Read Kaqchikel Isa 40 Bible Online

Isa 40 - Kaqchikel bible

Isa 40

¹Ri Dios xuya' jun rutzijol chire ri Isaías, y xubij: Takuquba' kik'u'x ri awinaq ri e nutinamit.

²Kach'on kik'in ri aj-Jerusalem, y katzijon kik'in rik'in ajowabel. Taya' rutzijol chike chi ri ximonri'il ri ek'o-wi, kan xtik'is, y ri kimak xa xinkuy yan. Kan k'iy yan bey xkik'ul ri rutojbalil ri kimak.

³K'o k'a jun q'ij k'o jun ri xtipe, y kan janila kow xtich'on y xtubij: Tachojmirisaj k'a jun bey chupan ri tz'iran ruwach'ulew richin ri Jehová. Tabana' jun choj laj bey richin ri qa-Dios.

⁴Ronojel ri ek'o pa jotol, k'o chi xketaq'ajux, y ronojel ri ek'o pa xulan, k'o chi xkenojisex. Ri xotoxeq kan xkeban taq'aj chike. Ronojel k'a xtitaq'ajux.

⁵K'ari' k'a ri Jehová xtuk'ut ri ruruwaq'ijaj, y kan konojel winaqi' xtikitz'et junan, xticha'. Keri' xubij ri Jehová.

⁶K'o k'a jun chik ri xbin chuwe chi kisik'in. Jak'a yin xinbij chire ri achike ninsik'ij, y xubij chuwe chi tinbij chi konojel ri winaqi' man richin ta q'asen yek'oje' re wawe', chi ri winaqi' xa e achi'el ri q'ayis. Y ri kiruwaq'ijaj man niyaloj ta, xa kan e achi'el ok ri kotz'i'j ri ek'o pa juyu'.

⁷Roma ri q'ayis xa nichaqi'j-qa, y ri kotz'i'j xa nimayamo-qa. Toq ri Jehová yeruxupuj, xa yemayamo-qa. Y keri' chuqa' nikik'uluwachij ri winaqi'.

⁸Ri q'ayis xa nichaqi'j-qa, y ri kotz'i'j xa nimayamo-qa. Jak'a ri ruch'abel ri qa-Dios kan richin tibe-q'ij tibe-seq.

⁹Rat ri ak'amon-pe utzilej rutzijol chike ri aj-Sión, kajote' k'a el pa ruwi' jun nimalej juyu'. Rat ri ak'amon-pe utzilej rutzijol chire ri tinamit Jerusalem, kan kasik'in rik'in uchuq'a'. Man taxibij-awi' richin yasik'in kow. Tabij chike ri aj-Judá chi re wawe' k'o-wi ri qa-Dios.

¹⁰Kan xtoqaqa k'a ri Jehová k'iytisanel richin ronojel, y kan qonojel k'a xqojk'oje' chuxe' ri ruq'atbal-tzij rija'. Kan k'o k'a sipanik ri xtuk'en-pe. Y xtipe richin noruya' ri utzilej rajel ruk'exel.

¹¹Rija' kan xqojruchajij roj ri oj rutinamit, achi'el jun yuq'unel ri kan yeruchajij ri rawej. Xqojruq'etej pa ruq'a', achi'el jun yuq'unel nuq'etej ri ti karne'l. Xqojruch'elej-el chuwa-ruk'u'x, achi'el nuben jun yuq'unel kik'in ri chikopi'. Y kan eqal xqojruk'uaj, achi'el nuben jun yuq'unel kik'in ri karne'l ri k'a juba' ke'alex taq kal.

¹²Man jun ri rik'in ta ri ruq'a' nitikir nretaj ronojel ri ya'. Chuqa' man jun k'o ta ri más nim ri ruq'a' richin nretaj ta ri kaj. Man jun ri nitikir ta numol ronojel ri poqolaj ri k'o chuwach'ulew pa jun ti k'ojelibel. Y chuqa' man jun ri nitikir ta, chi pa jun etabel, nretaj ri ko'ol y ri nima'q taq juyu'.

¹³Man jun ri xk'utu ta chuwech ri Dios ri k'o chi nuben. Ni man jun ri nitikir ta nipixaban richin.

¹⁴Ri Jehová man jun achoq chire xuk'utuj-wi. Y man jun xk'utu chuwech ri utzilej bey, ni man jun xk'utu etamabel chuwech, ni man jun xk'utu akuchi k'o-wi ri na'oj.

¹⁵Chuwech ri Jehová, roj ri tzobaj winaqi' richin ri ruwach'ulew man jun qejqalen; roj xa kan oj achi'el ok jun ti tz'uj ya' ri nitzaq kan pa jun nim k'ojelibel. Chuqa' xa kan oj achi'el ok ri poqolaj ri k'o chupan jun etabel. Ri Jehová yerutz'et ri taq ruwach'ulew ri ek'o pa ya' achi'el ri sanayi'.

¹⁶Stape' xketorix ronojel che' ri ek'o pa juyu' Líbano richin niban si' chike, richin nik'atzin chire jun porobel, rija' kan man xtikuqer ta ruk'u'x rik'in ri'. Stape' xkekamisex konojel chikopi' richin jun kamelabel, rija' man xtik'atzin ta chire ri' richin nik'o-qa ri royowal.

¹⁷Konojel k'a ri tzobaj winaqi' richin ri ruwach'ulew, chuwech rija' xa man jun kejqalen, y xa achi'el man e winaqi' ta.

¹⁸Ri Dios man jun achoq ik'in nijunamex-wi, ni man nijunamex ta rik'in jun wachibel.

¹⁹Roma jun relik wachibel xa jun wineq banayon richin. Ri wineq nuya'erisaj pa q'aq', y k'ari' nuya' q'anapueq chirij, y kan nuwiq rik'in cadena ri banon rik'in saqipueq.

²⁰Jak'a wi ri wineq maneq k'iy ruméro, nucha' jun che' ri man nichikopir ta, y kan nukanoj jun achin ri kan retaman jebel richin nuben ri wachibel, richin kan nuben utz chire, y kan man nisilon ta.

²¹¿Man iwetaman ta k'a achike xtz'ukun ri ruwach'ulew? ¿Man iwak'axan ta kami rix? ¿Man tzijon ta chiwe ri rutikeribel? ¿Kan man q'axineq ta k'a chiwech achike xtz'ukun-q'anej?

²²Ja rija' k'a ri tz'uyul chupan ri rutz'uyubal richin q'atoj-tzij, chila' chikaj. Chuwech rija' konojel winaqi' xa kan e achi'el ok ri sak'. Y rija' kan xurik' k'a ri kaj, achi'el toq nirik' jun nimalej tzieq, achi'el jun tzieq richin jun jay richin yek'oje' chupan.

²³Rija' kan nuben chike ri e tata'al chi man jun kejqalen y nuben chike ri e q'atoy taq tzij chi choj e q'axel.

²⁴Roma rije' xa man yeyaloj ta el, achi'el k'a ri tiko'n ri k'ari' yetik-qa, y k'ari' nuk'en-qa ri kixe'. Jak'a ri Dios xa nuxupuj chik el, y xa yechaqi'j-qa, y kan yeruk'uaj-el kaq'iq' achi'el nuben chire ri solot.

²⁵Ri Dios nubij: ¿Achoq ik'in k'a xkinijunamaj-wi? ¿Achoq ik'in kami in junan yin ri Loq'olej richin Israel?, xcha'.

²⁶Kan kixtzu'un-el chikaj richin nitz'et jebel achike banayon ronojel re'. Ri Jehová kan yerajlaj ri ch'umila', y kan e ruya'on kibi'. Roma ri nimalej ruq'ij y ri nimalej ruchuq'a', rija' kan nuben chi man jun nisach pa kik'ojelibal.

²⁷¿Achike k'a roma nibij rix nuwinaq chi ri Jehová kan man yixrutz'et ta pe, y chi ri Dios kan man yixrumey ta pe?

²⁸¿Chij man iwetaman ta k'a rix achike xtz'ukun ri ruwach'ulew? ¿Man iwak'axan ta kami rix? Ri Jehová Dios jari' ri richin q'asen. Ja rija' ri xbanon chijun ri ruwach'ulew. Rija' kan man nikos ta, y ri runojibal kan man jun achoq chuwech niq'ax-wi.

²⁹Rija' nuya' chik ruchuq'a' ri wineq ri janila kosineq, y nuya' ruchuq'a' ri wineq ri maneq ruchuq'a'.

³⁰Stape' k'a e alaboni' na, jak'a xa yekos, y roma ri' nikipajk'ij kaqen y yetzaq.

³¹Jak'a ri kikuquban kik'u'x rik'in ri Jehová kan xtikik'ul k'ak'a' uchuq'a', achi'el uchuq'a' ri k'o kik'in ri kot toq anineq yebe chikaj. Kan xke'anin y man xkekos ta. Kan xkebiyin janila y kan man xtik'is ta ri kuchuq'a'.