Read Kaqchikel Isa 4 Bible Online

Isa 4 - Kaqchikel bible

Isa 4

¹Chupan k'a ri q'ij ri', wuqu' ixoqi' xtikiben oyowal chirij jun achin, y xtikibij chire: Roj xtiqilij-qi' qayon, katok qachijil, xaxe richin nel ri k'ix ri k'o pa qawi', roma man oj k'ulan ta, xkecha', nicha' ri Jehová.

²Chirij re' xtapon k'a jun q'ij toq ri Jehová xtuben chik chire ri ruwach'ulew Israel kan janila jebel y kan xtibeya'ox janila rejqalen. Y ri winaqi' ri xkek'oje' kan chiri' kan xtinimirisex kiq'ij roma ri tiko'n ri xtibewachin chuwech ri kiruwach'ulew.

³Ri winaqi' ri xkek'oje' kan pa tinamit Sión kan e ch'aron roma ri Dios.

⁴Jak'a pa nabey rija' kan xtuq'et-tzij rik'in q'aq'. Y keri' xtuch'ej ri kimak ri ixoqi' aj-Sión, y nuch'ajch'ojirisaj ri kik' ri biyineq chiri' pa taq bey.

⁵K'ari' ri paq'ij ri Jehová xtuya' pa kiwi' konojel winaqi' ri kimolon-ki' ri chiri' pa juyu' Sión, jun sutz' ri achi'el sib. Y ri chaq'a' xtuya' jun saqil rik'in ruxaq q'aq'. Re k'ojlemal re' xtik'atzin richin kitobal ri winaqi' ri ek'o chiri'.

⁶Re' kan xtik'atzin k'a chike richin kimujal chuwech ri q'ij y richin nikito-ki' chuwech ri job y ri koqolajay.