Read Kaqchikel Isa 55 Bible Online

Isa 55 - Kaqchikel bible

Isa 55

¹Iwonojel rix ri janila chaqi'j ichi', kixanpe richin tiqumu' iya'. Y rix ri maneq iméro, kixanpe, kixloq'on y kixwa'. Kixanpe, kixloq'on stape' maneq iméro, y kan maneq rajel ri vino y ri leche.

²¿Achike roma nisech ri iméro chuwech ri xa man tijel ta? ¿Achike roma nisech ri rajel ri isamaj chuwech ri xa man jun nuk'en-pe chiwe? Wi rix kan xtinimaj nutzij, kan k'iy k'a ri xtitej ri janila jebel.

³Kixanpe wik'in y kan kiniwak'axaj jebel; kan kiniwak'axaj richin yixk'ase'. Yin kan xtinben jun jikibel-tzij iwik'in richin q'asen, richin xtinya' ajowabel chiwe, y xkik'oje' iwik'in richin jantape', achi'el xinben rik'in ri David.

⁴Roma yin kan xinya' ri David pa kiwi' ri tinamit richin ja rija' ri xok aj-raqen y tijonel pa kiwi' winaqi' richin ri ruwach'ulew, richin ja rija' ri xq'alajirisan chikiwech rije' ri nubanobal yin.

⁵Rix kan xke'iwoyoj tzobaj winaqi' kichin ri ruwach'ulew ri man jani iwetaman ta kiwech, y re winaqi' re' kan anineq k'a xkepe woma yin Jehová ri i-Dios, ri in Loq'olej ri xibanon chiwe chi nik'oje' janila iruwaq'ijaj.

⁶Kinikanoj k'a yin rokik k'a yiniwil na, kan kiniwoyoj rokik naqaj ink'o-wi chiwe.

⁷Ri winaqi' ri janila e itzel kan tikiya' kan ri itzel taq kibanobal; chuqa' ri kamisanela' kan tikiya' kan ri itzel kich'obonik. Kan titzolej k'a pe kik'u'x wik'in yin Jehová, y yin kan xtinjoyowaj kiwech y ninkuy ri kimak.

⁸Roma ri nuch'obonik man achi'el ta ri ich'obonik rix; y ri ibey rix man achi'el ta ri nubey yin. Yin Jehová ri yibin.

⁹Achi'el k'a ri kaj ri k'o más nej chire ri ruwach'ulew, kan keri' k'a ri nubey, kan más nim chuwech ri ibey rix, y ri nuch'obonik yin kan más nim chuwech ri ich'obonik rix.

¹⁰Ri job y ri sutz' yeqaqa-pe chikaj richin nokiya'aj ri ulew y nikiben richin ri tiko'n chi yebos-pe y yewachin, richin k'o chik jun bey rija'tz ri xtikon-qa, y kan xkerutzuq ri ruwinaq. Y chirij ri' ri ya' nitzolin chik jun bey chikaj.

¹¹Keri' chuqa' ri ch'abel ri ninbij yin, xa kan man nitzolin ta choj keri', y man jun ta samaj nuben, jak'a kan nuben ri ninwajo' yin y kan nuben ri ninbij chire.

¹²Keri' k'a rix kan xkixel-pe ri chiri' pa Babilonia rik'in janila kikoten. Kan rik'in uxlanibel-k'u'x xkixtzolin-pe chupan ri itinamit. Toq xkixq'ax pa kiwi' ri juyu' y ri ruwi' taq juyu', kan janila kikoten xtik'oje', achi'el ri juyu' y ri ruwi' taq juyu' xkebixan chiwech, y konojel ri che' ri ek'o pa juyu' kan xtikipaq'apa' ri kiq'a'.

¹³Pa ruk'exel yebek'iy-pe ruxulu-kiej, kan xkebek'iy-pe ri che' k'isis. Chuqa' pa ruk'exel xkebek'iy-pe ri k'ix, kan xkebek'iy-pe ri q'echa'. Y re' kan xtunimirisaj ri nubi' yin Jehová, y chuqa' jun retal ri nubi' ri kan man jun bey xtik'is, nicha' ri Dios.