Read Kaqchikel Isa 43 Bible Online

Isa 43 - Kaqchikel bible

Isa 43

¹Jak'a re wakami kere' nubij ri Jehová ri k'iytisanel kichin ri e rijatzul kan ri Jacob: Yin xibanon iwichin rix israelita. Y roma ri' man tixibij-iwi' roma kan ja yin ri xikolon iwichin. Yin kan xixinwoyoj rik'in ri ibi', y roma ri' xixok wichin yin.

²Toq xkixq'ax chupan ri palou, yin xkik'oje' iwik'in. Toq xkixq'ax chupan raqen taq ya', kan man xkixruk'uaj ta el. Y toq xkixq'ax chupan nimalej taq q'aq', man xkixk'at ta, ni ri ruxaq q'aq' man xkixrumej ta.

³Roma ja yin Jehová, ri in i-Dios. Ja yin ri Loq'olej ri ink'o pan iwi' rix israelita. Chuqa' yin ri in ikolonel. Kan xinya' ri tinamit Egipto richin xixinkol, y ri tinamit Etiopía y ri Sabá xinya' pan ik'exel.

⁴Roma chinuwech yin kan janila iwejqalen, kan janila iruwaq'ijaj, y yin kan janila yixinwajo'. Roma ri' kan xkenjech k'a achi'a' pa kamik richin yixinkol rix, y xkenya' ch'aqa' chik ruwach'ulew pa ruk'exel ri ik'aslen rix.

⁵Man tixibij-iwi'; roma yin kan ink'o-wi iwik'in. Pa relebel-q'ij kan xkenk'en-pe ri iwijatzul, y ri pa qajbel-q'ij kan konojel xtinmol kichi'.

⁶Y chike ri winaqi' ri ek'o pa xaman xtinbij chi kekijacha-pe konojel ri nuwinaq, y chike ri ek'o pa xokon xtinbij chi man kekiq'et-qa. Jak'a kan kebekik'ama-pe ri nuk'ajol, y ri numi'al ri ek'o k'a janila nej chire ri ruwach'ulew.

⁷Kixanpe chi'iwonojel rix ri ik'uan ri nubi' yin, roma ja yin xik'iytisan iwichin, y yin xibanon iwichin, richin rix niya' nuq'ij yin.

⁸Kan timolo-iwi' rix nuwinaq israelita. Stape' rix k'o runaq' taq iwech, jak'a xa ix moyi'. Stape' k'o ixikin, jak'a xa man yixak'ex ta.

⁹Konojel k'a tzobaj winaqi' richin re ruwach'ulew kan tikimolo-ki'. Chuqa' ri tinamit kan tikimolo-ki'. ¿Achike chike rije' xq'alajirisan chiqawech ri xbanatej yan? Kan tikiyaka-pe ri xetz'eton ronojel richin tikijikiba', richin ri ch'aqa' chik tikak'axaj y tikibij chi kan qitzij.

¹⁰Jak'a rix israelita ri ix tz'eteyon ronojel, rix nusamajela' ri xixincha' yin, richin chi rix niwetamaj nuwech yin, y richin nikuquba' ik'u'x wik'in, y niq'ax chiwech chi ja yin Jehová. Pa nabey chuwe yin man jun dios xk'oje', y chuwij yin man jun chik dios xtik'oje'.

¹¹Ja yin Jehová; y man jun chik ri nikolon ta.

¹²Yin xinbij chiwe chi yixinkol, y kan xinben. Xink'ut-wi' chiwech toq man jani k'o ta chik jun dios chi'ikojol. Ja rix ri ix tz'eteyon wichin chi ja yin Jehová ri in Dios.

¹³Ja yin ri' ri in Dios richin jantape', y man jun xtitikir xtukol-ri' pa nuq'a'. Toq k'o ninben, man jun xtitikir xtiyojo.

¹⁴Ja yin Jehová, ri ikolonel y ri Loq'olej. Y ninbij chi roma ri utzilej banobel iwichin rix, kan xkenteq-el aj-labal chikij ri aj-Babilonia, richin xkekik'is, y kan xtik'is ri kikoten ri k'o kik'in.

¹⁵Ja yin Jehová, ri in Loq'olej, y ri in i-rey. ri xibanon iwichin rix israelita.

¹⁶Ja yin Jehová ri yibin. Xinben jun bey chupan ri palou, xinjeq jun bey chupan ri ya'.

¹⁷Xinben chike ri e etzelanel iwichin chi xixkiq'elebej-el kik'in ri ki-carruaje y ri kikiej. Chuqa' xe'el-el konojel ri aj-labal, jak'a konojel xek'is, achi'el toq nichup jun candil.

¹⁸Rix xa kan xaxe noqaqa chi'ik'u'x ronojel ri iq'axan-pe, y kan man noqaqa ta chik chi'ik'u'x ri e banatajineq ojer kan.

¹⁹Jak'a re wakami yin xtinben k'a jun k'ak'a' banobel. Y kan chi'anin xbek'ulun-pe. Y rix ¿kan man nitz'et ta chi xchapatej yan? Ninbenjaqa' jun bey ri pa tz'iran ruwach'ulew, y kan ninya' raqen taq ya' chupan ri ruwach'ulew akuchi ri man niwachin ta.

²⁰Kan jajun ri chikopi' ri ek'o pa k'echelaj xtikiya' nuq'ij, achi'el ri utiwa' y ri túkur. Kan xtinya' raqen taq ya' pa tz'iran ruwach'ulew, y xkenjeq rubey ya' chupan ulew ri akuchi man niwachin ta, richin chi xtinya' kiya' ri nutinamit ri kan nucha'on.

²¹Ja rix k'a ri tinamit ri xixinwinaqirisaj richin xixok wichin yin, richin kan niya' nuq'ij rik'in bix.

²²Jak'a k'a re wakami rix israelita xa kan man inatan ta ri nubi', xa kan xik'o ik'u'x wik'in.

²³Xa kan man xik'en ta pe sipanik chuwe ri niporox chijun, ni man xiya' ta nuq'ij rik'in ri isipanik. Man xinben ta chiwe richin xik'en-pe sipanik richin jalajoj ruwech ixin, ni man xinben ta chiwe richin xik'en-pe ri jubulej pom chuwe.

²⁴Man xik'en ta pe chuwe ri jubulej aj, ni man xisuj ta ri q'en chuwe. Jak'a xa kan janila q'axo'n xiya' chuwe roma ri imak; y kan janila xik'o nuk'u'x iwik'in, rik'in ri itzel taq ibanobal.

²⁵Ja yin ri yiyojon ronojel ri imak roma xinjikiba' nutzij. Roma ri' kan man xtoqaqa ta chik chinuk'u'x ri imak.

²⁶Tibana' chuwe chi noqaqa chinuk'u'x ri xbanatej ojer kan. Y wi k'o ri niwajo' richin nibij chuwe, tiqachojmirisaj k'a. Kixch'on rix richin niq'alajirisaj chi maneq imak.

²⁷Ri nabey itata' ri xk'oje' ojer kan, kan xmakun chinuwech. Chuqa' ri e aj-raqen pan iwi' xa xeyakatej chuwij.

²⁸Roma ri' xtinqasaj kiq'ij ri i-sacerdote, xtinya' q'ij chi ri iwinaq israelita xkeyojobex, y k'ari' xkek'is.