Read Kaqchikel Isa 64 Bible Online

Isa 64 - Kaqchikel bible

Isa 64

¹K'ate' ta nijaqatej la kaj richin yaqaqa-pe rat, y kan naben richin yesilon ri juyu'.

²Kaqaqa-pe richin chi ri e etzelanel awichin niketamaj ri abi', y konojel ri tzobaj winaqi' richin ri ruwach'ulew xkebaybot ta chawech, achi'el nuben ri ya' niroqo, toq niya'ox más si' chuxe'.

³Toq rat xe'aben ri meyel taq banobel ri man e qoyoben ta roj, jari' toq xaqaqa-pe, y ri juyu' kan xebaybot chawech rat.

⁴Kan man jun bey ak'axan ta, ni man jun bey tz'eton chi k'o ta chik jun Dios achi'el rat, ri nibanon chi nusiloj ri nima'q taq juyu'.

⁵Rat kan ye'ak'ul chi utzil ri kan rik'in kikoten nikiben ri ruchojmilal, y ri noqaqa chikik'u'x ri bey ri ak'utun kan rat chikiwech. Rat kan janila awoyowal roma xojmakun roj; kan ojer chik ri' qaya'on q'axo'n chawe.

⁶Qonojel roj xa man oj ch'ajch'oj ta. Roj niqach'ob chi ri qabanobal kan e utzilej-wi, jak'a chawech rat xa kan achi'el jun tzieq ri tz'il-tz'il. Qonojel oj tzaqineq achi'el nitzaq ri ruxaq taq che' ri e mayirneq chik, y ri qamak yojruqirirej achi'el nuben ri kaq'iq' chike ri ruxaq taq che'.

⁷Man jun chike ri qawinaq ri nunataj ta ri abi', y man jun najowan nuto-ri' awik'in. Roma ri' rat kan man atk'o ta chik qik'in, y kan xojamalij kan roma ri qamak.

⁸Man rik'in ri', ajaw ja rat ri at qatata'. Roj ojk'o pan aq'a' achi'el ri xeq-ulew toq k'o pa ruq'a' ri banoy bojo'y. Qonojel k'a roj, ja rat ri xabanon qichin.

⁹Ajaw, man tipe janila awoyowal pa qawi' roj, ni man toqaqa chi'ak'u'x beneq ruwech ri qamak, Tajoyowaj k'a qawech roj roma oj atinamit.

¹⁰Ri tinamit ri ek'o pa qaruwach'ulew xa kan xetole' k'a kan. Ri tinamit Sión xa kan xok kan jun tz'iran ruwach'ulew, y tolan-tolan xuben kan.

¹¹Roj y ri qati't-qamama' xqaya' aq'ij chupan ri awachoch akuchi k'o-wi ri ak'ojlen. Jak'a re wakami xa kan xk'is yan roma ri q'aq'. Ronojel ri ek'o qik'in ri taq e jebel ok, kan xek'is.

¹²Y chirij ronojel re', Jehová, ¿rat kan man jun kami xtaben qoma roj? ¿Kan man jun kami xtabij, y kan jantape' xqojaya' pa tijoj-poqonal?