Read Kaqchikel Isa 41 Bible Online

Isa 41 - Kaqchikel bible

Isa 41

¹Ri Jehová nubij: Kiniwak'axaj k'a rix winaqi' ri ixk'o pa taq'aj ruwach'ulew. Rix tzobaj winaqi' richin ri ruwach'ulew tik'oje' iwuchuq'a'. Kixanpe richin yojch'on pa ruwi' re'. Kixjel-pe richin junan xtiqaq'et-tzij.

²¿Achike kami xbanon richin xbek'ulun-pe jun rey chiri' pa relebel-q'ij? ¿Achike kami xya'on ri ajawaren pa ruq'a'? ¿Achike kami xejachon-el ri tzobaj winaqi' richin ri ruwach'ulew pa ruq'a'? Y ¿Achike kami xq'aton kichin ri ch'aqa' chik rey? Ri rey ri xtipe kere' pa relebel-q'ij, xkerukamisaj ri winaqi' chi espada, y rije' xke'ok poqolaj. Chuqa' xkerukamisaj rik'in ri rute-ruch'ab, y ri rupoqolajul ri kich'akul ri winaqi' ri' xtuk'uex-el roma kaq'iq', achi'el nuben ri solot.

³Ri rey ri' xkerutzeqelibej ri e etzelanel richin, y k'ari' choj xtibe chupan ri rubey, y kan man jun xtuk'uluwachij. K'ari' rija' xtutzeqelibej jun bey akuchi man jun bey q'axineq-wi.

⁴¿Achike ta k'a banayon ronojel re'? ¿Achike ta k'a ri kan pa rutikeribel xuben ronojel re? Ja yin Jehová, ri xik'oje-pe ojer, y ri xkik'oje' ri chiwech apo.

⁵Konojel winaqi' ri ek'o pa taq'aj ruwach'ulew kan xkitz'et ronojel ri wululen, y roma ri' kan janila kixibin-ki'. Konojel ri ch'aqa' chik winaqi' kan kixibin-ki', roma ri e etzelanel kichin xkimol-ki' y kan yenaqajub yan pe.

⁶Chikijujunal ri yebanon wachibel yekito' ri ch'aqa' chik winaqi'. Y nikikuquba' kik'u'x chi kachibil-ki'.

⁷Ri ajanel kan nuto' ri nisamej rik'in q'anapueq, y rije' nikito' ri nisamej rik'in bajibel. Y konojel rije' nikibij chi janila utz ri kisamaj ri xkiben. K'ari' rije' xtikibajij ri wachibel richin kow xtik'oje' kan.

⁸Jak'a rix israelita ix nusamajela' yin. Rix ix rijatzul kan ri Jacob ri kan xincha'. Rix ix rijatzul kan ri Abraham ri xok wachibil.

⁹Kan k'a janila nej xenk'en-pe ri iwati't-imama', y xencha' rije' richin xe'ok nusamajela'. Y re wakami kan man xkixinmalij ta kan rix.

¹⁰Roma ri' man tixibij-iwi' roma yin kan ink'o iwik'in. Man timalij ik'u'x, roma ja yin ri in i-Dios. Kan xtinya' iwuchuq'a'; y chuqa' kan xkixinto'. Chuqa' kan xtinya' ri nimalej nuq'a' pan iwi'.

¹¹Konojel k'a ri winaqi' ri ye'etzelan iwichin kan xkek'ixbitej, y kan janila xtiqasex kiq'ij. Chuqa' konojel ri yebanon oyowal iwik'in, kan xkek'is jumul.

¹²Stape' rix xke'ikanoj ri e etzelanel iwichin, kan man xke'iwil ta chik. Konojel ri yebanon labal iwik'in, kan man xkeq'alajin ta chik, y achi'el xa ta man jun bey xek'oje'.

¹³Ronojel re' xtibanatej roma ja yin Jehová ri in i-Dios, y yin xtinchop kow ri iq'a' richin man xkixtzaq ta, y ninbij chiwe chi man tixibij-iwi', roma yin xkixinto'.

¹⁴Man tixibij-iwi' rix ri ix rijatzul kan ri Jacob, stape' rix nina-iwi' chi man jun iwejqalen. Man timalij-qa ik'u'x, stape' kan ix juba' ok y kan maneq iwuchuq'a', roma ja yin ri xkixinto'. Yin ri in Loq'olej, ri ink'o pan iwi' kan xkixinkol.

¹⁵Kan xtinben chi xtik'oje' iwuchuq'a', achi'el jun tz'alem ch'ayibel trigo ri ya'on clavo chirij. Kan xke'ik'is ri e etzelanel iwichin, achi'el xa ta niq'ax re jun ch'ayibel trigo re' pa ruwi' ri juyu'. Y rix kan xtiben poqolaj chike, achi'el toq nuk'uaj kaq'iq' ri solot.

¹⁶Kan xke'italuj-el ri e etzelanel iwichin, achi'el toq nijopij chikaj ri trigo, y kan ja ri kaq'iq' ri xtitalun-el ri q'ayis. Jak'a rix kan jantape' xkixkikot wik'in yin Jehová; y xtik'oje' ri ruwa-iq'ij wik'in yin ri in Loq'olej richin Israel.

¹⁷Ri iwinaq ri man jun k'o kik'in nikikanoj kiya', jak'a man nikil ta. Ri kaq' kan xchaqi'j roma chaqi'j-kichi'. Jak'a yin Jehová kan xtink'uluba-pe ri kich'abel. Chuqa' yin ri in i-Dios kan man xkixinmalij ta kan.

¹⁸Pa ruwi' taq juyu' ri man yewachin ta, kan xtinben richin xkebebiyin raqen taq ya'. Chuqa' nibe'alex-pe ya' pa runik'ajal ri taq'aj. Kan xtinben richin chiri' pa tz'iran ruwach'ulew xtik'oje' nima'q taq choy. Y chupan ri ruwach'ulew chaqi'j, kan xkek'oje' alaxibel taq ya'.

¹⁹Kan xtinben richin xkek'oje' che' ri pa tz'iran ruwach'ulew; ri tiox-che', ri che' achi'el uk'a', ri q'echa' y ri olivo. Chuqa' xtinya' chiri' ri akuchi man jun niwachin, jalajoj kiwech chej.

²⁰Xtinben ronojel re' richin chi nitz'et, y niwetamaj chi ja yin Jehová ri in banayon ronojel re', chi ja yin ri in loq'olej ri ink'o pan Israel k'iytisayon ronojel re'.

²¹Ri Jehová nich'on kik'in ri winaqi' ri yetzeqeliben kichin ri dios ri man e qitzij ta, y nubij chike: Yin in Jehová, in ki-rey ri israelita. Kan tibij k'a pe ronojel richin yixsujun.

²²Kan tik'ama-pe ri ruwachibel ri i-dios, y tikiya' rutzijol chiqe ri achike xtiqak'uluwachij. Kan tikiq'alajirisaj k'a chiqawech ri xbanatej-pe k'a pa rutikeribel, y roj kan xtiqaya' qaxikin chike, richin xtiqetamaj ri ruk'isibel.

²³Tikibij k'a chiqe ri achike xtipe chiqawech, richin chi niqetamaj chi rije' kan e qitzij dios. Kan tikik'utu' chiqawech, ri utz y ri man utz ta, richin roj kan niqaxibij-qi', y kan xtik'oje' kikiy chiqawech.

²⁴Jak'a ri wachibel ri' xa kan man jun kejqalen, y xa kan man jun achike ta ri e kibanon. Y pa ruwi' ri' konojel ri yetzeqeliben kichin kan man jun chuqa' kejqalen.

²⁵Y re wakami pa xaman xtink'en-wi-pe jun achin, ri xtipe re kere' pa relebel-q'ij, y kan xtuk'en-pe utzilej rutzijol pa nubi'. Y kan xkerupalibej ri ch'aqa' chik rey, achi'el nipalibex ri ch'abeq, y achi'el nuben ri banoy bojo'y toq nuxeq' ri xeq-ulew.

²⁶¿Achike kami chike ri i-dios ri xq'alajirisan-pe pa rutikeribel, richin xqetamaj? ¿Achike xbin pa nabey richin chi xqabij roj chi rija' kan k'o roma toq nubij keri'? Kan qitzij na wi chi man jun chike rije' ri xya'on rutzijol chiqe; kan man jun ri xq'alajirisan yan ta chiqawech. Man xak'axatej ta kich'abel rije'.

²⁷Jak'a yin Jehová ja yin nabey xibin chike ri aj-Sión, chi ri winaqi' ri' xkepe. Yin kan xtinya' chike ri aj-Jerusalem jun ya'ol rutzijol, richin xtuya' chike ri utzilej rutzijol.

²⁸Kan jebel xinkanoj, jak'a man jun chike ri i-dios xinwil. Chikikojol rije' man jun pixabanel k'o ri achoq chire ta xink'utuj-wi, richin chi xuk'uluba' ta ri nuch'abel.

²⁹Ronojel re' xa kiyon dios ri man e qitzij ta. Chuqa' ronojel ri kibanobal rije', xa kan man jun rejqalen. Y rije' xa e achi'el jun kaq'iq' ri xa choj keri' niq'ax.