Read Kaqchikel Isa 59 Bible Online

Isa 59 - Kaqchikel bible

Isa 59

¹Ri nimalej ruchuq'a' ri Jehová man k'isineq ta qa richin yixrukol, ni ri rak'axabal man ta nrak'axaj toq yixch'on rik'in.

²Jak'a ri itzel taq ibanobal ri ye'iben, jari' xbanon chiwe chi xixch'aratej rik'in ri Dios. Y ri imak xbanon richin chi rija' man nitikir ta yixrutz'et, y man yixrak'axaj ta.

³Rix xa xitz'ilobisaj ri iq'a' rik'in kik' kichin winaqi' ri xa man jun kimak. Chuqa' kan itz'ilobisan ri ruwi' taq iq'a' rik'in ri itzel taq ibanobal. Rik'in ri ichi' ye'iben tz'ukun taq tzij, y rik'in ri iwaq' ye'ibij itzel taq ch'abel.

⁴Man jun chiwe rix ri man pa ruchojmilal ta nibesujun, ni man jun ri pa ruchojmilal nibe rik'in q'atbel-tzij. Kan más k'a nikuquba' ik'u'x rik'in tz'ukuj taq tzij, y ri ich'abel man e qitzij ta. Nitik etzelal, y niwachij itzel taq banobel.

⁵Ri ich'obonik rix achi'el xa ta ye'ijupuba' saqmolo' kichin kumatzi'. Wi k'o ta jun nitijo ri saqmolo' ri' kan xtiken. Y wi k'o ta jun nipaxin, kan yebe'el-pe kumatzi' chupan ri kan yekamisan. Chuqa' ri ibanobal achi'el xa ta jun rukem om.

⁶Jak'a rik'in ri kem ri' man utz ta niben tzieq chire, y man jun nuwiq ri' rik'in ri tzieq ri'. Ri ibanobal kan ruyon ri etzelal, y ri samaj ri ye'iben kan xaxe banoy taq ch'a'oj.

⁷Kan anineq yixbe chubanik etzelal. Kan anineq yixbe chi relesaxik ri ruk'aslen ri xa man jun rumak. Ri ich'obonik xaxe richin ye'iben ri etzelal, y ri akuchi ri yixq'ax-wi, kan ronojel niyoj y niwulaj kan.

⁸Man iwetaman ta k'a achike ri' ri bey richin uxlanibel-k'u'x, y ri ibanobal kan maneq ruchojmilal. Ri bey ri itzeqeliben, xa kan e xotoxeq, y ri xketzeqeliben ri bey ri' kan man xtikil ta uxlanibel-k'u'x.

⁹Roma ri' man jun nibanatej pa ruchojmilal iwik'in rix. Y chuqa' kan man xtik'ul ta ri ruchojmilal. Ri iwoyoben ja ri saqil, jak'a xa ja ri q'equ'm ri xoqaqa iwik'in.

¹⁰Kan yixmaqmo'x achi'el nikiben ri moyi'. Kan ixibin-iwi' yixbiyin, achi'el xa man yixtzu'un ta. Kan nipajk'ila' iwaqen ri pa nik'aj-q'ij, achi'el xa ja ta ri chi'aq'a' ri yixbiyin. Ixk'o pa q'equ'm, achi'el xa ta ix kaminaqi' chik.

¹¹Rix kan yixjilon achi'el nikiben ri oso, chuqa' yixoq' achi'el nikiben ri taq paloma. Kan iwoyoben ri ruchojmilal, y xa maneq. Chuqa' kan iwoyoben ri kolotajik, y xa k'a nej k'o-wi, xcha'.

¹²Ri winaqi' nikibij: Roj kan janila oj makuwineq chawech rat Jehová, roma ri' yojaya' pa k'ayew. Ri qamak kan jantape' k'o chiqawech roj, y kan niqaya' chiqij.

¹³Kan janila itzel xqaben chawe rat Jehová, y kan xqach'er-el-qi' awik'in. Xa xojch'on rik'in q'oloj y yakatajinenri'il. Kan xeqatz'ila' ch'aqa' chik winaqi', y xa xeqabij ch'abel ri xa e tz'ukun y man e ruk'amon ta.

¹⁴Roma ri' ri ruchojmilal xa kan nej k'o-wi chiqe roj, y ri qitzij xa xsach kan pa taq bey, y ri chojmilal xa xk'oje' kan.

¹⁵Ri qitzij xa maneq chik qik'in, y ri nujech'ej kan ri' chubanik ri etzelal xa kan ruyon rija' nukanoj rukamik, yecha'. Ri Jehová xutz'et ronojel re', y kan man xqa' ta chuwech, roma maneq ruchojmilal.

¹⁶Toq xutz'et chi man jun nibanon ri ruchojmilal, Ri Dios kan janila xumey-qa. K'ari' rija' xuya' ruchuq'a' richin xuben pa ruchojmilal, richin xril ri ch'akonik.

¹⁷Ri Dios xukusaj ri ruchojmilal y ri ruchuq'a' achi'el nikusex ri kamisabel richin yerukol ri choj kik'aslen y nuya' rutojbalil pa kiwi' ri man utz ta kik'aslen.

¹⁸Xa kan chikijujunal xtuya' rutojbalil pa kiwi' achi'el ri kibanobal. Kan xtiyakatej royowal chikij ri e etzelanel richin, y kan xtuya' ruk'ayewal pa kiwi', stape' ek'o nej chuchi' ri palou.

¹⁹Pa kiwi' konojel ri ek'o nej xtapon-wi ri rutojbalil: Nitiker-pe pa relebel-q'ij y napon k'a pa qajbel-q'ij, richin tiketamaj konojel winaqi' chi ri Jehová kan k'o-wi ruq'ij-ruk'ojlen. Roma rija' xtipe kan rik'in uchuq'a', kan achi'el nibiyin jun nimalej raqen-ya' ri nimon-pe rik'in jun nimalej kaq'iq' richin ri Jehová.

²⁰Chupan ri q'ij ri' ri kolonel xtipe k'a pa tinamit Sión, y konojel ri nuwinaq israelita xtikitzolij-ki' chikij. Ri Jehová kan keri' ri xusuj.

²¹Pa ruwi' ronojel re' ri Jehová xubij: Yin kan xtinben jun jikibel-tzij iwik'in, chi ri nu-Espíritu kan man xtel ta chik iwik'in rix, y ri nutijonik ri ik'ulun, kan man xtimestaj ta kan, y ni ta kik'in ri iwijatzul richin tibe-q'ij tibe-seq, xcha'.