Read Kaqchikel Isa 39 Bible Online

Isa 39 - Kaqchikel bible

Isa 39

¹Chupan k'a ri q'ij ri' ri Merodac-baladán ruk'ajol ri Baladán, rey richin Babilonia, xeruteq-el wuj y jun sipanik chire ri Ezequías, roma ri rey ri' xretamaj chi ri Ezequías janila xyawej y kan xk'achoj-el.

²Ri Ezequías kan janila xkikot, y roma ri' kan xuk'ut ronojel rubeyomel chikiwech ri taqonela' ri': Ri saqipueq, ri q'anapueq, ri jubulej taq aq'om, ri jubulej taq aceite, ri jay akuchi e yakon-wi ri rukamisabal y ronojel ri ek'o chupan ri ruyakonabal. Kan man jun k'a ri man ta xuk'ut-el chikiwech.

³K'ari' ri Isaías xbe rik'in ri Ezequías, y xuk'utuj chire ri achike xkibij ri achi'a' ri', y akuchi e peteneq-wi. Y ri Ezequías xubij chi rije' janila nej e peteneq-wi, y chi rije' e aj-Babilonia.

⁴Jari' toq ri Isaías xuk'utuj chire ri achike xkitz'et kan pa rachoch. Y ri Ezequías xubij chi ronojel ri k'o pa rachoch xuk'ut-el chikiwech, y man jun ri man ta xkitz'et kan.

⁵K'ari' ri Isaías xubij: Tawak'axaj ri xubij-pe ri Jehová k'iytisanel richin ronojel.

⁶Xkepe k'a q'ij chi ronojel ri k'o chupan ri awachoch, ri kan kimontonin-pe ri ánima awati't-amama' k'a re wakami, kan xtuk'uex k'a el pa Babilonia, y kan man jun chik xtik'oje' kan. Ri Jehová kan rubin-wi.

⁷Y pa ruwi' ri, jujun chike ri awijatzul xke'uk'uex-el pa Babilonia, y kan xke'ok eunuco chiri' richin xtikilij ri rey, xcha'.

⁸Y toq xrak'axaj re', ri Ezequías kan xuch'ob-qa chi xa rik'in ta k'o uxlanibel-k'u'x rokik rija' k'es. Y roma ri' xubij chire ri Isaías chi ri ruch'abel ri Jehová kan janila utz.