Read Kaqchikel Isa 57 Bible Online

Isa 57 - Kaqchikel bible

Isa 57

¹Ri winaqi' ri kan ronojel nikiben pa ruchojmilal, toq yeken-el, xa man jun niniman chike. Chuqa' yeken ri winaqi' ri janila e utz, jak'a man jun achoq chuwech ta niq'ax-wi chi xelesex-el ruk'aslen richin man nutej ta chik poqon chuwech re ruwach'ulew.

²Toq yeken ri winaqi' ri kan yebiyin chupan ri ruchojmilal, kan xkek'oje' chupan ri uxlanen, y kan xke'uxlan k'a chupan ri jul richin muqbel.

³Jak'a rix kixanpe kere' richin niwak'axaj nuch'abel. Rix kan xinimalij kan, y xa kik'in aj-itza' yixbe-wi.

⁴¿Achoq chirij k'a yixtze'en-wi rix? ¿Achoq chirij kami yixmerun-wi rix? ¿Y achoq chuwech nik'ut-wi iwaq'? Rix alk'ualaxela' ri man ix nimey ta tzij; rix ix jun sol winaqi' ri janila nitz'uk-tzij.

⁵Rix ri yixk'oje' kik'in ixoqi' ri man iwixjayil ta, y keri' niben chuxe' xabachike nima'q taq che'. Chuqa' rix ri ye'isuj iwalk'ual chiri' pa taq taq'aj, y chukojol ri nima'q taq abej.

⁶Rix xa ja ri taq abej e liq', e liq' ri ek'o chiri', ri niya' kiq'ij. Roma ri' chiri' niben-wi ri kamelabel, xa chikij rije' niq'ej-wi ri vino richin nisuj. Chuqa' nisuj ri jalajoj ruwech ixin chikiwech. ¿Man xtinya' ta kami ruk'ayewal pan iwi' roma re banobel re'?

⁷Kan k'a pa ruwi' ri juyu' ri k'o más pa jotol, yixbe-wi richin nibesuju' kamelabel, y richin yixk'oje' kik'in ixoqi' ri man iwixjayil ta.

⁸Chirij k'a ri okibel richin ri iwachoch, ye'iya-wi kiwachibel dios ri kan man e ruk'amon ta. Y yin kan xinimalij kan. Rix kan xipek ri iq'u' richin xixok-apo chupan ri ich'at. Chuqa' xipek chik ruchi' ri iq'u' ri k'o juk'an chik ruchi' ri ich'at, richin xijikiba-itzij kik'in winaqi' achoq kik'in xiwajo' xixk'oje-wi.

⁹Rix kan xiya-el aceite y jebelej aq'om chiwij, y k'ari' xixbe rik'in ri dios Mélec richin xiya' ruq'ij. Xe'iteq-el nej ri itaqonela' richin nikikanoj pixabanik; y jujun chike rije' xe'apon k'a akuchi e muqun-wi ri kaminaqi'.

¹⁰Kan xixkos yan roma janila k'iy binen ri ibanon, y kan man jun bey ximalij ta qa ik'u'x. Man rik'in ri' xa kan xk'oje' chik el más iwuchuq'a', roma ri' xitej iq'ij richin xixbe chik.

¹¹¿Achike k'a dios ri' ri achoq chuwech más nixibij-iwi' richin niya' ruq'ij? Roma ri' kan xinimalij kan yin jumul. Xinimestaj kan yin, y man yinoqaqa ta chik chi'ik'u'x. Toq rix man niya' ta nuq'ij, yin kan man jun ninbij, y ninben chi man yixintz'et ta.

¹²Jak'a yin kan xtinq'alajirisaj ri ibanobal ri kan nich'ob rix chi kan jebel, roma re banobel re' kan man jun nik'atzin-wi.

¹³Wakami k'a toq xkixsik'in richin nik'utuj to'onik, ri wachibel man xkixkito' ta. Jak'a rije' xa xkeruk'uaj kaq'iq', y kan xkek'is. Jak'a ri winaqi' ri kikuquban kik'u'x wik'in yin, kan xtikichinaj ri ruwach'ulew, y kan xkek'ase' chupan ri juyu' ri akuchi ink'o-wi yin, ncha' ri Dios.

¹⁴Y xtak'axatej re ch'abel re': Tiban jun choj laj bey, y tijosq'ix jebel richin niq'ax-pe ri nutinamit chupan.

¹⁵K'ari' xch'on ri k'o nim ruq'ij, ri k'o chila' chikaj, y rija' rubini'an Loq'olej. Y rija' nubij: Ri akuchi ink'o-wi yin kan janila nej, y kan janila loq'olej. Jak'a chuqa' ink'o rik'in ri janila ruqasan-ri', y poqonatajineq, richin ninya' ruchuq'a' ri ránima ri kan janila k'ayewatajineq.

¹⁶Man chaq xtinya' ta rejqal ri nutinamit, ni man chaq xtinben ta oyowal kik'in ronojel mul. Wi keri' xtinben, xa xtimayamo-qa ri kánima ri winaqi' ri e nuk'iytisan yin.

¹⁷Roma ri itzel taq kibanobal xinoyower kik'in, y kan xenya' pa tijoj-poqonal. Kan xinjech'ej-el-wi' kik'in, jak'a rije' xa xeyakatej chuwij, y xkiben ri achike xkajo' rije'.

¹⁸Stape' kan nintz'et yan k'a ri kibanobal, jak'a yin xa xtinch'ajch'ojirisaj, y xkenyuqej chikiq'a', y kan xtinkuquba' kik'u'x ri yebison.

¹⁹Kan xtinben chike chi xketze'en. Kan xtinya' uxlanen kik'in ri ek'o nej; chuqa' kan xtinya' uxlanen kik'in ri ek'o naqaj. Y kan xtinwaq'omaj ri nutinamit. Yin Jehová ri yibin.

²⁰Jak'a ri e itzel taq winaqi' kan man ye'uxlan ta, achi'el toq nuben ri palou: Nibolqo't ruwi', y kan man nitane' ta qa. Y ri nuk'eq-pe ri ruwi' ri ya', xa ja ri ch'abeq y ronojel tz'il, ncha' ri Dios.

²¹Roma ri' ri nu-Dios nubij chi ri winaqi' ri man nikitzeqelibej ta rija', kan maneq uxlanibel-k'u'x kik'in.