Read Kaqchikel Isa 5 Bible Online

Isa 5 - Kaqchikel bible

Isa 5

¹Xtinbenbixaj k'a re jun bix re' chire ri wachibil ri janila ninwajo', Re bix re' richin ri rutiko'n richin uva. Ri wachibil kan k'o k'a jun rutiko'n richin uva ri rubanon-qa, pa jun ulew ri akuchi niwachin-wi ronojel ruwech tiko'n.

²Xujosq'ij k'a jebel ri ulew ri' y xrelesaj-el ronojel ri abej chupan. Xerucha' k'a ri más utz ruxe' ri uva y jari' ri xutik-qa. Y pa nik'aj chire ri rutiko'n ri' xupaba' jun tobel richin nichajix ri uva. Chirij re' xuk'ot k'a jun jul, y chiri' xuben jun yitz'bel-uva; y xroyobej k'a chi ri rutiko'n nuya-pe uva ki'. Jak'a pa ruk'exel ri uva ki', xa ch'amilej-uva ri xuya'.

³Roma ri' ri rajaw ri ulew nubij: Wakami k'a rix winaqi' richin Jerusalem y richin Judá, kan ticha' k'a rix achike k'o rumak, yin o ri nutiko'n.

⁴¿Achike k'a ri man ta xitikir xinben rik'in ri nutiko'n? ¿Achike roma toq kan woyoben chi nuya' ta pe uva ri kan jebel ki' y xa xuya-pe ch'amilej-uva?

⁵Wakami k'a xtinbenbij chiwe ri achike xtinbenbana' rik'in ri nutiko'n richin uva. Xa kan xtinwelesaj k'a ri qejoj chirij richin chi nik'is. Xtinwop k'a ri tz'aq ri rusutin-rij richin chi nipalibex kan.

⁶Y xtinben chi kan man jun chik xtik'oje' kan. Man chik k'a xkenjol ta ri ruq'a', ni man xtiban ta chik makoj chupan. Kan xtik'iy k'a pe q'ayis y k'ix chupan. Y chuqa' kan xkich'on rik'in ri sutz' chi man chik xtuteq-pe job, xcha'.

⁷Ri Jehová k'iytisanel richin ronojel, jari' ri rajaw ri tiko'n. Y ri tiko'n ri kan janila nrajo', re' kan nuk'exewachuj k'a konojel ri qawinaq israelita. Y re qejoj re' kan jare' ri k'o más rejqalen. Ri Jehová kan royoben k'a chi xkitaqej ta ri rupixa', jak'a xa ruyon kamik ri xkiben. Royoben k'a ruchojmilal, jak'a xa ruyon raqoj-chi'ij richin q'axo'n ri nrak'axaj.

⁸Toq'ex k'a iwech rix ri nimej kan kachoch ri iwachpochel xaxe richin yek'iyer ri iwachoch rix. Toq'ex iwech rix ri nimej kan kixoral ri iwachpochel richin yek'iyer ixoral rix, k'a toq man jun chik akuchi yek'oje-wi-qa ri iwachpochel. Y keri' kan iyon k'a rix yixk'oje' chuwech ri ruwach'ulew.

⁹Ri Jehová k'iytisanel richin ronojel kan xubij k'a chuwe chi ri jay ri' kan xketole' k'a kan rupan. Stape' e nima'q y kan jebel kibanik, jak'a xa kan xkemalin kan.

¹⁰Wi k'o kawineq jun k'an itiko'n richin uva, kan xaxe k'a ok waqi' galón ruya'al uva nuben toq niyitz'. Nitik-qa lajuj costal ija'tz richin trigo chupan ri janila chi iwulew, jak'a kan xaxe k'a ok jun ti costal trigo ri nuya-pe chiwe.

¹¹Kan toq'ex k'a iwech rix ri kan nimaq'a' yan nichop q'abarik. Kan yixukusan k'a aq'a' richin yixq'aber y kan k'a niq'aq'er na ri ijolon.

¹²Yixnimaq'ijun rik'in ri arpa, ri salterio, ri tambor, ri xul. Ye'ibanala' nima taq wa'in y kan janila vino ri ye'iya'. Xa jak'a kan man niya' ta rejqalen ri xubij ri Jehová, y kan man niya' ta k'a rejqalen ri xuben rija'.

¹³Roma ri' kan chi'iwonojel k'a rix xkixuk'uex-el pa ximonri'il, roma kan maneq iwetamabal. Konojel k'a ri k'o kiq'ij, xkeken roma wayjal. Y janila chi winaqi' xkeken roma chaqi'j-chi'ij.

¹⁴Roma ri' ri jul richin muqbel kaminaqi' kan royoben k'a richin xkerubeq' ri janila chi winaqi'. Chuqa' e kachibilan ri e aj-raqen, ri janila chi winaqi', ri xaxe oyowal nikiben, y ri xaxe nimaq'ij richin yeq'aber ri nikiben.

¹⁵Ri winaqi' xa kan jumul xtibeqasex k'a kiq'ij. Y ri winaqi' ri kan janila kinimirisan-ki' xa xtibeqasex kiq'ij.

¹⁶Ri Jehová ri k'iytisanel richin ronojel kan xtuk'ul runimirinen roma pa ruchojmilal nuq'et-tzij. Ri loq'olej Dios xtuk'ut k'a ri ruch'ajch'ojil toq nuben ri ruchojmilal.

¹⁷K'ari' ri winaqi' israelita xkebe pa jotol, achi'el ri karne'l ri kan chupan ri kisoq'olbal rije' yewa-wi, y achi'el ri taq alaji' karne'l ri xtikitej ri kiq'os chikikojol jay kichin ri beyoma' ri xa e wulatejineq kan.

¹⁸Kan toq'ex k'a iwech rix ri kan ix ximil chupan ri mak, ri kan ix ximon rik'in ri q'oloj. Ri kan ik'uan ri imak, achi'el xa ta ijik'on-el jun carreta.

¹⁹Rix kan nitze'ej ri Jehová y nibij chi tipe yan chi'anin richin ri nrajo' nuben, kan tubana', richin chi nitz'et rix. Rix chuqa' nibij chi kan tubana' k'a ri ruch'obon richin niq'ax chiwech.

²⁰¡Kan toq'ex k'a iwech ri nibij utz chire ri itzel, y nibij itzel chire ri utz! Kan niben chire ri saqil, q'equ'm y chire ri q'equ'm, saqil. Kan niben k'ey chire ri ki', y chire ri ki' niben k'ey.

²¹¡Toq'ex iwech rix ri kan nina-iwi' chi ix aj-na'oj, y kan iyon nina-iwi' chi kan k'o inojibal!

²²Toq'ex iwech rix ri kan inimirisan-iwi' niqum vino, y kan ix nima'q nina-iwi' toq nixolola-qa ri ya' ri yeq'abarisan.

²³Rix chuqa' yixpuaqix xaxe richin chi nibij chi ri wineq man jun rumak. Jak'a rik'in ri wineq ri choj ruk'aslen, kan man niben ta ri k'atzinel.

²⁴Roma ri' rix kan xkixk'is k'a, achi'el ri ruxaq-q'aq' ri kan nuk'is ri chaqi'j ruxaq taq che', achi'el chuqa' ri q'aq' ri nuk'is jumul ri k'im. Kan keri' k'a xkixbek'is rix chi'iwonojel, achi'el ri q'ayis ri niq'ey ri ruxe', y ri rusi'j xa nik'is-qa y nok achi'el poqolaj ri nuk'uaj-el ri kaq'iq'. Ronojel k'a re' xtibanatej roma kan xmulun ik'u'x chirij ri rupixa' ri Jehová k'iytisanel richin ronojel, y chuqa' roma xiwetzelaj kan ri Jehová ri qa-Dios.

²⁵Roma k'a re banobel re' xyakatej janila royowal ri Jehová chiwij. Y roma ri' kan xtutzeqej k'a ri ruq'a' chiwij richin nuya' ri rutojbalil pan iwi'. Ri juyu' kan xkesilon k'a, y ri kich'akul ri qawinaq ri xkeken, kan xkepunupuxin pa taq bey; xa kan achi'el k'a q'ayis xtikiben. Man rik'in ri' ri royowal ri Jehová man jani tiq'ax, roma ri royowal rija' xa kan k'o k'a pan iwi'.

²⁶Ri Jehová kan xtutzeqej k'a jun tzieq chikaj richin jun oyonik. Y kan xtixuban richin yeroyoj ri winaqi' richin jun ruwach'ulew nej ri ek'o pa ruk'isibel chire ri ruwach'ulew. Y xtuben chike ri winaqi' ri' chi kan chi'anin k'a xkepe.

²⁷Chikikojol rije' kan man jun k'a kosik k'o, ni man jun ri chaq nupajk'ij ta raqen. Man jun k'o ri man ta k'es jebel o nuchop ta qa waran. Man jun ri man ta rujitz'on jebel rupan, ni man jun ri raq'ach'itajineq ta ri ruximibal ri ruxajab.

²⁸Ri kich'ab kan is-is k'a ri rutza'n; ri rute-ch'ab ri e kik'ualon kan e kinaban jebel. Ri kitabek ri kikiej kan achi'el k'a ri kowilej abej. Ri ru-rueda ri ki-carruaje kan achi'el k'a ri surkum nuben ri niq'ajan.

²⁹Ri kich'abel ri e etzelanel iwichin kan achi'el k'a toq niq'ajan-pe ri koj. Kan xtisik'in achi'el ri pa ruchi' ri ti alaj koj. Kan xkixkichop k'a rix, achi'el ri koj ri nuqach'ach'ela' k'a rey richin niberuchapa' ri ruq'ijun-pe. K'ari' xkixkik'uaj-el, y man jun xkixkolon kan pa kiq'a'.

³⁰Chupan k'a ri q'ij ri' rije' kan xkewajin k'a pe chiwij, achi'el niwajin ri palou. Ri qaruwach'ulew kan xtitz'etetej k'a chi kan achi'el xa ta pisil chupan jun nimalej q'equ'm richin q'axo'n, y ri saqil kan xtok q'equ'm.