Read Kaqchikel Isa 56 Bible Online

Isa 56 - Kaqchikel bible

Isa 56

¹Kere' k'a nubij ri Jehová: Kan ronojel tibana' pa ruchojmilal y kan ja ri utz ri tibana', roma ri kolotajik kan naqaj chik k'o-wi, y kan xtink'ut ri wuchuq'a' richin kolotajik.

²Kan utz ruwa-ruq'ij ri wineq ri nibanon ri', y kan nuchajij ri q'ij richin uxlanenri'il, y man nuben ta chire chi maneq ta rejqalen y kan nuq'et-ri' richin nuben ri etzelal.

³Wi k'o jun ri man aj wawe' ta, y nujech-ri' chuwe yin, man tuya' q'ij chi rija' nubij chi ja yin xich'aron chi'ikojol rix. Chuqa' man tuya' q'ij chi ri eunuco nubij chi rija' achi'el jun che' chaqi'j.

⁴Yin ninjikiba' nutzij chi wi ri eunuco nikichajij ri q'ij richin uxlanenri'il y kan nikiben ri ninbij yin, y kan nikitaqej ri ya'on-tzij ri ninben kik'in,

⁵wi keri', yin kan k'o ri más utz xtinya' chike ke chuwech kalk'ual. Kan xtinya' q'ij richin ri kibi' kan xtitz'ibex kan richin q'asen, chupan ri wachoch, chirij ri tz'aq, y kan man jun xtiyojo-el chiri'. Y re' xtinben kan richin tibe-q'ij tibe-seq.

⁶Wi ri man e iwinaq ta xkinkitzeqelibej richin yinkisamajij yin, y rije' xkinkajo' yin richin nikiya' nuq'ij, y wi nikichajij ri q'ij richin uxlanenri'il richin man yemakun ta, wi nikichajij ri jikibel-tzij ri xkiben wik'in yin,

⁷wi nikiben ronojel re', yin kan xkenk'en-pe chupan ri juyu' Sión. Kan xtinben chike richin xkekikot chupan ri wachoch richin niban ch'owen wik'in. Ri poron chikopi' y ri kamelabel ri xkekisuj chuwe kan xtink'ul chikiwech, roma chikikojol ri tinamit, ri wachoch kan xtubini'aj: Jay akuchi niban-wi ch'owen rik'in ri Dios.

⁸Yin Jehová ri ink'o pa ruwi' ronojel, y ja yin xkimolon kichi' konojel ri aj-Israel ri xa kitalun-ki'. Y ninjikiba' nutzij chi xkenmol chik ch'aqa' winaqi' kik'in.

⁹Kixanpe rix chikopi' ri ixk'o pa k'echelaj, kixanpe rix chikopi' ri ixk'o pa taq juyu', richin ye'ik'is-el konojel.

¹⁰Rix ix chajinela' pa kiwi' ri israelita, ri ixk'o pa ruwi' ri tz'aq, rix ix moyirineq. Chi'iwonojel rix xa kan man jun nitz'et. Iwonojel rix ix achi'el tz'i' ri yechajin, jak'a man yixtikir ta yixba'on. Xa kan choj ixk'o keri', kan jebel nina' y xaxe waran niben.

¹¹Rix ix achi'el tz'i' ri janila e mum, ri kan man jun bey ninoj ri ipan. Rix ix achi'el yuq'unela' ri kan man jun niq'ax chiwech. Iwonojel rix xa nich'er-el-iwi', y xa chi'ijujunal nikanoj ri janipe' nich'ek.

¹²Iwonojel nisuj vino chike ri ch'aqa' chik k'a toq yixq'aber na. Y ri jun chik q'ij chuqa' keri' xtiben, y rik'in juba' más k'ayew ri xtiben.