Read Kaqchikel Isa 48 Bible Online

Isa 48 - Kaqchikel bible

Isa 48

¹Tiwak'axaj k'a ri nuch'abel yin, rix israelita, rix ri ix rutzobaj kan ri Judá. Rix niya' itzij pa nubi' yin, y chuqa' ninataj ri nubi', yin ri i-Dios. Jak'a xa man qitzij ta niben, ni man niben ta pa ruchojmilal.

²Rix kan nibij chi ix richin ri tinamit ri nuch'aron yin, y chi kan ikuquban ik'u'x wik'in yin, Jehová k'iytisanel richin ronojel.

³Ronojel re' xinq'alajirisaj-pe ri ojer, Ja ri nuchi' yin ri xbin chiwe. Y chaq k'ate' xinben ri nubin. Y kan kere' xbanatej.

⁴Ronojel re' xbanatej roma kan wetaman chi rix man ninimaj ta nutzij. Rix janila ix tix, y man niwajo' ta richin niqasex iq'ij.

⁵Rix nibij chi ronojel re' xbanatej koma ri wachibel ri xe'iben. Jak'a xinq'alajirisaj chiwech k'o yan chik q'ij ri' toq man jani tibanatej ronojel re', yin xinya' yan rutzijol pa ruwi' re', richin chi man nibij ta re'. Rix man yixtikir ta nibij chi xbanatej koma ri wachibel ri e banon rik'in che' y q'eqapueq.

⁶Rix xiwak'axaj ronojel re' ojer yan pe ri', y re wakami kan xitz'et. ¿Chij xtibij chi man qitzij ta? Wakami k'a xtink'ut k'ak'a' taq banobel chiwech ri man jun bey iwak'axan ta, y man jun bey itz'eton ta.

⁷K'a ja re wakami xtinben yan re k'ak'a' taq banobel re', y man ojer ta ri' keban, richin keri' rix man xtibij ta chi ronojel re' kan iwetaman chik pe.

⁸Rix man jun bey iwajowan iwak'axan ta re', ni man jun bey iwajowan ta niwetamaj, roma ri' man xiwajo' ta xiwak'axaj. Yin kan wetaman chik chi rix kan ix q'olonel-wi, roma kan k'a ja toq man jani kixalex, rix kan ix yakatajineq chik chuwij.

⁹Roma xinjikiba' nutzij richin yixinto', roma ri' xinq'et ri woyowal. Y roma richin niya'ox nuq'ij xinq'et-wi', richin man xixink'is ta.

¹⁰Kan qitzij na wi chi ix nuya'on pa tijoj-poqonal, jak'a xaxe richin xixinch'ajch'ojirisaj, achi'el niban rik'in ri saqipueq. Xinya' ruk'ayewal pan iwi' richin nijel ri ik'aslen, achi'el nich'ajch'ojirisex ri saqipueq pa q'aq'.

¹¹Roma xinjikiba' nutzij chi yixinto', roma ri' xinben ronojel re'. Man ninya' ta q'ij richin niqasaj ruq'ij ri nubi'. Y ri nim ruwa-nuq'ij ri k'o, kan man xtinya' ta kan chire jun chik.

¹²Kiniwak'axaj k'a rix israelita, roma kan xixinwoyoj. Kan xaxe yin Jehová, ja yin ri xik'oje' pa nabey, y ja yin ri xkik'oje' pa ruk'isibel.

¹³Kan qitzij na wi, ja yin xibanon ri ruxe' ri ruwach'ulew; y ja ri wijkiq'a' xrik'on ri kaj. Y kan nikiben ronojel ri ninbij.

¹⁴Timolo-iwi' rix iwonojel ix israelita, y tiwak'axaj. ¿Achike kami chike ri wachibel ri ek'o chi'ikojol rix, ri nitikir nuq'alajirisaj re banobel re'? Ri achin ri xtinwoyoj yin, ja rija' ri xtibanon ronojel ri nuch'obon yin chikij ri aj-Babilonia. Y rija' kan xtiyakatej chikij rije'.

¹⁵Yin, ja yin ri xich'on. Y ja yin xinoyon ri achin ri'. Yin xtink'en-pe, richin ronojel utz xtel chuwech.

¹⁶Kixjel-pe wik'in rix israelita, y tiwak'axaj ronojel re'. Kan pa rutikeribel man wewan ta ri nuch'abel richin nak'axatej. Y toq nibanatej ri xinbij, yin kan chiri' ink'o-apo, ncha' ri Dios. Y ri Isaías xubij: Y wakami xiruteq-pe ri Jehová k'iytisanel richin ronojel, y xiruteq-pe rik'in ri ru-Espíritu.

¹⁷Ri Jehová nubij: Ja yin ri in ikolonel rix, y kan xaxe yin ri in i-Dios. Ja yin Jehová ri nink'ut chiwech ri más jebel chiwe rix, y yin yik'utu chiwech ri utzilej bey, ri akuchi ruk'amon richin yixbe.

¹⁸¡Xa ta iya'on ixikin chire ri nupixa'! Xk'oje' ta uxlanibel-k'u'x pa ruk'iyal iwik'in, achi'el jun raqen-ya' ri kan nibulbu'x. Xk'oje' ta ch'akonik jantape' iwik'in rix, achi'el ri ruwi' ri palou ri kan jantape' ye'apon-qa pa sanayi'.

¹⁹Chuqa' ri iwijatzul xewinaqir ta pa ruk'iyal, achi'el rajlabal ri sanayi' ri ek'o chuchi' ri palou. Y yin kan man ta xixink'is.

²⁰Toq xtitz'et ronojel re', kixel-pe chiri' pa Babilonia. Kixanimej-pe chikiwech rije'. Tiya' k'a re rutzijol re' rik'in raqoj-chi'ij y rik'in kikoten. Tiya' rutzijol k'a pa ruk'ulba't ri ruwach'ulew. Tiya' rutzijol chi yin Jehová xixinkol rix israelita.

²¹Toqaqa k'a chi'ik'u'x chi ri ite-itata' man xchaqi'j ta kichi' toq xebe pa tz'iran ruwach'ulew. Yin xinpaxij ri nima-abej richin chiri' xel-pe ri ya'.

²²Jak'a chike ri e banoy taq etzelal, kan man xtinya' ta uxlanibel-k'u'x. Yin Jehová ri yibin.