Read Kaqchikel Isa 62 Bible Online

Isa 62 - Kaqchikel bible

Isa 62

¹Roma ri wajowabal pa ruwi' ri tinamit Sión kan xkich'on, roma ri wajowabal pa kiwi' ri nuwinaq man xkinuxlan ta, k'a ja toq konojel ri ch'aqa' chik winaqi' xtikitz'et ri ruchojmilal ri niban chiri', achi'el nitz'et ri q'ij toq niseqer-pe, y k'a toq xtikitz'et ri kolotajik, achi'el jun q'aq' ri jantape' tzijil.

²Ri ch'aqa' chik winaqi' xtikitz'et ri ruchojmilal ri niban, y konojel ri rey xtikitz'et ri ruk'ojlen ri tinamit ri'. K'ari' xtiya'ox jun k'ak'a' rubi', y kan ja ri Jehová ri xtiya'on chire.

³Ri tinamit ri' xtok achi'el jun corona ri k'o janila rejqalen pa ruq'a' ri Jehová ri qa-Dios

⁴Man xtibix ta chik chire, jun tinamit ri xtole' kan. Ni chuqa' man xtikibij ta chik chi kan xk'is. Jak'a kan xtibix chire chi kan jebel ok, y kan achi'el rixjayil, roma ri Jehová kan xtujoyowaj ruwech, y ri ruwach'ulew kan xtok achi'el jun rixjayil.

⁵Ri winaqi' richin ri tinamit kan janila xtuk'en kiwech rik'in ri kulew, achi'el jun ala' toq nik'ule' rik'in jun xten. Ri Dios kan janila xtikikot kik'in rije', achi'el nikikot jun achijlonel rik'in ri rixjayil ri k'a juba' kek'ule'.

⁶Ri Dios e ruya'on chajinela' pa ruwi' ri tz'aq richin ri Jerusalem, y chi paq'ij chi chaq'a' rije' man yetane' ta richin nikiya' rutzijol.

⁷Rije' man nikiya' ta q'ij richin ri Dios nuxlan-qa juba' rik'in ri kiraqoj-chi'ij, k'a ja toq rija' xtiberuchojmirisaj chik jun bey ri Jerusalem, y xtuben chi xtel utz rutzijol chuwech ri ruwach'ulew.

⁸Ri Jehová kan xuya' rutzij chi rik'in ri nimalej ruchuq'a' man jun bey chik xtuya' q'ij chi ja ri e etzelanel kichin xketijo ri kiway, ni man xtikiqum ta ki-vino ri aj-Sión.

⁹Jak'a kan ja ri xketikon-qa ri trigo, jari' ri xketijo, y kan xtikiya' ruq'ij ri Jehová. Chuqa' ja ri xketikon-qa ri uva, ja rije' ri xkequmun ri vino chiri' chuwa-jay chire ri rachoch ri Dios.

¹⁰Jak'a rix aj-Jerusalem, tijaqa' chik jun bey chupan ri itinamit, y kixel-el chupan ri okibel. Tichojmirisaj jebel ri bey, y ke'iwelesaj ronojel taq abej ri ek'o chupan. K'ari' xtitzeqej chikaj jun retal, richin konojel tzobaj winaqi' richin ri ruwach'ulew nikitz'et-pe.

¹¹Ri Jehová kan xuya' rutzijol nej chire ri ruwach'ulew y xubij: Tibij chike ri aj-Sión chi jari' xoqaqa ri kikolonel, y chuqa' jari' xtuya' rajel ruk'exel chike chire ronojel ri kisamaj.

¹²Chike rije' xtibix; ri xecha'ox roma ri Jehová, y kan xeloq' roma rija'. Tinamit ri xtibix rayixel chire, y jun tinamit ri kan man xmalix ta kan.