Read Kaqchikel Isa 63 Bible Online

Isa 63 - Kaqchikel bible

Isa 63

¹K'o k'a jun q'ij toq k'o jun ri xtuk'utuj: ¿Achike kami ri peteneq pa ruwach'ulew Edom, y k'o pa tinamit Bosrá, ri kan nich'ich'an ri rutziaq? ¿Achike kami ri rukusan-pe jun tzieq ri kan nitz'intz'ot y kan peteneq rik'in uchuq'a'?, xticha'. Ja yin Jehová ri yich'on pa ruchojmilal, y k'o wuchuq'a' richin yixinkol.

²¿Achike k'a roma keq nitzu'un ri atziaq? Nitz'etetej chi xa achi'el xapitz' ta kan uva.

³Ja', yin xinpitz' kan uva, jak'a kan man jun k'o richin xto'on wichin. Kan rik'in woyowal xenxeq' chi'aqen ri e etzelanel wichin, y kan xenpalibej rik'in woyowal. Ri kikik'el xtzopin chuwij, y xok chirij ri nutziaq.

⁴Yin xinch'ob chi k'o jun q'ij ninbenya' ri nuq'atbel-tzij pa kiwi'. Kan xoqaqa k'a ri q'ij richin yenkol ri nutinamit.

⁵K'ulan k'a xitzu'un, jak'a man jun k'o richin xto'on wichin. Kan janila xinch'ob rij roma man jun xito'on ta juba'. Roma ri' nuyon yin xinch'ek ri oyowal, y ri woyowal xiruq'et.

⁶Kan rik'in k'a janila woyowal xenxeq' konojel tzobaj winaqi' richin ri ruwach'ulew. Janila xench'ey k'a toq xebiyin achi'el q'abarela', y kan xinben chike richin xbiyin kikik'el pan ulew, xticha' ri Dios.

⁷Yin kan ninwajo' yich'on pa ruwi' ri rajowabal ri Dios, y kan ninbixaj bix richin ninya' ruq'ij roma ri xuben pa qawi'. Roma ri nimalej rajowabal pa ruwi' ri tinamit Israel, kan xuk'ut chi kan xojrupoqonaj y kan janila k'iy ri xuben pa qawi'.

⁸Y rija' kere' xubij pa ruwi' ri qatinamit Israel: Rije' e nutinamit yin, alk'ualaxela' ri man jun bey xkinkimalij kan, xcha'. Y roma ri' rija' kan xerukol-wi.

⁹Toq rije' xek'oje' pa jun nimalej bis, chuqa' rija' kan xbison kik'in. Y kan ja ri ru-ángel ri xto'on kichin. Roma ri rajowabal y ri rujoyowanik, roma ri' xerukol y kan xeruyek chik el jun bey, y kan keri' ri rubanon-pe.

¹⁰Jak'a rije' xa xkipaba-ki' chuwech, y xa xkiya' pa bis ri Loq'olej Espíritu richin rija'. Roma ri' xok kik'ulel, y kan ja rija' ri xbanon labal kik'in rije'.

¹¹Jak'a rije' xa xoqaqa k'a chikik'u'x ri xkiq'axaj ojer toq xk'oje' ri Moisés. Xoqaqa k'a chikik'u'x toq ri Dios xerukol ri qati't-qamama' chupan ri Kaqa-Palou, y ri Moisés xeruk'uaj achi'el nuben jun yuq'unel kik'in ri rawej. Chuqa' xoqaqa chikik'u'x toq ri Dios xuteq-pe ri ru-Espíritu pa kiwi'.

¹²Ri Dios xuteq-pe ri nimalej ruchuq'a' richin xuyuqej chiruq'a' ri Moisés, ri xbanon chi xch'aratej ri palou ri', richin xnimirisex rubi' ri Jehová tibe-q'ij tibe-seq,

¹³Ri Dios xbanon chike richin xeq'ax chupan ri palou ri', y man xejilijo' ta, achi'el nikiben ri kiej toq anineq e beneq pa jun taq'aj, ri kan man jun bey yetzaq.

¹⁴Ri ru-Espíritu ri Jehová jari' ri xbanon chike richin xe'uxlan, achi'el nuben jun yuq'unel kik'in ri rawej pa jun taq'aj. Kan keri' xuben rik'in ri rutinamit, richin keri' kan xnimirisex ruq'ij-ruk'ojlen.

¹⁵Wakami k'a rat qa-Dios, katzu'un k'a pe ri k'a akuchi atk'o-wi; y tatz'eta' jebel k'a chupan ri loq'olej atz'uyubal ri akuchi nitz'etetej-wi ri aruwaq'ijaj. ¿Akuchi k'o-wi ri awajowabal y ri nimalej awuchuq'a'? ¿Akuchi k'o-wi ri ana'oj? Rik'in juba' xk'is yan ri joyowanik ri k'o awik'in pa qawi' roj.

¹⁶Man rik'in ri', ja rat ri at qatata', stape' ri Abraham y ri Jacob man ek'o ta pe wawe' richin yojkiya-apo chawech. Stape' rik'in ronojel re' kan ja rat ri at qatata', y kan ja rat ri at qakolonel richin tibe-q'ij tibe-seq.

¹⁷¿Achike roma Jehová naya' q'ij chiqe chi roj yojsach kan chupan ri abey, y kan niqakowirisaj ri qánima richin chi man niqaya' ta awejqalen? Pa ruk'exel re' tabana' utzil tajala' ri ach'obonik pa qawi', roma ja roj ri oj asamajela' ri janila yojawajo', y ri tzobaj ri akuchi e eleneq-pe ri awijatzul.

¹⁸Xa kan juba' ok q'ij xek'oje' chupan ri awachoch ri qate-qatata', jak'a re wakami ri e etzelanel qichin xa xkixolq'otij.

¹⁹Kan qitzij, roj xa qabanon achi'el xa ta man jun bey aq'aton-tzij pa qawi', y achi'el xa ta man jun bey qak'uan ri abi'.