Read Kaqchikel Isa 46 Bible Online

Isa 46 - Kaqchikel bible

Isa 46

¹Kere' xtibanatej-apo toq ri dios Bel xa xtik'is ruchuq'a', y ri dios Nebo xa kan xtiqaqa k'a pan ulew. Ri wachibel xa ye'uk'uex-el chirij kiej, xa kan al nuben chike ri chikopi' ri ye'uk'uan kichin; ri chikopi' ri' kan janila yekos.

²Re dios re' xa kan xeq'ochotej, y xetzaq pan ulew, jak'a kan man xetikir ta xkikol-ki' rije'. Y keri' xa xe'uk'uex-el pa ximonri'il.

³Kiniwak'axaj k'a rix ri ix israelita, ri juba' chiwe rix ri xixk'ase' kan. Yin kan janila ix wajowan-pe, kan k'a ja toq man jani kixalex, yin kan ix in ch'elen chik.

⁴Y kan keri' xtinben iwik'in k'a ja toq xkixrijix na, y toq xtibesaqir-pe ri rusumal-iwi' kan k'a xkixinto' na. Yin xibanon iwichin, kan k'a xkixinto' na, xkixinwilij y xkixinkol.

⁵¿Achoq ik'in kami yinijunamaj-wi rix? ¿Achoq ik'in kami nich'ob rix ri in junan rik'in?

⁶Ek'o jujun winaqi' nikelesaj janila q'anapueq pa taq kik'ojelibal, y niketaj saqipueq chupan jun etabel. K'ari' nikikanoj jun samajiy q'eqapueq richin nuben jun dios chire richin yexuke' chuwech y nikiya' ruq'ij.

⁷K'ari' nikiya-el chuwi-kitele'n richin nikik'uaj. Kan nikiya' k'a pa ruwi' jun k'ojelibel. Y kan chiri' k'a nik'oje-wi, y man nitikir ta nisilon-el juba'. Stape' k'o ta jun nich'on rik'in, ri wachibel ri' man nich'on ta pe, ni man nitikir ta nukol chupan jun q'axo'n.

⁸Toqaqa chi'ik'u'x ronojel re', kan tich'obo' rij, rix ri ix yakatajineq chuwij.

⁹Toqaqa k'a chi'ik'u'x ronojel banobel ri xebanatej ojer kan. Ja yin ri Dios, y man jun chik achi'el yin. Yin ri Dios y kan man jun chik dios k'o.

¹⁰Ri pa rutikeribel yin xinq'alajirisaj ri peteneq chiwech-apo. Chuqa' xinbij yan ri xa man jani tibanatej. Ri nubin kan xtibanatej, y ninben ronojel ri ninwajo'.

¹¹Yin xtinwoyoj jun achin ri nipe kere' pa relebel-q'ij. Rija' xtipe anineq, achi'el nuben jun kot. Xtipe k'a kela' chire ri ruwach'ulew ri más nej, ri xtibanon ri nuch'obon chi ninben. Yin xich'on, y yin xtinben richin chi nibanatej. Kan jare' ri nuch'obon, y kan xtinben.

¹²Kiniwak'axaj k'a rix ri kan kow iwánima, ri kan ixk'o nej chire ri ruchojmilal.

¹³Kan xtinben chi ninaqajub yan pe ri nuq'atbel-tzij. Kan xkixinto' yan k'a. Xtinkol yan ri nutinamit Sión, y ri nuruwaq'ijaj xtik'oje' pan Israel.