Read Kaqchikel Isa 47 Bible Online

Isa 47 - Kaqchikel bible

Isa 47

¹Ri Jehová nubij: Rix aj-Babilonia tijacha-iwi', y kixanpe wawe' richin yixtz'uye' pa poqolaj. Ri itinamit man jun bey xch'akatej ta, achi'el jun xten ri man jun bey xk'oje' rachijil. Jak'a chiwech-apo, man jun bey chik xtibix chire chi rija' k'a ko'ol ok y jebel ok.

²Tichapa' k'a ri ika', y tike'ej ri ixin. Tiwelesaj ri tzieq ri tz'apebel ipalej. Tijika' juba' ri ruchi' ri jebelej itziaq richin xke'iq'axaj ri raqen taq ya'.

³Richin keri' xtiq'alajin ri ich'akul, y kan janila k'a xkixk'ixbitej, richin yin xtinwelesaj woyowal chiwij, y kan man jun xtikolotej kan.

⁴Yin in Jehová k'iytisanel richin ronojel, ri Loq'olej ri k'o pan Israel, y kikolonel ri israelita.

⁵Kixtz'uye' rix aj-Babilonia. Man kixq'ajan y kixbiyin pa q'equ'm. Ojer kan ri winaqi' nikibij chire ri itinamit chi ja rija' ri reina richin ri ruwach'ulew. Jak'a re wakami, man xtibix ta chik keri' chire.

⁶Yin kan xpe woyowal chike ri nuwinaq israelita, y roma ri' kan xinben chike chi man jun rejqalen ri kiruwach'ulew. Kan xenjech pan iq'a' rix. Jak'a rix xa man xijoyowaj ta kiwech rije'. Kan jajun ri e rijita'q taq winaqi' xe'iya' pa kow taq samaj.

⁷Rix xich'ob chi ri itinamit kan xtik'oje' richin q'asen, achi'el jun reina ri nik'ase' richin jantape'. Jak'a kan man xich'ob ta juba' ri xiben, ni man xoqaqa ta chi'ik'u'x ri nuk'en-pe chiwe.

⁸Re wakami k'a, kan jebel tiwak'axaj re'. Rix kan xaxe ri irayibel ri niben, y kan ikuquban ik'u'x. Kan nibij-qa pan iwánima chi man jun chik achi'el rix. Nich'ob chi ri itinamit man jun bey xtik'is ruchuq'a' y kan xtimalix kan, achi'el jun malka'n ixoq. Chuqa' nich'ob chi kan man jun bey xkek'is-el ri iwalk'ual.

⁹Jare' k'a ri chaq k'ate' xtibek'uluwachij: Kan xkixmalkanej kan, y kan man jun chik iwalk'ual xtik'oje'. Ronojel re' kan xtipe chiwij, stape' kan janila chi winaqi' ri nikiben meyel taq banobel, y janila chi aj-itza' ri ek'o iwik'in.

¹⁰Kan nikuquba' ik'u'x rik'in ri itzel taq ibanobal, y kan nich'ob chi man jun yixtz'eto. Jak'a ri ina'oj y ri iwetamabal xa xixkiq'ol toq xibij-qa pan iwánima chi kan xaxe rix ri ixk'o, y man jun chik achi'el rix.

¹¹Jak'a xtipe ruk'ayewal pan iwi' y kan man jun xtiq'aton richin, roma kan man xkixtikir ta chik xtiben jun meyel banobel richin yixrukol rix. Jun ruk'ayewal xtipe pan iwi', y rix kan man xkixtikir ta xtitoj jun aj-itz richin yixrukol. Chaq k'ate' xtoqaqa pan iwi' ri man iwoyoben ta.

¹²Kan chaq tikuquba' ik'u'x kik'in ri winaqi' ri nikiben meyel taq banobel, y kik'in ri janila chi aj-itza', roma kan jari' ix beneq kik'in toq k'a ix ak'uala' na. Q'alaj k'ari' wi k'o xtik'atzin-wi chiwe. Q'alaj k'ari' xke'ixibij ri e etzelanel iwichin.

¹³Ronojel ri kipixabanik xa xuben chiwe chi xixkos. Wakami k'a kepe y kixkikolo' ri yetz'eton ronojel ri nibanatej chuwech ri kaj, ri ye'ajlan ri ik', y nikibij ri achike peteneq chiwij.

¹⁴Jak'a kan konojel rije' xa xkek'is, achi'el ri páxa nuk'is q'aq'. Rije' kan man xketikir ta xtikito-ki' chuwech ri q'aq'. Y ri q'aq' ri' kan man achi'el ta racheq-q'aq' richin yemeq'e' chuwech.

¹⁵Keri' k'a xtikiben iwik'in rix, ri janila ikuquban ik'u'x kik'in, stape' janila ikuquban ik'u'x kik'in k'a ja toq ix ak'uala' na. Xa kan xkebe ri akuchi nikajo-wi, y man jun chike rije' ri xkixkito' ta.