Read Kaqchikel Isa 44 Bible Online

Isa 44 - Kaqchikel bible

Isa 44

¹Ri Jehová nubij: Wakami k'a rix israelita ri ix nusamajela', kan tiwak'axaj k'a; roma kan ja yin ri xicha'on iwichin.

²Yin xibanon iwichin, kan ja toq xixtz'ukutej yin xito'on iwichin. Roma ri' man tixibij-iwi' rix israelita ri nusamajela', ri kan yin xicha'on iwichin.

³Yin kan xtinben chi xtibiyin ya' chupan ri ruwach'ulew ri kan jantape' nutz'u' ri ya'. Chuqa' kan xtibiyin raqen taq ya' chupan ri chaqi'j taq ulew. Pa kiwi' ri iwijatzul kan xtinya' ri nu-espíritu, y chuqa' xtinya' urtisanik.

⁴Rije' kan xkewinaqir, achi'el nijotayin ri q'ayis, y achi'el ri lama' ri e tikil chuchi' ri raqen taq ya'.

⁵Rije' xtikibij chi ri e israelita, kan e wichin yin. Chuqa' xtikitz'ibaj chirij ri kiq'a' ri nubi' yin.

⁶Yin Jehová, ri in rey richin Israel, ri nikolon richin. Ja yin Jehová k'iytisanel richin ronojel. Ja yin ri xik'oje-pe nabey, y ja yin ri xkik'oje' pa ruk'isibel. Man jun chik Dios k'o achi'el yin, y xaxe yin ri in i-Dios.

⁷¿Achike ta k'a ri achi'el yin? Wi k'o jun, kan tich'on-pe. Y kan tubij ri achike k'uluwachitajineq-pe ri ojer k'a re wakami, y ri xtik'uluwachitej chiwech-apo.

⁸Man tik'en rukiy, ni man tixibij-iwi', roma yin kan xinbij-pe chiwe pa rutikeribel chi ja yin ri in i-Dios. Kan ja rix ri xixtz'eton ronojel chi kan man jun chik Dios k'o achi'el yin. Y rix kan man jun chik akuchi xiwewaj ta iwi', roma yin in jun achi'el nimalej abej.

⁹Ri Isaías nubij: Konojel ri yebanon kichin ri wachibel, xa kan man jun kejqalen; roma stape' kan jebel ok rubanik ri yekiben chike, xa kan man jun yek'atzin-wi. Y ri winaqi' ri nikiya' kiq'ij ri wachibel xa e moyi'. Xa man jun ketaman, y roma ri' xa kan yek'ixbitej.

¹⁰Achike nuk'en-pe chiqe niqaben jun wachibel ri xa man jun nitikir nuben.

¹¹Kan konojel k'a ri nikiya' ruq'ij ri wachibel xa xkek'ixbitej. Ri xebanon kichin ri wachibel ri' xa e relik taq winaqi'. Wi ta konojel rije' nikimol-ki' richin nikito-ki' chinuwech yin, rije' xa xtikixibij-ki', y xtel itzel kitzijol.

¹²Ri samajiy q'eqapueq nuya' pa q'aq' ri q'eqapueq ri nusamajij, K'ari' nuben rutzil rik'in jun bajibel. Y toq nusamajij xa xtibenum-pe, xtichaqi'j ruchi' y xtik'is ruchuq'a'

¹³Chuqa' ri ajanel nretaj ri ruche', y k'ari' nutz'ibaj rubanik ri wachibel. K'ari' nusamajij ri che'. Kan nuben chire achi'el rubanik jun wineq, y ri rupalej kan jebejoj ok nuben chire, richin ruk'amon nik'oje' pa rachoch jun dios.

¹⁴Richin xuben re samaj re', rija' xuchoy jun tiox-che', jun k'isis ó jun paten-che', rija' xuya' q'ij chi ri che' ri' xk'iy-el pa taq k'echelaj. Rik'in juba' xa xutik-qa, y roma ri job kan chi'anin xk'iy.

¹⁵K'ari' rija' xa nukusaj richin rusi' richin nuben ruq'aq' chire. Xa kan nik'atzin chire richin nimeq'e' chuwech. Chuqa' nik'atzin chire richin nuben ruway y ruq'utun. Y rik'in ri juba' che' ri k'o kan, xa nuben jun wachibel richin nuya' ruq'ij. Nuben jun dios rik'in ri che' ri' richin nixuke' chuwech.

¹⁶Ri nik'aj chik chire ri che' nuya' pa q'aq' richin chiri' nusa-wi ti'ij, y kan jebel niwa'. Chuqa' numeq'-ri' rik'in ri q'aq' ri', y kan nik'oje' chiri' richin nutzu'.

¹⁷Y chire ri juba' chik che' ri k'o kan, xa xuben jun dios. K'ari' nixuke-apo chuwech y nuya' ruq'ij. Nich'on rik'in, y nuk'utuj utzil chire chi tukolo', roma jari' ri ru-dios.

¹⁸Ri wineq ri nibanon keri', man nowineq ta richin nretamaj achike ri nuben. Kan e tz'apel ri runaq' taq ruwech y ri runojibal chire ri qitzij.

¹⁹Man nuch'ob ta qa y nubij ta: Ri nik'aj chire re che' re' xa xinya' pa q'aq', y pa ruwi' ri racheq-q'aq', xinchaq'irisaj-wi nuway, xinsa' ti'ij y xintej. Y ri juba' chik che' ri xk'oje' kan chire ri che' ri', xinben jun relik wachibel chire. Y re ninya' ruq'ij xa jun ti juba' che', man nicha' ta.

²⁰Re' xa achi'el xa ta natej chaj. Re' xa ruyon q'oloj. Re wineq re' man xtitikir ta xukol-ri', man xtiq'ax ta chuwech chi ri k'o pa ruq'a', xa man qitzij ta.

²¹Ri Jehová nubij: Rix israelita kan tiwak'axaj ri xtinbij chiwe: Rix ix nusamajela', y kan ja yin ri xibanon iwichin. Y roma ri' man jun bey kinimalij kan.

²²Yin kan xinyoj yan k'a ronojel imak, kan xinben yan chire achi'el toq nik'is-el ri sutz' richin nimaq'a'. Roma ri' kan titzolin k'a pe ik'u'x wik'in, roma yin kan xixinkol yan.

²³Roma ri' kan jajun ri kaj tibixan richin nuya' nuq'ij, roma yin kan xinya' kolotajik. Kan jajun ri ruwach'ulew tibixan rik'in kikoten, chuqa' ri juyu', ri k'echelaj y ronojel che' ri ek'o, roma kan xixinkol rix israelita, y kan xink'ut ri nimalej wuchuq'a' pan iwi', xcha' ri Dios.

²⁴Kere' k'a nubij ri Jehová chike ri israelita: Ja yin ri in ikolonel, ri xibanon iwichin. Yin Jehová ri xibanon ronojel. Ja yin ri xibanon ri kaj y ri ruwach'ulew, y kan man jun xto'on wichin.

²⁵Ja yin ri yiyojon ri retal chuwech ri nubananej chi retaman ri peteneq chuwech-apo, y kan yench'ujirisaj ri e etamanel. Ja yin ri ninben chike ri aj-na'oj taq achi'a' richin nikitzolij-ki' chikij, y ronojel ketamabal man jun achoq chuwech niq'ax-wi.

²⁶Ja yin ri yibanon richin xtibanatej ri nikik'utuj ri e nusamajela', y chuqa' ja yin yibanon chi xtibanatej ri nikibij rije' pa ruwi' ri xtibanatej-apo, chi ri Jerusalem xkek'oje' chik winaqi' chupan, y chuqa' ri ch'aqa' chik tinamit richin ri Judá. Y kan xkepabex chik jun bey.

²⁷Ja yin ri yibin chire ri palou chi kechaqi'j-qa. Ja yin chuqa' yichaqirisan kichin ri raqen taq ya'.

²⁸Chuqa' ja yin ri yibin chire ri rey Ciro chi ja rija' ri xtok yuq'unel wichin, y ja rija' xtibanon ronojel ri nurayibel. Ri Ciro xtubij chi xtipabex chik jun bey ri tinamit Jerusalem, y chi ri wachoch kan xtipabex chik jun bey.