Read Kaqchikel Isa 42 Bible Online

Isa 42 - Kaqchikel bible

Isa 42

¹Ri Jehová nubij: Jare' k'a ri nusamajel, ri kan xtinto' rik'in wuchuq'a'. Ja rija' ri xincha', y kan janila nikikot ri wánima rik'in. Kan xtinya' ri nu-espíritu pa ruwi', richin chi pa ruchojmilal xtuben kik'in ri ruwach'ulew.

²Rija' kan man xtisik'in ta pa taq bey, ni man xtak'axatej ta chi kow nich'on.

³Man xtuq'ej ta ri aj ri kan q'ajineq kan. Ni man xtuchup ta ri candil ri nibuqulin sib chire. Y rija' jantape' xtuben pa ruchojmilal.

⁴Rija' kan man xtikos ta, ni man xtimayamo' ta qa ri ránima, k'a ja toq xtuben pa ruchojmilal chuwech re ruwach'ulew. Y konojel ri winaqi' ri ek'o pa taq'aj ruwach'ulew, kan xtikikuquba' kik'u'x rik'in ri rupixa', xcha' ri Dios.

⁵Kere' nubij ri Jehová chire ri ya'ol rutzijol: Yin xibanon ri kaj, y kan xinrik'. Chuqa' xinben ri ruwach'ulew y ronojel ri yewachin chuwech, y kan nuya'on kik'aslen konojel ri ek'o chuwech.

⁶Yin Jehová kan xkatinwoyoj richin nibanatej pa ruchojmilal ronojel, y kan xkatinyuqej. Kan xkatinchajij, y kan xkatinteq achi'el ri nubin chike ri winaqi' israelita, y richin xkatok jun saqil chike ri man e israelita ta.

⁷Xkatinteq richin chi xtajeq ri runaq' ta kiwech ri man yetzu'un ta, richin xke'awelesaj-el konojel ri ek'o pa cárcel, y xke'akol ri ek'o pa q'equ'm.

⁸Yin Jehová; jare' ri nubi'. Man xtinya' ta ri nuruwaq'ijaj chike ch'aqa' chik dios, ni chike ri kiwachibel rije'.

⁹Re wakami k'a, xk'uluwachitej yan ronojel ri nubin-pe ojer. Y re wakami kan ninya' rutzijol ri k'ak'a' meyel taq banobel, rokik man jani tel pe chuwa saqil.

¹⁰Tiqabixaj k'ak'a' bix chire ri Jehová, y chuqa' chijun ruwach'ulew ri ek'o janila nej. Kixbixan chuqa' chi'iwonojel rix ri yixbiyin pa ruwi' ri palou, konojel ri winaqi' ri ek'o pa taq'aj ruwach'ulew, y konojel chikopi' ri ek'o pa ya'.

¹¹Kan kixkikot k'a rix winaqi' ri ixk'o pa tz'iran ruwach'ulew, chuqa' chi'iwonojel rix ri ixk'o pa taq itinamit, y chuqa' konojel tinamit akuchi ek'o-wi ri e rijatzul kan ri Quedar. Kan kixbixan rik'in kikoten rix winaqi' aj-Selá, kan kixsik'in rik'in kikoten pa ruwi' taq juyu'.

¹²Kan tiqaya' ruq'ij ri Jehová, y chuqa' chi'iwonojel rix ri ixk'o pa taq'aj ruwach'ulew.

¹³Ri Jehová kan xtipe achi'el jun achin ri maneq xibinri'il chuwech, y achi'el jun aj-labal ri kan yakatajineq-pe royowal. Xtisik'in richin xtuchop oyowal, y xkeruch'ek ri e etzelanel richin.

¹⁴Ri Jehová nubij: Kan janila k'iy q'ij ri man jun xinbij. Kan nuq'aton-wi' richin man yiq'ajan ta. Jak'a re wakami kan xkijilon, achi'el nuben jun ixoq toq nralaj jun ti ral, y k'ayew nujiq'aj ruxla'.

¹⁵Kan xtinben k'a tz'iran chike ri kijuyu' ri e etzelanel wichin, Y kan xtinben chi xkemayamo-qa ronojel ruwech taq q'ayis. Xtinchaqirisaj ri raqen taq ya' richin xtiq'alajin-pe ri ulew. Chuqa' kan xtinchaqirisaj ri choy.

¹⁶Jak'a kan xkenq'axaj pa jun utzilej bey konojel ri e moyi', pa jun bey ri kan man jun bey xketamaj. Kan chikiwech rije' yin xtinben saqil chire ri q'equ'm. Y kan xtintaq'ajuj k'a ri xotoxeq taq bey. Ronojel ri xinbij, kan xtinben.

¹⁷Jak'a xkek'ixbitej konojel winaqi' ri kikuquban kik'u'x kik'in wachibel, y nikiya' kiq'ij ch'aqa' chik dios.

¹⁸Rix ri ix tokon, tiwak'axaj, y rix ri ix moyi', chuqa' kan kixtzu'un jebel.

¹⁹¿Achike kami ri moyi'? Ja rix israelita ri ix nusamajela'. ¿Achike kami ri e tokon? Ja rix ri ix nutaqonela'. ¿Achike ta k'a ri moyi'? Ja rix ri xixincha' richin yinisamajij.

²⁰Rix kan itz'eton janila chi banobel, jak'a xa man nich'ob ta rij jebel. Kan ijaqon jebel ri ixikin, jak'a xa man jun niwak'axaj.

²¹Kan xinnimirisaj y xinya' ruq'ij ri nupixa', roma yin kan jantape' ninben pa ruchojmilal.

²²Jak'a ronojel ri k'o rejqalen iwik'in rix xa xuk'uex yan el koma ri e etzelanel iwichin. Chi'iwonojel rix xa xixkichop y xixkiya' pa taq jul, y kan iwewan-iwi' pa taq cárcel. Rix xixuk'uex-el achi'el niban rik'in ri k'o rejqalen, y kan man jun xto'on iwichin, y kan man jun xixkolon.

²³¿Achike ta k'a chiwe rix nrajo' nrak'axaj re'? ¿Achike ta k'a chiwe rix ri kan ja yan re wakami nrak'axaj ri nuch'abel?

²⁴¿Achike xya'on q'ij chi rix nutinamit Israel xixuk'uex-el? Y ¿achike xya'on q'ij richin kan xixjach-el pa kiq'a' ri eleq'oma'? Ja yin Jehová ri achoq chuwech xixmakun-wi. Yin xinwajo' chi xixbiyin ta chupan ri nubey, jak'a man xiwajo' ta xiwak'axaj ri nupixa'.

²⁵Roma ri' yin kan xinya' k'a ri woyowal pan iwi', y kan xinya' labal pan iwi'. Y ri labal ri' kan xixruk'is, achi'el nuben ri q'aq', man rik'in ri' man xq'ax ta chiwech, y man xixniman ta chuwe.