Read Kaqchikel Isa 45 Bible Online

Isa 45 - Kaqchikel bible

Isa 45

¹Kere' nubij ri Jehová chire ri Ciro: Yin kan xatincha' rat, y at nuyuqen chi awijkiq'a', richin naqasaj kiq'ij ri ch'aqa' chik ruwach'ulew, y chuqa' richin nawelesaj kan ri kamisabel pa kiq'a' ri ki-rey. Y kan ja yin xkibanon chi ri okibel kichin ri tinamit kan kiyon xkejaqatej chawech, y ri okibel ri' kan man xketz'apetej ta chik.

²Yin xkinik'o-el chawech rat, y kan xtintaq'ajuj ri ruwa taq juyu'. Chuqa' kan xkenwulaj ri okibel ri e banon rik'in q'enq'oj-pueq, y kan xtinben ruk'aj chire ri q'eqapueq ri yeq'e'e' kan chirij ri tz'apebel-kichi' ri tinamit

³Yin xtinjech ri beyomel pan aq'a' ronojel ri ewan kan, ri beyomel ri e yakon kan y kan man nibix ta akuchi ek'o-wi kan. Xtinben ronojel re' richin nawetamaj chi ja yin ri' ri in Jehová, Dios richin ri Israel, ri kan xatinwoyoj rik'in ri abi'.

⁴Roma ri wajowabal pa kiwi' ri nuwinaq israelita, ri kan e nucha'on, kan ja yin xkibanon richin xtinimer ri aq'ij, stape' rat kan man awetaman ta nuwech.

⁵Ja yin Jehová y kan man jun chik. Kan man jun chik Dios k'o. Yin kan xtinya' awuchuq'a', stape' rat man jani awetaman ta nuwech.

⁶Xtinben ronojel re' richin chi chijun ri ruwach'ulew tiketamaj chi kan xaxe yin ri in Dios, y maneq chik jun achi'el yin.

⁷Ja yin yiya'on ri saqil, y yiya'on ri q'equ'm. Yin yibanon chike ri winaqi' chi yebe pa jotol, y ja yin yibanon chike chi yebe pa xulan. Ja yin Jehová ri yibanon ronojel re'.

⁸Ri ruchojmilal kan ta chila' chikaj xtipe-wi, achi'el toq niqaqa-pe ri raxq'ab chila' chikaj. Y ri winaqi' kan xtikik'ul-q'anej, achi'el toq yebos-pe ri q'ayis toq k'o job. Kan keri' k'a xtuben ri kolotajik. Yin Jehová ri xkibanon.

⁹Toq'ex ruwech ri nuben oyowal wik'in yin ri xibanon richin, roma man jun rejqalen, achi'el jun paxineq xára ri k'aqon kan chukojol ri ch'aqa' chik e paxineq. Man nitikir ta nich'ojin rik'in ri banayon richin. Ni ta ri bojo'y man nubij ta chire ri nisamajin richin chi ri bojo'y ri' maneq ruxikin.

¹⁰Toq'ex ruwech ri alk'ualaxel ri nubij chire ri rutata': ¿Achike roma xinak'en-pe chuwech re ruwach'ulew? y nubij ta chire ri rute': ¿Achike roma xinalex awik'in?

¹¹Kere' ninbij yin Jehová, ri in Loq'olej kichin ri winaqi' israelita ri xibanon kichin: Rix ri ch'aqa' chik winaqi', man jun achike ta roma yixch'ojin pa kiwi' ri walk'ual, ri achike xtikik'uluwachij rije' chiwech-apo. Rix man jun achike roma nibij chuwe ri achike k'atzinel richin ninben yin.

¹²Yin xinben re ruwach'ulew, y ja yin xibanon kichin konojel winaqi'. Kan ja ri nuq'a' yin xrik'on ri kaj; chuqa' kan ja yin xibin richin yek'oje' ri xmotza'.

¹³Yin, rik'in ruchojmilal, xtinyek chik jun bey ri Ciro, y kan xtinben chi ronojel rusamaj xtel utz chuwech. Rija' xtupaba' chik jun bey ri nutinamit Sión, y kan xkerisq'opej-pe ri nuwinaq ri ek'o pa ximonri'il. Jak'a kan man xtuben ta richin nuk'ul jun rajel, ni man xtinpu'aqij ta. Yin Jehová k'iytisanel richin ronojel ri yibin.

¹⁴Yin Jehová kere' ninbij chiwe rix israelita: Ronojel ri kitiko'n ri aj-Egipto y ri kich'akoj ri aj-Etiopía, xtok iwichin rix. Chuqa' ri winaqi' aj-Sebá xkeq'ax pan iq'a' rix. Stape' rije' janila nima'q kipalen, konojel xke'ok iwichin. Rije' kan xketzeqe' k'a el eqal chiwij, roma e ximon-el rik'in cadena. Chuqa' kan xkexuke' k'a chiwech, y kan xtikik'utuj utzil chiwe roma ja rix ri ix kajaw rije'. Y k'ari' xtikibij chi ja yin ri in qitzij Dios, ri ink'o iwik'in rix, y kan man jun chik achi'el yin, ncha' ri Dios.

¹⁵Kan qitzij na wi chi rat kan at jun Dios ri man at tz'etel ta. Ja rat ri at Dios qichin roj ri atinamit Israel, y at qakolonel.

¹⁶Kan xkek'ixbitej konojel ri yebanon kiwachibel ch'aqa' chik Dios. Rije' xke'uk'uex-el pa ximonri'il rik'in k'ixbilal.

¹⁷Jak'a roj ri atinamit kan xqojkolotej kan richin jantape'. Y man jun bey chik xqojk'ixbitej, ni man xtiqasex ta chik qaq'ij.

¹⁸Roma keri' ri Jehová nubij: Ja yin ri xibanon ri kaj y ri ruwach'ulew. Kan xinya' rutz'uyubal, y kan xinben richin ri winaqi' yek'oje' chuwech. Ja yin Jehová, y kan man jun chik achi'el yin.

¹⁹Yin kan man in ch'owineq ta pan ewel, ni ta pa jun k'ojelibel akuchi janila q'equ'm chire ri ruwach'ulew. Man nubin ta chike ri winaqi' israelita chi kinkikanoj pa jun tz'iran ruwach'ulew. Ja yin Jehová, ri ninbij ri qitzij, y kan ninq'alajirisaj ri ruchojmilal, ncha' ri Dios.

²⁰Ri Dios nubij chike ri winaqi' kichin ri ch'aqa' chik ruwach'ulew: ¡Timolo-pe-iwi' y kixanpe! Kixjel-pe iwonojel rix ri xixkolotej kan. Kan maneq kina'oj ri yetelen wachibel ri xa rik'in che' banon-wi, y kan yech'on rik'in jun dios ri xa man nitikir ta nikolon.

²¹Kixch'on k'a y tibij-apo achike ri ruk'amon chi niben. Kixch'on k'a junan pa ruwi' re'. Ja yin ri xiya'on rutzijol ri ojer kan. Xich'on pa ruwi' re' ri kan pa rutikeribel-pe. Ja yin Jehová ri xibin. Kan man jun chik Dios achi'el yin. Yin in jun Dios choj y kolonel.

²²Kinitzeqelibej yin y yixkolotej iwonojel rix, roma yin ri in Dios, y man jun chik achi'el yin.

²³Y kan pa nubi' yin xinjikiba' nutzij; pa nuchi' k'a yin xel ch'abel richin chojmilal, y man xtintzolij ta wi' chuwij. Xinjikiba' nutzij chi chinuwech yin xkexuke' konojel winaqi', y konojel xtikijikiba' kitzij pa nubi' yin.

²⁴Y xtikibij k'a chi xaxe wik'in yin k'o ruchojmilal y uchuq'a'. Konojel k'a xkepe chinuwech, y xkek'ixbitej k'a konojel ri xeyakatej chuwij.

²⁵Jak'a yin, Jehová, xtinben chi ri winaqi' israelita kan xkech'akon, y kan xtel utzilej kitzijol, ncha' ri Dios.