Read Kaqchikel Isa 8 Bible Online

Isa 8 - Kaqchikel bible

Isa 8

¹Ri Jehová xch'on chik wik'in y xubij chi tinkanoj jun nim tz'alem y rik'in nima'q taq letra nintz'ibaj pa ruwi' ri bi'aj Maher-salal-hasbaz.*f4*

²Y yin kan keri' k'a ri xinben, y xenkanoj ri sacerdote Urías y ri Zacarías ri ruk'ajol ri Jerebequías richin nikitz'et ronojel ri xbanatej.

³Chirij k'a ronojel re', yin xik'oje' rik'in ri wixjayil ri chuqa' q'alajirisey ruch'abel ri Dios, y rija' xyawej kan chirij jun ak'ual y xk'oje' jun ti ala'. K'ari' ri Jehová xubij chuwe ri rubi' ri ti nuk'ajol ri xtinya' ja ri Maher-salal-hasbaz.

⁴Roma toq ri ak'ual xtitikir xtubij táta, nána, jari' toq ri aj-Damasco y ri aj-Samaria xtelesex-el ronojel kibeyomel y xke'uk'uex-el rik'in ri rey richin Asiria.

⁵Y ri Jehová xch'on chik wik'in jun bey y xubij:

⁶Ri awinaq man nikajo' ta ri raqen-ya' Siloé ri kan eqal nibiyin, jak'a yekikot kik'in ri Resín y ri Pécah.

⁷Y roma ri' yin xtink'en-pe ri rey richin Asiria, y rije' xkepe rik'in ronojel kuchuq'a' achi'el nibiyin ri nimalej raqen-ya' Éufrates. Achi'el toq nel pa ruk'ojelibal toq nipulin, y nuk'is ruwech ri ruwach'ulew,

⁸keri' xtikiben toq xke'apon pa tinamit Judá. Xtikinojisaj chijun ri ruwach'ulew, y kan xkeruk'is, xcha'. Y ri winaqi' aj-Judá xkibij: Jak'a ri Dios kan k'o qik'in. Rija' xqojrukuch roj y chuqa' ri qaruwach'ulew, achi'el nuben jun aj-xik' chikop ri rurik'on ri ruxik' richin yerukuch ri taq ral.

⁹Kan tiwetamaj k'a rix tinamit ri ix e etzelanel qichin. Kixanpe k'a chi'anin re wawe' richin yixk'is. Kan tiwak'axaj k'a rix ruwach'ulew ri ixk'o nej; tichapa' ri ikamisabal richin no'ibana' oyowal qik'in. Kixanpe k'a chi'anin re wawe' richin yixk'is.

¹⁰Stape' xtich'ob ri achike niben, jak'a kan man jun utz xtel chiwech. Nibij-apo ri niwajo' niben, jak'a xa kan man xtibanatej ta, roma ri Dios kan k'o-wi qik'in roj, xecha' ri aj-Judá.

¹¹Kan kere' k'a xch'on ri Jehová wik'in rik'in uchuq'a', y xuk'ut chinuwech richin chi man yibiyin ta chupan ri bey ri kik'uan ri ch'aqa' chik nuwinaq y xubij chuwe:

¹²Toq k'o jun nik'uluwachitej, ri awinaq nikibij chi ja ri e etzelanel awichin yebano. Jak'a rat man tach'ob keri'. Man tak'en rukiy achi'el kik'amon rukiy rije'.

¹³Kan xaxe yin Jehová ri k'iytisanel richin ronojel, tabana' chuwe chi yin in loq'olej. Kan xaxe yin ri k'o nuq'ij y wejqalen, y kan chinuwech k'a yin taxibij-awi'.

¹⁴Yin kan xkinok k'a jun tobel chawe rat. Jak'a chike ri awinaq aj-Judá y ri aj-Israel, man keri' ta. Chike rije' xa xkinok achi'el jun abej ri nikipajk'ij kaqen chirij. Xkinok achi'el jun pajk'ibel chike ri winaqi' aj-Jerusalem.

¹⁵Kan janila e k'iy winaqi' ri xtikipajk'ij kaqen. Xketzaq y xkek'is. Chuqa' kan e k'iy xkeqaqa chupan ri pajk'ibel ri', y kan chiri' xkek'oje-wi kan, xcha' ri Dios.

¹⁶K'ari' yin Isaías xinbij: Kan tiboto' jebel ri wuj akuchi tz'ibatel-wi ri ruchojmilal. Kan tixima' jebel ri rupixa' ri Dios rix nutijoxela'.

¹⁷Xtinwoyobej rik'in ri Jehová stape' kan man nuk'ut ta chik ri' chikiwech ri qawinaq israelita. Kan rik'in rija' xtinkuquba-wi nuk'u'x.

¹⁸Roma yin y ri walk'ual ri e ruya'on ri Jehová chuwe, kan oj ruya'on richin jun retal, y richin nima'q taq banobel richin re wawe' pa qaruwach'ulew. Y ri nibanon chiqe re', ja ri Jehová k'iytisanel richin ronojel ri k'o pa tinamit Sión.

¹⁹Rik'in juba' ek'o xkebin chiwe chi tik'utuj chike ri yech'on kik'in ri kaminaqi' y chike ri nikibananej chi ketaman ri peteneq chiqawech-apo, roma ruk'amon chi rik'in ta ri Dios xik'utuj-wi ronojel re'. Jak'a yin ninbij chi man ruk'amon ta chi ye'ik'ulubej ri kaminaqi' richin nikibij chiwe achike nik'uluwachij kik'in ri k'a ek'o na kan.

²⁰Pa ruk'exel ri', rix k'o chi nik'ut ta ri rupixa' ri Dios richin niwetamaj wi niban ta tijonik achi'el nubij ri pixa'. Y wi man keri' ta, ri Dios man ruya'on ta ri saqil kik'in ri winaqi' ri'.

²¹Janila xkewayjan, janila xkebison, y roma ri' xkebe-kela', xkebe-kela' xtikibanala' chuwech re ruwach'ulew. Y roma ri wayjal ri' xtiyakatej koyowal. K'ari' xtikiyek-el ri runaq' taq kiwech chila' chikaj y xtibekiqasaj ruq'ij ri ki-rey y ri Dios.

²²K'ari' xketzu'un-qa chuwech re ruwach'ulew y xaxe chik q'axo'n y q'equ'm ri xtikitz'et. Keri' xtikina' ri nimalej q'equ'm ri xa kan xaxe bis ruk'amon-pe.