Read Kaqchikel Isa 6 Bible Online

Isa 6 - Kaqchikel bible

Isa 6

¹Chupan k'a ri juna' toq xken ri rey Ozías, jari' toq yin xintz'et chupan jun achi'el achik' chi ri Jehová tz'uyul pa ruwi' ri rutz'uyubal ri k'o el pa jotol y janila nim. Y ri ruchi' ri rutziaq runojisan ri rachoch.

²Y pa ruwi-el rija' ek'o k'a serafín,*f1* y chikijujunal rije' k'o k'a waqi' kixik'. Rik'in ri ka'i' kixik' kitz'apen ri kipalej; rik'in ri ka'i' kitz'apen ri kaqen, y rik'in ri ka'i' chik kixik' yexik'an.

³Y chikijujunal rije' yesik'in y nikibila': Loq'olej, loq'olej, loq'olej Jehová k'iytisanel richin ronojel. Chijun ri ruwach'ulew nojineq rik'in ri ruk'ojlemal, yecha'.

⁴Toq xkibij re ch'abel re' ri ruchi' ri rachoch ri Dios kan xesilon, y ri jay ri' xnoj rik'in sib.

⁵Jari' toq yin xinbij: ¡Wakami yin yiken! Roma ronojel ri ninbij, man e ch'ajch'oj ta, chuqa' chikikojol winaqi' ri man ch'ajch'oj ta ri kich'abel ink'o-wi. Man rik'in ri' kan xintz'et rik'in runaq'-nuwech ri rey, ri Jehová k'iytisanel richin ronojel, xicha'.

⁶Y kan jari' jun chike ri serafín rik'in jun chapbel-q'aq' xrelesaj jun racheq-q'aq' chupan ri porobel, y xuya-el chupan ri jun chik ruq'a'. K'ari' xapon wik'in,

⁷y xuya-apo ri q'aq' ri' chi nuchi', y xubij chuwe: Re q'aq' re' xuneq ri achi'. Y re' xuben chi kan xkuyutej k'a ronojel ri amak, richin kan man xtawejqalej ta chik, xcha'.

⁸Chirij re' k'ari' xinwak'axaj ri ruch'abel ri Jehová ri nubij: ¿Achike kami ri xtiqateq-el? ¿Achike k'a xtok qataqo'n?, xcha'. Y yin xinbij chi jare' ink'o wawe', y chi kirutaqa-el yin.

⁹K'ari' ri Jehová xubij chuwe: Kabiyin y tabebij chike ri awinaq re ch'abel re': Stape' janila k'iy bey xtiwak'axaj ri nuch'abel, xa kan man jun xtiq'ax chiwech. Stape' janila k'iy bey xtitz'et ri nubanobal, xa kan man xtiq'ax ta chiwech ri nitz'et.

¹⁰Y rat Isaías, kan tabana' chike re awinaq re' richin kan xtikikowirisaj ri kánima. Kan tabana' chike richin xketokonir. Chuqa' kan xkemoyir richin man xtikitz'et ta chik. Roma, man ninwajo' ta chi rije' xtikitz'et ri nubanobal, y chuqa' xtikak'axaj ri nuch'abel, y xkinkitzeqelibej ta chik. Y man ninwajo' ta chi xkenk'achojirisaj, xcha'.

¹¹Y yin xink'utuj chire ri janipe' q'ij xtiyaloj re ruk'ayewal re'. Y rija' xubij chuwe: K'a ja toq ri tinamit xtitole' kan, y kan man jun chik kajaw: K'a ja toq man jun chik wineq chupan ri taq jay, y toq ri ruwach'ulew richin tiko'n xtok kan tz'iran:

¹²K'a ja toq yin xtinben richin xke'uk'uex-el nej ri winaqi', k'a ja toq xtitole' kan ri kiruwach'ulew.

¹³Y stape' k'a xtik'oje' kan jun chire ri lajuj chike ri winaqi' ri', chuqa' kan xkenwelesaj-el. Jak'a achi'el toq yechoy-el ri paten-che', xa kan k'a yek'oje' kan ri kuta'm. Y keri' k'a xtibek'uluwachitej kik'in ri awinaq israelita. Jak'a xa xkek'oje' kan achi'el jun rukuta'm che'.