Read Kaqchikel Isa 49 Bible Online

Isa 49 - Kaqchikel bible

Isa 49

¹Ri israelita nikibij: Qojiwak'axaj k'a rix winaqi' ri ixk'o pa taq'aj ruwach'ulew, chuqa' rix ri ixk'o nej chire ri ruwach'ulew. Ri Jehová xojroyoj k'a ja toq man jani qojalex. Kan xunataj yan ri qabi' toq k'a man jani ojk'o.

²Ri Dios xuben chi ri qach'abel xok pa taq kánima ri ye'ak'axan, achi'el jun espada ri kan janila rey ri nikamisan, y achi'el jun ch'ab ri janila ch'ut rutza'n. Kan xojrewaj chuxe' ri ruq'a', y kan xojruchajij.

³Xubij chiqe chi roj oj rusamajela', y qik'in k'a roj xtuk'ut ri ruruwaq'ijaj.

⁴Jak'a roj xqabij chi man jun nuq'ajuj oj samajineq, xa man jun nuq'ajuj, y xa xk'is quchuq'a'. Man rik'in ri', ri xtuya' rija' chiqe, kan k'o pa ruq'a', y ri rajel ruk'exel k'o rik'in ri qa-Dios.

⁵Ri Jehová ja rija' ri xbanon qichin richin xojok rusamajela' toq k'a man jani qojalex. Xojruben richin xeruk'en-pe ri juba' chike ri qawinaq ri ek'o na kan. Y rija' kan ruya'on ruwaqaq'ij, y janila quchuq'a', yecha'.

⁶Y roma ri' ri Jehová nubij: Man jun rejqalen richin chi rix xaxe ye'imol kichi' ri juba' chike ri iwinaq ri ek'o kan. Jak'a yin kan xtinben chiwe chi xkixok jun saqil kichin ri ch'aqa' chik winaqi' richin ri ruwach'ulew, richin chi rix xkixk'amon-pe ri kolotajik chike chijun ri ruwach'ulew.

⁷Yin Jehová ja yin ri in ikolonel, y xaxe yin ri in i-Dios. Ri ch'aqa' chik tinamit kan janila ix ketzelan, y kan man yixqa' ta chikiwech. Y rix kan xixime' pa samaj kik'in ri ch'aqa' chik q'atoy taq tzij. Jak'a xtapon jun q'ij toq xkixkitz'et ri rey, y xkepa'e' chiwech richin nikiya' iq'ij, y ri e tata'al xtikilukuba-ki' chiwech, roma ja yin Jehová ri Loq'olej ri in k'o pan iwi' y ri xicha'on iwichin. Y kan xtinben ri ninbij.

⁸Kere' k'a ninbij yin Jehová: Kan pa taq ruq'ijul xtink'uluba-pe ri ich'owen, y chupan ri q'ij richin kolotajik, kan xkixinto'. Kan xkixinchajij; iwoma rix xtinyek chik el jun bey ri ruwach'ulew, y xtiwichinaj kan ri ulew ri e malin kan.

⁹Xtibij chike ri ek'o pa cárcel, chi ke'el-pe, y chike ri ek'o pa q'equ'm, chi tikik'utu-pe-ki'. Y rokik e tzolejineq-pe chupan ri kibey, xtikil ri kiway. Rokik e peteneq chupan ri tz'iran ruwach'ulew, kan k'o ri xtikitej.

¹⁰Kan man xkewayjan ta, ni man xtichaqi'j ta kichi'. Chuqa' ri q'ij y ri k'aten kan man jun xtuben chike. Roma yin yenwajo' rije', y roma ri' yin kan xkenyuqej chuchi' ri raqen taq ya'.

¹¹Yin kan xtinben chi xke'ok bey ronojel ri juyu', y kan xkentaq'ajuj.

¹²Konojel k'a rije' xkepe nej. Jujun chike rije' xkepe pa xaman, y ch'aqa' chik xkepe pa xokon. Chuqa' ch'aqa' chik xkepe k'a pa qajbel-q'ij, y ch'aqa' chik xkepe pa ruwach'ulew Sinim.

¹³Kan jajun ri kaj xtibixan roma kikoten, y kan jajun ri ruwach'ulew kan janila nikikot. Chuqa' jajun ri juyu' xtisik'in roma kikoten, roma yin Jehová kan xtinkuquba' ik'u'x rix, y kan xtinjoyowaj iwech roma xitej poqon.

¹⁴Jak'a rix ri aj-Sión nibij chi yin xixinmalij kan, y chi yin ri iwajaw xixinmestaj kan.

¹⁵¿Kan numestaj kami ri ti ral ri ixoq? ¿O man nrajo' ta kami ri ak'ual ri xalex rik'in rija'? Stape' rik'in juba' ek'o ri yetikir yebanon keri', jak'a yin kan man jun bey xkitikir xtinben keri'.

¹⁶Yin kan jantape' ixk'o pa wánima, achi'el xa ta tz'iban ri ibi' pa nuq'a'. Kan jantape' k'o chinuk'u'x ri tz'aq ri sutiyon-iwij, richin jantape' choj ek'o.

¹⁷Kan chi'anin k'a xkepe ri xkepaban chik jun bey ri itinamit, jak'a ri xeyojon iwichin kan chi'anin xke'animej-el.

¹⁸Kixtzu'un k'a nej, roma konojel ri iwinaq xtikimol-pe-ki' richin xkepe iwik'in. Yin Jehová kan ninya' nutzij chi konojel rije' kan janila e jebel ok xketz'et, achi'el jun wiqobel ri niya'ox chire jun xten ri nik'ule'. Kan keri' xtokibana' iwik'in rix.

¹⁹Ri itinamit xa xwuluwu' kan, y tz'iran xuben kan. Y ri iruwach'ulew tolan-tolan xuben kan. Jak'a re wakami ri iruwach'ulew kan janila ti ko'ol ok xtuben chiwe. Rokik ri' ri xek'ison iwichin kan janila nej ri xkebe-wi.

²⁰K'o k'a jun q'ij ri iwalk'ual ri achi'el e sachinaqi' chiwech rix, xtikibij chiwe chi ri ruwach'ulew ri' janila ko'ol ok chike, y chi tikanoj ch'aqa' chik ulew richin yek'ase' chupan.

²¹Jari' toq rix xtibij-qa pan iwánima: ¿Achike k'a xeya'on chiqe konojel re winaqi' re'? Roma roj xa e maneq qalk'ual, y man jun bey chik xke'alex qalk'ual. ¿Achike kami xek'iytisan kichin? Roma roj xa kan xqayonij kan, y man qetaman ta akuchi e peteneq-wi, xkixcha'.

²²Yin Jehová kere' ninbij: Yin kan xkenwoyoj rik'in ri nuq'a' ri ch'aqa' chik winaqi' richin re ruwach'ulew, y kan xtinya' jun retal chikiwech rije', richin yekik'en-pe chuwa-kik'u'x ri ik'ajol, y ri imi'al kan xkekik'en-pe chuwi-kitele'n.

²³Ri e rey jari' xke'ok achi'el itata', y ri e reina achi'el ite'. Kan xtikiqasaj-ki' chiwech k'a pan ulew, y kan xtikireq' ri poqolaj ri k'o chirij ri iwaqen. Xtibanatej ronojel re' richin niwetamaj chi ja yin Jehová, y ri xtikikuquba' kik'u'x wik'in yin, kan man xkek'ixbitej ta.

²⁴¿Kan xtimaj kami ri k'o rejqalen chuwi-kiq'a' ri aj-labal ri kimajon-pe rije'? ¿Kan tikirel kami yekol ri winaqi' ri ek'o pa ximonri'il?

²⁵Jak'a kan kere' k'a ninbij yin Jehová: Kan qitzij wi chi ri ek'o pa ximonri'il kan xkekolotej-wi pa kiq'a' ri achi'a' ri maneq xibinri'il chikiwech. Ri k'o rejqalen, kan xtimaj kan chuwech ri nibanon chiwe richin nitej poqon. Y yin kan xtinben oyowal kik'in ri xkiben oyowal iwik'in, y yin kan xkenkol ri iwalk'ual.

²⁶Chuqa' chike ri yetz'ilo iwichin, kan xtinben richin xtikitej-qa-ki' rije', y kan xkeq'aber rik'in ri kikik'el rije' ri xtikiqum, achi'el toq yeq'aber rik'in ri vino. Xtibanatej ronojel re' richin chi'iwonojel xtiwetamaj chi ja yin Jehová, ri in kolonel, ri xiloq'on iwichin, ri k'o nimalej uchuq'a' wik'in richin yixinto' rix israelita.