Read Kaqchikel Isa 60 Bible Online

Isa 60 - Kaqchikel bible

Isa 60

¹Ri Jehová nubij: Kixyakatej k'a rix aj-Sión, y kan xkixkikot roma ri wutzil kan xtiyik'lun pan iwi'. Chuqa' kan xto'alex ri nuk'ojlen yin Jehová pan iwi'.

²Roma pa kiwi' ri ch'aqa' chik ruwach'ulew k'o jun nimalej q'equ'm y kan xutz'apej kiwi'. Jak'a chupan ri q'ij ri', kan ja yin ri xkik'oje' iwik'in; y xtitz'etetej ri nuk'ojlen.

³Konojel k'a ri ruwach'ulew xkepe richin ye'ok'oje' chupan ri isaqil. Chuqa' ri ch'aqa' chik rey richin ri ruwach'ulew xkepe, richin xke'ok'oje' junan iwik'in chupan ri q'ij ri'.

⁴K'ulan k'a xkixtzu'un y xke'itz'et konojel ri xtibekimolo-ki' iwik'in. Xkepe k'a ri iwinaq stape' janila nej ek'o-wi, y kan xkech'elex k'a pe koma ri man e iwinaq ta.

⁵Y toq xtitz'et ronojel re', kan xtitze'en k'a iwech, ri iwánima kan janila k'a xtikikot, roma kan xtikik'en-pe chiwe ronojel beyomel kichin ri ruwach'ulew, y re' xtipe ri k'a juk'an chik ruchi' taq ya'.

⁶Xkepe k'a pa cholaj ri camello ri kik'amon-pe ri janila chi beyomel. Xkepe k'a pa ruwach'ulew Madián y pan Efá. Chuqa' xkepe k'a konojel ri aj-Sabá. Xtikik'en-pe janila chi q'anapueq y pom, y kan xtikibixaj bix richin nikiya' nuq'ij yin Jehová.

⁷Konojel k'a tzobaj awej richin ri ruwach'ulew Quedar xke'ok iwichin, y ri karne'l richin ri tinamit Nebaiot kan xkek'oje' chiri' richin ye'ikusaj, richin nisuj chuwe pa ruwi' ri porobel. Y kan ninimirisaj ri nuq'ij-nuk'ojlen.

⁸¿Achike re' ri yexik'an achi'el sutz', y achi'el paloma richin yebe pa taq kisok?

⁹Ja ri barco ri e peteneq roma ja yin xinoyon kichin. Pa nabey e peteneq ri barco richin Tarsis, y e ruk'amon-pe ri iwinaq ri yepe nej. Kik'amon-pe q'anapueq y saqipueq richin nokiya' chuwe yin Jehová ri i-Dios, roma yin ri in loq'olej ri ink'o pan iwi' ri xtinimirisan iq'ij.

¹⁰Xkepe ch'aqa' chik winaqi' richin xtikipaba' chik jun bey ri tz'aq richin ri Jerusalem, y ri e ki-rey kan xkixkilij. Stape' chupan ri woyowal kan xinwulaj ri itinamit, jak'a re wakami rik'in ri wajowabal kan xtinjoyowaj iwech.

¹¹Ri okibel richin ri tinamit kan jantape' k'a xkejaqe'. Kan man xtitz'apex ta chi paq'ij chi chaq'a', richin chi yetikir nikik'en-pe beyomel kichin ch'aqa' chik tzobaj winaqi' richin ri ruwach'ulew. Y ri ki-rey rije' xkek'amer-pe roma rije' xech'akatej,

¹²roma ri ruwach'ulew ri man xkixkilij ta, xa xkek'is, y ri kajawaren xkek'is jumul.

¹³Ronojel ri beyomel richin Líbano xtik'amer-pe iwik'in rix: Ri jalajoj kiwech chej y ri k'isis, richin niwiq rupan ri wachoch akuchi rix niya-wi nuq'ij.

¹⁴Kan janila xtikiqasaj-ki' chiwech ri winaqi' ri xetz'ilon iwichin, y konojel k'a ri xe'etzelan iwichin kan xkexuke' chiwech. Kan xtikibij chi ri itinamit Sión jari' ri nutinamit yin, ri in loq'olej richin ri Israel.

¹⁵Stape' xixmalix, xixetzelex kan, y kan xmulun kik'u'x chiwij, jak'a ri chiwech-apo, yin xtinben chiwe chi xtikinimirisaj iq'ij, y kan janila xkixkikot richin jantape'.

¹⁶Ri ch'aqa' chik winaqi' richin ri ruwach'ulew kan xtikiya' ri jebelej taq wey chiwe. Y kan xkixchajix achi'el niban kik'in ri rey. Y chupan ri q'ij ri' xtiwetamaj chi ja yin Jehová; ri yixkolon rix, Dios ri kan k'o nimalej ruchuq'a' pan iwi' rix.

¹⁷Pa ruk'exel ri q'enq'oj-pueq, xtinya' q'anapueq chiwe, pa ruk'exel ri q'eqapueq, ja ri saqipueq, pa ruk'exel ri che', ja ri q'enq'oj-pueq, y pa ruk'exel ri abej, ja ri q'eqapueq. Y ronojel re' xtinben, roma xtik'oje' uxlanibel-k'u'x iwik'in, y ja ri ruchojmilal ri xtuk'uan iwichin.

¹⁸Chupan ri iruwach'ulew man xtibebanatej ta chik kamik; ni man jun bey chik xtipe wululen. Xa kan xtibij chike ri tz'aq richin ri itinamit, chi rije' e achi'el ri kolonel, y ri chiri' pa taq okibel niya' nuq'ij yin.

¹⁹Man xtik'atzin ta chik chi ri q'ij yixrusaqirisaj ri paq'ij, ni ri ik' yixrusaqirisaj ta chaq'a', roma ja yin ri xkisaqirisan ri ibey richin tibe-q'ij tibe-seq. Y xtinya' ri nuk'ojlen pan iwi' rix.

²⁰Roma yin Jehová xkisaqirisan iwichin richin jantape', roma ri' ri q'ij richin bis kan xtik'is. Y keri' rix man xkixbe ta qa pa xulan, achi'el ri q'ij man jun bey chik xtitzaq pan iwi', y chuqa' ri ik' man jun bey chik xtik'is ri ruchuq'a'.

²¹Chupan ri q'ij ri' konojel k'a ri iwinaq kan choj xtikiben, y xtikichinaj kan ri kulew richin q'asen, roma rix ix jun banobel ri kan ja yin in banayon, achi'el jun che' ri nutikon-qa. Y rix kan xtiya' nuk'ojlen.

²²Chukojol ri nima'q taq tzobaj iwichin rix, ri tzobaj ri janila ko'ol ok, kan janila xkek'iyer. Y re tzobaj re' kan xke'ok k'a nimalej taq tzobaj winaqi'. Ja yin Jehová. Yin xtinben chi xtibanatej chi'anin y pa ruq'ijul, ncha'.