Read Kaqchikel Isa 50 Bible Online

Isa 50 - Kaqchikel bible

Isa 50

¹Kere' k'a nubij ri Jehová: Rix walk'ual, ¿akuchi kami k'o-wi ri wuj ri nubij chi yin xinya' kan ri ite', achi'el nuben kan jun achin chire ri rixjayil? ¿Xixink'ayij roma k'o ta nuk'as? Ni, jak'a xa roma imak y ri iyakatajinenri'il. Chuqa' roma ri rumak ri ite', kan xinteq-el nej.

²¿Achike roma toq yin xinapon, man jun k'o? ¿Achike roma xixinwoyoj, jak'a man jun xch'on wik'in? ¿Maneq kami wuchuq'a' yin richin man yitikir ta yixinkol? ¿Xk'is kami wuchuq'a' yin richin man yixinto' ta? Re wakami xaxe rik'in ri nuch'olinik, xtinben richin nichaqi'j-qa ri palou, ri akuchi ek'o nimalej raqen taq ya', kan xke'ok tz'iran. Kan xkeken k'a ri ker ri ek'o chupan, y kan xkechuwir-pe.

³Yin kan xtinben chire ri kaj richin q'equ'm, q'equ'm xtuben, achi'el tzieq q'eq retal richin bis.

⁴Ri rusamajel ri Dios nubij chire: Ajaw Jehová, rat aya'on ch'abel wik'in, richin naya' kuqubabel-k'u'x chike ri e kosinaqi'. Ronojel nimaq'a' naben chuwe richin yiyakatej yan, y kan naben chuwe, achi'el ri winaqi' ri k'o na'oj kik'in,

⁵Jehová k'iytisanel richin ronojel, kan naben chuwe richin nijaqatej ri nuxikin, y yin kan man yiyakatej ta chawij, ni kan man nintzolij ta wi' chuwij.

⁶Kan xinya' k'a ri ruche'el-wij chikiwech ri yech'ayon wichin, y chuqa' kan xinya' ri nupalej chikiwech ri xe'elesan ri rusumal-nuchi'. Kan man xinwewaj ta nupalej chikiwech ri janila xinkiyoq' y ri xinkichubaj.

⁷Roma kan ja ri ajaw Jehová ri xito'on, kan man xsach ta nuk'u'x. Roma ri' kan kow xik'oje' achi'el jun abej y wetaman chi kan man xkik'ixbitej ta.

⁸Kan naqaj k'a k'o chuwe yin ri yiruto' y ri nukolonel. ¿Achike ta k'a nrajo' nuben oyowal wik'in? Kan tubana' k'a y kan tijel-pe wik'in. ¿Achike ta k'a nibin chi yin k'o itzel ri xinben? Kan tubij k'a chi nupalej yin.

⁹Yin kan ja ri Jehová k'iytisanel richin ronojel ri xtito'on wichin. Roma ri' kan man jun xtitikir chuwij. Roma konojel ri e etzelanel wichin xa kan xkek'is, achi'el nuben jun tzieq tzia'q, ri kan janila xkusex, ncha' ri samajel.

¹⁰Man jun chiwe rix ri janila nuk'en rukiy ri Jehová y kan nrak'axaj ruch'abel ri rusamajel. Jak'a rix yixbiyin pa q'equ'm, y kan man jun seq nitz'et chupan. Pa ruk'exel re', kan tikuquba' ik'u'x rik'in y tito-iwi' rik'in ri qa-Dios.

¹¹Rix ri nibox jun q'aq' richin nitz'et ri ibey, kan kixbiyin k'a chupan ri saqil ri'. Y rix ri nitzij jun chej richin nuya' saqil, kan titzeqelibej k'a ri saqil richin ri chej ri'. Jak'a ri Jehová kan xtuteq-pe jun nimalej ruk'ayewal pan iwi', y ronojel re' xa xtuk'en-pe bis.