Read Kaqchikel Isa 7 Bible Online

Isa 7 - Kaqchikel bible

Isa 7

¹Chirij ronojel re' ri e aj-labal aj-Siria y ri aj-Israel nibekibana' oyowal rik'in ri tinamit Jerusalem, jak'a man xetikir ta xekich'ek. Y re' xbanatej toq ri Resín rey richin ri Siria, ri Pécah ruk'ajol ri Remalías, rey richin ri Israel ri k'o pa xaman, y ri Acaz ruk'ajol ri Jotam, y rumam ri Ozías, rey richin ri tinamit Judá.

²Y toq xya'ox rutzijol chire ri rey Acaz y ri aj-Judá chi ri aj-Siria xjunamatej-kiwech kik'in ri aj-Israel, jari' toq ri aj-Judá kan janila xsilon ri kánima roma xibinri'il, achi'el toq yesilon ri nima'q taq che' roma ri kaq'iq'.

³K'ari' ri Jehová xubij chuwe yin: Rat y ri ak'ajol Sear-iasub kixbiyin chuk'ulik ri Acaz chiri' akuchi napon-wi ri rubey-ya' ri nel-pe chupan ri yakbel-ya' ri k'o pa jotol, akuchi nich'aj-wi tzieq.

⁴Y tabij chire chi tuchajij-ri', man tuxibij-ri' y man tisach ruk'u'x roma ri koyowal ri Resín y ri Pécah; roma rije' xa man jun xketikir xtikiben. Xa e achi'el chik ka'i' rutza'n-si' ri choj yebuqun.

⁵Rije' kan xkiya' chikiwech richin nikiben etzelal chire ri Acaz, y nikibij chi

⁶yebekichapa' chi oyowal ri winaqi' aj-Judá, y nikich'er ri ruwach'ulew pa ka'i'. Y chuqa' xkich'ob chi nikiya' ri ruk'ajol ri Tabeel richin nok rey pa kiwi'.

⁷Jak'a man xtibanatej ta ri kibin, ni man xtibanatej ta ri kich'obon.

⁸Roma ri ruk'u'x ri ruwach'ulew Siria ja ri tinamit Damasco, y ri rey richin ri Damasco xa ja ri Resín. Y toq xtitz'aqet oxk'al wo'o' juna', ri tinamit Israel kan xtik'is.

⁹Roma ri ruk'u'x ri ruwach'ulew Israel ja ri tinamit Samaria; y ri rey richin Samaria xa ja ri ruk'ajol ri Remalías. Wi rix man xtikuquba' ta ik'u'x wik'in, kan qitzij na wi chuqa' rix man xkixk'ase' ta kan, xcha' ri Jehová.

¹⁰Ri Jehová xuteq chik k'a rubixik chire ri Acaz y xubij chi

¹¹tuk'utuj k'a utzil chire richin tuya' jun retal xabakuchi nrajo-wi rija', wi chuwech re ruwach'ulew o chuwech ri kaj.

¹²Jak'a ri Acaz xubij chi man jun xtuk'utuj, ni man xtutejtobej ta ri Jehová.

¹³K'ari' ri Isaías xubij: Tiwak'axaj k'a rix ri ix rijatzul kan ri rey David: ¿Kan achi'el niben chike ri winaqi' toq niyek koyowal y kan keri' chuqa' niwajo' niben chire ri qa-Dios?

¹⁴Roma ri' ri Dios kan xtuya' k'a pe jun retal chiwech. Jun xten xtipe alanik chirij.*f2* Y xtibe'alex jun ti ral. Y Emanuel*f3* ri rubi' ri xtuya'.

¹⁵Kan k'a man jani nik'iy-el rija' richin nretamaj ri utz y ri man utz ta, kan xtuqum k'a leche t'oqol y chuqa' xtutej kab ri nikiya' ri taq chikopi'. Y chupan ri q'ij ri', ri ruwach'ulew ri kichin ri e ka'i' rey ri' kan xtimalix kan, y man jun chik xibinri'il xtik'oje'.

¹⁷Jak'a ri Jehová xtuteq-pe pan iwi' tijoj-poqonal ri kan man jun bey itz'eton-pe, kan k'a ja toq ruch'aron-pe-ri' ri tinamit Israel qik'in roj ri aj-Judá. Re' nel chi tzij ri tijoj-poqonal ri xtiberuya' ri rey richin Asiria pan iwi'.

¹⁸Kan xtibanatej k'a chupan ri q'ij ri' chi ri Jehová xtixuban richin xkeroyoj ri winaqi' aj-Egipto richin xkepe chiwij achi'el jun nima-tzobaj amolo', y chuqa' xkeroyoj ri winaqi' aj-Asiria richin xkepe achi'el jun nima-tzobaj xuruy.

¹⁹Y konojel k'a rije' xkepe richin xke'ok'oje-qa chiri' pa taq'aj kojol juyu', y pa taq jul akuchi ek'o nima'q abej, y chiri' kojol taq k'ix y chiri' akuchi xke'uk'ya-wi ri awej.

²⁰Chupan k'a ri q'ij ri' ri Dios kan xtuk'en-pe ri rey richin Asiria ri k'o juk'an chik chire ri raqen-ya' Éufrates, richin xkepe chiwij. Y rija' kan achi'el ri achin ri nisokan rusumal-wi'aj. Y xtuben chi xtusokaj ri rusumal-iwi', ri rusumal-iwaqen y ri rusumal-ichi'.

²¹Y chupan ri q'ij ri', xtibanatej chi jun wineq xaxe k'o jun ti ruwákix y ka'i' rukarne'l.

²²Y rik'in ri ti juba' leche ri nikiya' ri taq awej ri', ri rajaw y ri ch'aqa' chik winaqi' ri xkek'oje' kan, xa xtikiqum ri leche ri', y xtikitej kab ri nikiya' ri taq chikopi'.

²³Chuqa' chupan ri q'ij ri' ri akuchi xk'oje' 1,000 juwi-uva, ri kan janila rajel, xa xkebek'iy-pe ri q'ayis ri janila kik'ixal chuwech.

²⁴Ri xke'ok-apo chiri' kan xke'ok-apo rik'in kich'ab y rute-ch'ab, roma ri ruwach'ulew ri' kan xaxe chik k'a jalajoj ruwech taq q'ayis ri k'o kik'ixal ri xkek'oje'.

²⁵Y ri chiri' pa juyu' ri akuchi kan yesamej-wi rik'in ri azadón, kan man jun chik k'a ri xtapon roma ri jalajoj ruwech q'ayis ri k'o kik'ixal. Jak'a ri ulew ri' kan xkek'atzin richin chi ye'isq'opex ri bóyix chupan, y richin yeq'axlan ri kokoj taq awej pa ruwi'.