bix re':

¹⁰Yin xinch'ob chi pa nik'aj chire re nuk'aslen xkibe chupan ri jul richin muqbel, y ri kamik kan jubama xreleq'aj ri nik'aj nuk'aslen.

¹¹Chuqa' xinch'ob chi kan man xtintz'et ta chik awech rat Jehová chupan ri awachoch, ni man jun chik wineq ri k'o chuwech re ruwach'ulew.

¹²Chi kan xtelesex k'a el nuk'aslen, achi'el niban rik'in ri ti rachoch ri yuq'unel, toq nikik'uq-el ri che' y nikibot-el ri tzieq. Ri nuk'aslen jubama xtzak'ix-el, achi'el niban chire tzieq ri nikem. Q'ij-q'ij xk'is-qa ri wuchuq'a' richin ta xiken.

¹³Ri chi'aq'a' kan xisik'in roma rukiy ri yabil. Yin xinna' achi'el xa ta jun koj nupaq'aq'ej ri nubaqil. Q'ij q'ij xk'is-qa ri wuchuq'a' richin ta xiken.

¹⁴Xinben achi'el yech'ipch'ot ri taq tz'unun, xijilon achi'el yejilon ri taq paloma. Ri runaq' taq nuwech kan janila xekos rokik xaxe xitzu'un-el chila' chikaj. Yin kan xink'utuj utzil chawe rat Jehová chi xinato' ta, roma xik'oje' pa q'axo'n.

¹⁵¿Achike ta k'a yitikir ninbij yin? Roma ja rat xaya' q'ij chi xiruchop ri yabil ri'. Wakami k'a chijun ri nuk'aslen kan ninqasaj-wi' chawech rat, roma ri nimalej bis ri xk'oje' pa wánima.

¹⁶Ri yebiyin ri kan achi'el nubij ri ach'abel kan xkek'ase'. Y chikikojol rije' xkik'ase' yin. Rat xaya' ri nuraxnaqil, y kan xaya' chik jun bey ri nuk'aslen.

¹⁷Xintej poqon richin yik'ase' pa ruchojmilal. Rat kan yinawajo', y roma ri' xaya' chik nuk'aslen. Roma ri awajowabal xakuy ronojel ri numak.

¹⁸Jak'a ri ek'o chupan ri jul richin muqbel man yetikir ta nikiya' aq'ij, y ri kaminaqi' man yetikir ta nikoyobej ri awutzil ri man nik'is ta.

¹⁹Xaxe k'a ri k'o kik'aslen yetikir nikiya' aq'ij, achi'el ninben yin re wakami. Y jun sol winaqi' nikitzijoj chike jun sol chik winaqi' ri awajowabal ri man nik'is ta.

²⁰Rat Jehová kan xinakol, y roma ri' xtinq'ojomaj ri arpa, y xkibixan ronojel q'ij chire ri nuk'aslen chupan ri awachoch, xcha'.