Read Kaqchikel Isa 65 Bible Online

Isa 65 - Kaqchikel bible

Isa 65

¹Ri Jehová nubij: Ja ri man jun kik'utun chuwe, chikiwech rije' xtink'ut-wi-wi'. Ri kan man jun bey in kikanon ta, ja rije' ri xke'ilon wichin. Y ja ri tinamit ri man jun bey kinatan ta nubi', chike k'a rije' xtinbij chi jare' ink'o wawe'.

²Ronojel k'a q'ij xinya' ri nuq'a' pa kiwi' ri nutinamit ri man e nimey ta tzij, ri xa e beneq pa jun bey ri man utz ta, ri xa ja ri nikich'ob rije' ri nikiben.

³Re winaqi' re' kan jantape' xkiyek woyowal, roma kan yekisuj kamelabel ri chiri' pa taq kiqejoj, y chuqa' pa ruwi' porobel ri banon rik'in xan nikiporoj ri pom.

⁴Kan ek'o k'a chiri' chikikojol ri jul richin muqbel, y nikik'owisaj aq'a' ri chiri'. Chuqa' kan nikitej ti'ij richin aq, y chupan ri kibojo'y k'o ruya'al q'utun ri man ch'ajch'oj ta.

⁵Y nikibij chike ch'aqa' chik kiwinaq: Kixk'oje' chiri' ri akuchi ixk'o-wi. Man kixjel-pe qik'in, roma roj kan más oj loq'olej chiwech rix, yecha'. Re winaqi' re' kan e achi'el q'aq' ri chijun q'ij yebuqun; y kan man utz ta nuben chuwe, roma xa e achi'el sib.

⁶Y ronojel re' kan chinuwech yin xtz'ibatej-wi kan. Y yin kan man xtinq'etej ta ri nuq'a', jak'a kan xtinya' rajel ruk'exel chike,

⁷roma ri kimak rije' y chuqa' roma ri kimak ri kite-kitata'. Rije' kan xekiporola' pom pa ruwi' taq juyu', y ri chiri' kojol taq juyu' xeyakatej chuwij. Yin kan xtinya' rutojbalil ri mak pa kiwi'.

⁸Yin Jehová ri yibin. Toq ri uva ri man jani kewux, y janila kiya'al, ri winaqi' man nikajo' ta nikichoy ri juwi-uva, roma k'a nikiwux na kan ri uva. Keri' chuqa' xtinben yin roma ri wajowabal pa kiwi' ri nusamajela': Y roma ri' man xkenk'is ta el konojel.

⁹Jak'a kan xtinben chi xkek'oje' kan rijatzul ri Jacob, y kan xtinben chi xkek'oje' kan winaqi' chiri' pa Judá, ri xkek'ase' chiri' pa taq nujuyu'. Ri xencha' kan yin, kan xtikichinaj kan ri ruwach'ulew ri', y ri nusamajela' kan chiri' xkek'oje-wi kan.

¹⁰Ri taq'aj richin ri Sarón kan xtinoj rik'in tzobaj kokoj taq awej, chuqa' ri taq'aj richin Acor, chiri' xkeyuq'ux-wi nima'q taq awej kichin ri tinamit ri xkinkikanoj yin.

¹¹Jak'a rix xa xinimalij kan yin Jehová, y kan ximestaj kan ri juyu' ri kan wichin yin. Chuqa' nisuj q'utun chikiwech ri Gad y ri Miní.*f13*

¹²Roma ri' kan nink'en-pe ruk'ayewal pan iwi'. Kan xtinben chiwe richin xkixkamisex rik'in espada. Yin xixinwoyoj, jak'a rix man xiniwak'axaj ta. Xich'on iwik'in, jak'a man xiya' ta ixikin richin xiniwak'axaj. Xa xiben ri man niqa' ta chinuwech yin, y xicha' ri man utz ta nintz'et yin.

¹³Roma ri' yin Jehová kere' ninbij: Ri nusamajela' kan jebel k'a xkewa-xke'uk'ya', jak'a rix ri ix aj-maki' man jun xtiwil. Rije' kan jantape' k'a xkekikot, jak'a rix kan xkixk'ixbitej.

¹⁴Rije' xkebixan rik'in janila kikoten, jak'a rix kan xkixoq' y xtireq ichi' roma bis y q'axo'n.

¹⁵Yin xtinben chiwe chi rix xkixken, y ri nusamajela' kan xtikikusaj ri ibi' rix richin nikoyoj itzel. Jak'a rije' xtinya' jun k'ak'a' kibi'.

¹⁶Xabachike k'a iwinaq israelita ri nuk'utuj urtisanik, kan chuwe k'a yin ri in qitzij Dios ri xtuk'utuj-wi. Y xabachike k'a iwinaq ri nujikiba-rutzij, kan chinuwech k'a yin ri in qitzij Jehová xtujikiba-wi. Y ronojel itzel banobel ri xkiben, yin kan xtinmestaj. Xa kan man xtintz'et ta chik.

¹⁷Titz'eta' k'a; yin kan xtinben jun chik k'ak'a' kaj, y jun chik k'ak'a' ruwach'ulew. Ronojel ri q'axo'n xa xkemestex, y kan man xtinatex ta chik.

¹⁸Kan jantape' k'a xkixkikot, y kan jantape' k'a kikoten xtik'oje' iwik'in roma ri xtinbenbana', roma yin kan xtinbenbana' jun k'ak'a' Jerusalem ri kan xtik'ases. Y xkenya' winaqi' ri chiri' ri janila xkekikot.

¹⁹Chuqa' yin kan xkikikot roma ri Jerusalem, y xkikikot koma ri nuwinaq. Y chiri' man jun bey chik xtak'axatej oq'ej, ni raqoj-chi'ij richin bis.

²⁰Chiri' man jun ak'ual xtiken. Chuqa' ri rijita'q taq winaqi' man yeken ta toq man jani nitz'aqet ri kijuna'. Jun wineq niken toq k'o wok'al rujuna', re wineq re' kan k'a janila ak'ual niken. Y toq jun wineq niken y man jani titz'aqet wok'al rujuna', re' oyon etzelanik pa ruwi'.

²¹Ri winaqi' kan xtikipabala' chik el jun bey ri kachoch, y kan xkek'oje' chupan. Xtikitik-qa uva y xtikitej ri ruwech.

²²Man xtibanatej ta chi ja ri ch'aqa' winaqi' yepaban-q'anej ri jay, y xa ch'aqa' chik yek'oje' kan chupan. Chuqa' man xtibanatej ta chi ja ri ch'aqa' winaqi' nikiben-qa ri kitiko'n, y xa ch'aqa' chik yetijo ri ruwech. Ri nuwinaq kan xkeyaloj xkek'ase-el, achi'el nik'ase' jun che'. Rije' kan xtikitej ronojel ri nikisamajij-qa.

²³Man xkesamej ta chaq keri'. Chuqa' ri ak'uala' ri xke'alex, man xtipe ta ruk'ayewal pa kiwi', roma rije' y ri e kijatzul kan nuya'on urtisanik pa kiwi'.

²⁴Kan k'a man jani k'a kinkoyoj-pe rije', toq yin kan xtink'uluba' yan qa ri kich'abel. Kan k'a man jani ketane-qa richin yech'on wik'in, yin kan xkenwak'axaj yan.

²⁵Ri utiw y ri karne'l kan xkewa' junan; ri koj kan xtikitej q'os achi'el ri bóyix. Jak'a ri kumetz kan k'a xtikibeq' na ri poqolaj. Jak'a man xkekiti' ta chik winaqi' chiri' pa Sión, y man jun chik ch'a'oj xtikiben, nicha' ri Jehová.