Read Kaqchikel Isa 54 Bible Online

Isa 54 - Kaqchikel bible

Isa 54

¹Ri Jehová nubij: Kan kixkikot k'a rix ixoqi' ri man jun bey xixyawej kan chirij jun ak'ual. Rix ri man xek'oje' ta iwal, kan kixbixan rik'in kikoten, roma rix ri ix malin kan, kan xkek'oje' más e k'iy iwal chikiwech ri ixoqi' ri ek'o chik kal.

²Roma ri' kan tinimirisaj ri taq iwachoch, y ri tzieq ri iya'on chirij kan ke'irik'a' jebel. Kan jebel ke'ich'ikiba' kan ri che' ch'ut kitza'n. y kan ke'ijik'a' jebel ri kiximibal.

³Roma kan janila xkewinaqir ri iwiy-imam. Kan xkekich'ek k'iy tzobaj winaqi' richin ri ruwach'ulew, y toq xketole' kan ri tinamit ri', ri iwiy-imam kan xkek'ase' chupan.

⁴Man tixibij-iwi' roma kan man jun bey chik xtiqasex iq'ij, ni man xkixk'ixbitej ta chik. Kan xtimestaj ri k'ix ri xiq'axaj toq man jani k'o k'iy ijuna'. Chuqa' kan xtimestaj toq xqasex iq'ij toq xixmalix kan koma ri iwachijil,

⁵roma yin kan xkixinchajij achi'el nuben jun achijlonel. Ja yin ri in k'iytisanel iwichin, y ri nubi' ja ri Jehová k'iytisanel richin ronojel. Ja yin ri in loq'olej ri xtikolon iwichin rix israelita, y ri winaqi' kan nikibij chuwe chi ja yin in Dios richin chijun ruwach'ulew.

⁶Yin Jehová kan xkixinwoyoj, achi'el ye'oyox ri ixoqi' ri e ya'on kan koma ri kachijil, achi'el jun ixjayilonel ri k'a xten na y ya'on kan, y janila poqonatajineq. Yin Jehová ri yibin.

⁷Kan xixinmalij kan juba', jak'a rik'in joyowanik xkixinmol chik jun bey.

⁸Toq yakatajineq janila woyowal kan man xixinto' ta, jak'a roma ri ajowabel ri k'o wik'in richin q'asen, xtinjoyowaj chik jun bey iwech. Yin Jehová ri nikolon iwichin ri yibin.

⁹Kan xinjikiba' k'a nutzij chiwech, achi'el xinjikiba' nutzij chuwech ri ánima Noé. Xinjikiba' chi ri ya' ri xmuqun ri ruwach'ulew chupan ri q'ij ri', kan man jun bey chik xtibanatej keri'. Y re wakami xinjikiba' nutzij iwik'in chi man jun bey chik xtipe woyowal chiwe, ni man jun bey chik xkixinch'olij.

¹⁰Stape' ri juyu' kan xkesilon, chuqa' ri ruwi' taq juyu' kan xketzaq-qa, jak'a yin kan man xtik'is ta ri wajowabal iwik'in. Chuqa' man xtik'is ta ri jikibel-tzij richin uxlanibel-k'u'x ri xinben iwik'in. Yin Jehová ri yijoyowan iwech ri yibin, ncha' ri Dios.

¹¹Rix winaqi' aj-Jerusalem kan janila ix tz'ilon, roma kan achi'el ixk'o pa jun nimalej kaq'iq'. Rix kan man jun nikuquban ik'u'x, jak'a yin kan xtinpaba' chik ri itinamit rik'in jebelej taq abej. Y ri tz'aq kan xtinya' pa ruwi' ri jebelej abej zafiro.

¹²Y kan rik'in k'a ri abej rubí xtinben ri rachoch ri chajinel ri k'o pa ruwi' ri tz'aq. Y ri pa taq kixikin chike ri okibel, xtinya' jalajoj kiwech abej ri yeyok'olin. Chijun k'a ri tz'aq ri rusutin-iwij xtinben kik'in jalajoj kiwech jebelej taq abej.

¹³Yin kan xkentijoj k'a konojel ri iwinaq; konojel k'a rije' xkek'ase' rik'in ch'uch'ujil.

¹⁴Kan pa ruwi' k'a ri ruchojmilal xkixtz'uye', y kan man xkixtz'ilox ta chik. Kan man xtixibij ta chik iwi', y kan man jun chik xtitikir xtijel iwik'in.

¹⁵Wi k'o ta jun ri xtiyakatej chiwij, man ja ta yin ri in taqayon-el. Y kan ja rix ri xkixch'akon chikij ri e etzelanel iwichin.

¹⁶Yin in banayon richin ri samajiy q'eqapueq richin nuxupuj ri q'aq', richin nuporoj ri q'eqapueq richin rusamajibal. Keri' chuqa' yin in banayon kichin ri achi'a' ri yekik'is ri winaqi'.

¹⁷Man jun kamisabel ri nik'achoj ta ri kan banon richin iwichin rix richin yixruk'is. Rix kan xtiben chike ri e etzelanel iwichin chi man xkeq'ajan ta chik chiwij. Jare' k'a ri xtiwichinaj kan rix ri ix nusamajel. Y rik'in k'a ri' xtiq'alajin chi rix kan ix choj. Yin Jehová ri yibin, nubij ri Dios.