Read Kaqchikel Isa 61 Bible Online

Isa 61 - Kaqchikel bible

Isa 61

¹Ri uchuq'a' richin ri Jehová ri wajaw kan k'o pa nuwi' yin; ri Jehová k'iytisanel richin ronojel kan xirucha' k'a yin. Kan xiruteq k'a pe richin ninya' utzilej rutzijol chike ri e k'ayewatajineq, richin ninya' ch'uch'ujil pa taq kánima ri niq'axon kánima, achi'el naq'omex jun sokotajik, richin yetotej ri e ximil, y ri ek'o pa cárcel kan xketotej k'a el.

²Xiruteq-pe richin ninq'alajirisaj ri juna' richin ri rutzil ri Jehová, ri q'ij toq rija' xtuya' ruk'exel chike ri e etzelanel richin. Xiruteq-pe richin ninkuquba' kik'u'x ri ek'o pa bis.

³Xiruteq-pe kik'in ri winaqi' aj-Sión ri ek'o pa bis, richin xtik'oje' kikoten kik'in, achi'el toq niya'ox jun corona pa ruk'exel ri chaj ri k'o pa kiwi'. Pa ruk'exel ri bis xtik'oje' jubulej taq aq'om, y pa ruk'exel nikikusaj tzieq richin bis, nikikusaj tzieq richin kikoten. Ri winaqi' ri' kan jantape' xtikiben pa ruchojmilal, roma rije' e achi'el jun paten-che' ri tikon roma ri Jehová, ri man niq'ochotej ta roma ri kaq'iq'. Y ri winaqi' ri' e banon richin nikiya' ruq'ij rija'.

⁴Kan xkepabex chik ri tz'aq ri e banon rik'in abej; kan xtiyak chik el ri kan wulatejineq kan. Ri tinamit ri wuluwik kibanon, xa kan xkepabex chik.

⁵Winaqi' ri e aj juk'an chik xtikiben utzil richin xkekiyuq'uj ri kikarne'l ri aj-Sión. Chuqa' xtikiben utzil richin xtikisamajij ri kulew y ri kitiko'n richin uva.

⁶Ri aj-Sión kan xtikibini'aj k'a samajel y sacerdote richin ri Jehová. Kan xkewa' k'a rik'in ri jebelej taq wey kichin ri ch'aqa' chik ruwach'ulew, y rik'in k'a ri kibeyomel rije' xtikilij-wi-ki'.

⁷Ri Dios nubij: Stape' ri nutinamit kan janila rutijon poqon y kan janila k'ixbilal ruk'ulun; jak'a re wakami rije' xtikichinaj ka'i' mul chire ri ulew. K'ari' rije' xtik'oje' uchuq'a' kik'in, y janila xkekikot richin q'asen.

⁸Roma yin Jehová kan niqa' chinuwech ri ruchojmilal, y kan ninwetzelaj ri eleq' y ri kamik. Roma yin kan jantape' ninben ri ninsuj, kan xtinya' k'a rajel ruk'exel chike roma ri utz kibanobal. Y xtinben jun jikibel-tzij kik'in richin jantape'.

⁹Ri kijatzul kan xtinimirisex k'a kiq'ij chikikojol ri ch'aqa' chik tzobaj winaqi' richin ri ruwach'ulew. Konojel k'a ri xketz'eton kichin xtikinimaj k'a chi rije' kan kik'ulun urtisanik pa nuq'a' yin. Kere' nubij ri Dios, ncha'.

¹⁰¡Kan janila k'a xkikikot rik'in ri Jehová! Ri wánima kan jantape' k'a xtik'ases rik'in ri nu-Dios, roma kan ruya'on ri kolotajik chuwe, y kan xiruwiq k'a rik'in ruchojmilal, achi'el ruwiqon-ri' jun ala' ri nibek'ule' yan pe, y chuqa' ri xten ri xtibe'ok rixjayil rukusan chik jalajoj ruwech wiqobel.

¹¹Ri Jehová xtuben chi kan xtibek'ulun-pe ri ruchojmilal, y kan xtinimirisex k'a ruq'ij rija' chikiwech konojel ri tzobaj winaqi', achi'el ri ulew toq nel-pe q'ayis chuwech, y ri qejoj ri kan yebebos-pe ri ija'tz ri e tikon-qa chupan.