Read Kaqchikel Isa 52 Bible Online

Isa 52 - Kaqchikel bible

Isa 52

¹Kixk'astej, kixk'astej rix aj-Sión, kan tik'oje' iwuchuq'a'. Rix aj-Jerusalem kan tikusaj ri itziaq ri más jebel ok, roma kan man jun bey chik xtok jun wineq iwik'in ri man iwinaq ta o man ch'ajch'oj ta.

²Kixyakatej k'a pa poqolaj rix aj-Jerusalem, y kixq'aton-tzij rix. Kan tiwelesaj kan ri achoq ik'in ix ximon-wi, rix aj-Sión ri xixuk'uex-el.

³Roma ri Jehová nubij chi achi'el ri xban chiwe rix toq xixk'ayix-el, kan man jun iwajel xya'ox, keri' chuqa' xtuben rija'. Rix k'o chi yixloq'-pe, jak'a kan man jun méro xtiya'ox kan.

⁴Ri Jehová kan nujikiba' chi ri ojer kan ri qati't-qamama' kan xebe-wi pan Egipto, richin xebek'ase' chiri'. Y chirij re' ri aj-Asiria kan janila xixkiya' pa poqon.

⁵Y re wakami rija' nubij: ¿Achike k'a nintz'et re wawe'? Ri nutinamit xa xe'uk'uex-el y man jun achike ta roma. Y pa ruwi' ri', ri xe'uk'uan-el kan yekitze'ej, y kan chaq q'ij-q'ij nikiben chire ri nubi' chi maneq rejqalen.

⁶Roma ri' kan k'o k'a jun q'ij ri nutinamit xtiketamaj in achike yin. Y k'ari' xtiketamaj chi yin kan xinbij yan ronojel re', y chi jare' ink'o wawe', ncha' ri Dios.

⁷Kan janila jebel ok toq natz'et jun ya'ol utzilej rutzijol, ri peteneq pa ruwi' taq juyu' richin ri Jerusalem. Xtuk'en-pe ri utzilej rutzijol chi xtik'oje' uxlanibel-k'u'x, chi xtik'oje' kolotajik, y chi ri qa-Dios kan niq'aton chik tzij.

⁸Tiwak'axaj. Ri yechajin iwichin kan xkesik'in roma kikoten, roma toq ri Jehová xtitzolin chik pe pa tinamit Sión, kan xtikitz'et rik'in runaq' taq kiwech.

⁹Kan xkixsik'in roma ch'akonik rix aj-Jerusalem, stape' ri tinamit wuluwik rubanon kan, roma ri Jehová kan xtujoyowaj ruwech; kan xtukol ri itinamit.

¹⁰Ri Jehová kan xtuk'ut-wi ri ruchuq'a' chikiwech konojel tzobaj winaqi' richin re ruwach'ulew. Chijun ri ruwach'ulew xtiketamaj chi ri qa-Dios roj xqojrukol.

¹¹Tich'ara-pe-iwi' kik'in ri aj-Babilonia, y kixel-pe. Jak'a man ke'ichop ri man e ch'ajch'oj ta, Kan tich'ara-pe-iwi' kik'in, y tich'ajch'ojirisaj-iwi' rix, ri yixuk'uan ri samajibel richin ri rachoch ri Jehová.

¹²Man kixel-pe achi'el xa ta k'o ix oqotayon-pe, ni man kixpe achi'el xa ta iwewan-pe-iwi', roma ri Jehová, jari' ri xtik'o-pe chiwech. Y chuqa' ri qa-Dios, ja rija' xkixto'on chikiwech ri e etzelanel iwichin ri e peteneq chiwij.

¹³Ri Jehová nubij: Wakami ri nusamajel jari' ri xtich'akon. Kan xtinimirisex ri rubi', y kan xtiya'ox ruq'ij-ruk'ojlen.

¹⁴Jak'a kan janila e k'iy ri xtikimey toq xtikitz'et ri rubanik, y ri nitzu'un kan man achi'el ta nitzu'un jun wineq, roma ri xtibanatej rik'in rija'.

¹⁵Y keri' k'a chuqa' kan e k'iy k'a tzobaj winaqi' richin ri ruwach'ulew ri xtikuyutej kimak. Ri e rey toq xtikitz'et, kan man jun xtikibij, roma xtikitz'et ri man jun bey bin chike, y xtiq'ax chikiwech ri man jun bey e kak'axan.