Read Kaqchikel Isa 58 Bible Online

Isa 58 - Kaqchikel bible

Isa 58

¹Ri Jehová xubij k'a chire ri Isaías: Kan kow k'a kach'on, y man kakos richin yatane-qa. Kan kow k'a kach'on achi'el toq niq'ajan jun trompeta, y tabij chire ri nutinamit Judá, chi kan janila itzel ri kibanobal. Y tabij chuqa' chike chi janila kimak ri yekiben ri awinaq.

²Kan q'ij-q'ij k'a yinkikanoj, y nikiben chi nikajo' niketamaj ri nubey, achi'el xa ta e jun tinamit ri nikiben ri utz, y kan nikiben ronojel pa ruchojmilal. Nikik'utuj pixa' chuwe ri kan e choj, y kan nikik'ut chi yekikot richin yejel-pe wik'in.

³Y man rik'in ri' nikik'utuj achike roma yemewayin, y yin man yentz'et ta. Nikik'utuj achike roma nikiya-ki' pa k'ayew, y yin xa man yentz'et ta. Jak'a yin Jehová ninbij chike: ¿Achike roma nibij keri', toq xa niben ri achike niqa' chiwech chupan ri q'ij richin meway? Y chuqa' niben chike ri isamajela' chi janila yesamej chupan ri q'ij ri'.

⁴Ri q'ij toq yixmewayin, xa niq'axaj rik'in oyowalen y ch'ayonik. Y kan yixsokon rik'in ri iq'a'. Rix man ruk'amon ta chi chaq keri' niben chupan ri q'ij richin meway, y niwoyobej chi yin yixinwak'axaj.

⁵Man keri' ta rubanik ri meway ri niqa' chinuwech yin. Man keri' ta ri rubanik ri q'ij toq rix niqasaj-iwi' chinuwech. Man ninwajo' ta chi rix nilukuba-iwi' chinuwech, achi'el nuben jun q'ayis pop nipa'e' chik el jun bey toq xik'o yan qa ri kaq'iq'. Niben ich'at qiriqoj y yixkotz'e' pa chaj, y xa chire ri' nibij q'ij richin meway. ¿Kan niqa' kami chinuwech yin re'?

⁶Man keri' ta ri rubanik. Ri meway ri niqa' chinuwech yin, chi ke'iwisq'opej ri e ximil y xa man jun kimak. Chuqa' ke'iwisq'opej-el ri e ijitz'on pa samaj, y tiya-el q'ij chi ketotej-el ri winaqi' ri ek'o pa latz'. Y man chaq ke'iya' pa poqon ri winaqi'.

⁷Chuqa' kan tiya' ri iway chike ri maneq kiway, y kan tik'ulu' pan iwachoch ri maneq rachoch roma man iwinaq ta. Ri maneq kitziaq, kan tiya' kitziaq, y man tiya' kan richin ye'ito' ri iwach'alal.

⁸Keri' ri ik'aslen kan xtiyik'lun k'a achi'el toq nel-pe ri q'ij. Y ri iq'axomal kan chi'anin xtaq'omatej. Ri ruchojmilal kan xtok uk'uey iwichin y yin Jehová kan xkik'oje' chi'ikojol richin yixinchajij.

⁹K'ari' toq xkixinwoyoj, yin kan xtink'uluba-pe ri ich'abel. Toq xkixsik'in richin nik'utuj to'onik, yin xkik'oje' iwik'in. Jak'a kan nik'atzin chi man niya' ta chik iwi' pa poqon. Chuqa' man ke'iyoq' ri ch'aqa' chik winaqi', y man ke'iq'abaj tzij chikij,

¹⁰Kan ke'iwilij ri maneq kiway, y ke'ito' ri e poqonatajineq. Wi xtiben ronojel re', kan xtel k'a utz itzijol, achi'el ri saqil ri napon pa q'equ'm, y ri q'equ'm ri' kan xtuben achi'el ri pa nik'aj-q'ij.

¹¹Yin xkixinyuqej beneq ruwech, y stape' rix ix beneq pa tz'iran ruwach'ulew, kan xtinya' iway pa ruk'iyal. Chuqa' kan xtinya' jebel iwuchuq'a', y kan xtinben chiwe achi'el jun qejoj ri jebel ya'an, chuqa' achi'el jun alaxibel-ya' akuchi jantape' k'o ya'.

¹²Ri iwinaq xtikiyek chik el jun bey ri tinamit ri e wulatejineq kan. Xtiben-qa ri ruxe' ri kan e wulatejineq kan ojer. Y kan xtubini'aj: Tinamit ri Chojmirisey Richin ri Wulatejineq.

¹³Kan tiya' rejqalen ri q'ij richin uxlanen, y man tiben ri niqa' chiwech rix roma ri q'ij ri' ch'aron chuwe yin. Kan tibana' chire chi q'ij richin kikoten, roma q'ij ri kan ch'aron chuwe yin Jehová, y kan k'o ruq'ij. Man kixel-el richin yixbe pa taq k'ayij ó pa taq loq'oj. Kan tiya' rejqalen, y man tiben ri nik'atzin-qa chiwe rix. Chuqa' man chaq ke'ibila' ch'abel ri man e ruk'amon ta.

¹⁴Wi keri' xtiben, kan xtiwil kikoten wik'in yin, y kan xtinben chiwe richin chi'anin xkixbe pa jotol chupan ri iruwach'ulew, y rix kan xkixkikot chupan ri iruwach'ulew ri xiwichinaj kan, ri ix rijatzul kan ri Jacob. Yin Jehová ri yibin, xcha'.