Read Kaqchikel Isa 9 Bible Online

Isa 9 - Kaqchikel bible

Isa 9

¹Jak'a ri chiqawech-apo kan maneq chik q'equ'm chike ri ek'o pa q'axo'n. Pa rutikeribel ri Dios xuqasaj ruq'ij ri kiruwach'ulew kan ri Zabulón y ri Neftalí. Jak'a chiqawech-apo xtuya' kiq'ij ri ruwach'ulew Galilea akuchi ek'o-wi winaqi' ri man e qawinaq ta. Re ruwach'ulew re' k'o chikikojol ri palou y ri raqen-ya' Jordán, xcha' ri Isaías.

²Ri qawinaq ri ek'o pa jun nimalej q'equ'm, kan xtikitz'et jun nimalej saqil. Ri xek'ase' chupan jun ruwach'ulew ri kan xkitz'et ruwech kikamik, jak'a re wakami ri saqil kan xkerusaqirisaj.

³Rat qa-Dios xtawinaqirisaj ri qatinamit. Y kan janila kikoten ri xtaya' chiqe. Kan janila xqojkikot awik'in, achi'el toq napon ri ruq'ijul richin nik'ol ri tiko'n, y achi'el toq yojkikot toq niqataluj ri xqamej-pe ri k'o rejqalen chuwi-kiq'a' ri e etzelanel qichin.

⁴Ri ojer kan, rat xe'ato' ri qati't-qamama' pa kiq'a' ri aj-Madián. Y re wakami xqojato' chuqa' roj. Rat xke'awelesaj pa qawi' ri yetz'ilo qichin. Rije' kan xojkiya' pa kow taq samaj, jak'a re wakami rat kan xqojakol. Re wakami rat xtawelesaj ri uchuq'a' ri k'o kik'in rije'.

⁵Ronojel k'a ri kixajab ri e etzelanel qichin xkek'aq pa q'aq', chuqa' kan keri' xtiban rik'in ri kitziaq ri k'isineq chupan ri kik'.

⁶Roma kan xtiya'ox-pe jun ak'ual richin xto'alex-qa, alk'ualaxel ri kan xtiya'ox-pe chiqe. Xtiya'ox-pe q'atbel-tzij pa ruq'a'. Y kan xtubini'aj k'a: Ri jebelej pixabanel, Ri Dios ri k'o ronojel uchuq'a' rik'in, Tata'aj richin q'asen, Tata'al ri xtuk'en-pe uxlanibel-k'u'x.

⁷Ri ruq'atbal-tzij man xtik'is ta, y chuqa' ri uxlanibel-k'u'x ri xtuk'en-pe. Rija' xtibetz'uye' kan pa rutz'uyubal ri David, y xtiberuq'ata-tzij pa ruwi' ri rajawaren rija'. Kan xtiberuq'ata-tzij pa ruchojmilal, y kan nitz'aqet ri xtiberubana' chire. Ri ruq'atbal-tzij, richin tibe-q'ij tibe-seq. Y ri Jehová ri k'o ronojel uchuq'a' pa ruq'a', kan xtutz'et, wi xtibanatej ronojel re'.

⁸Ri Jehová xuteq jun rutzijol rik'in ri ruwach'ulew Israel ri k'o pa xaman, y rija' xtuya' jun tijoj-poqonal pa kiwi' ri winaqi' israelita.

⁹Y konojel k'a ri winaqi' xtiketamaj. Ri winaqi' aj-Samaria y chijun ruwach'ulew Israel xtiketamaj. Rije' kan rik'in runimirisanen ri kánima nikibij:

¹⁰Ri qachoch ri e banon rik'in ladrillo xa xewulex, jak'a re wakami roj xtiqapaba' chik jun bey rik'in abej ri kan e chojmirisan chik. Kan xechoy k'a el ri wíkix, jak'a re wakami roj xtiqatik-qa tiox-che' pa ruk'exel, yecha'.

¹¹Jak'a ri Jehová kan xtiberuyaka-pe ri Rezín chikij. y ri aj-labal kan xtikimol-pe-ki' chikij.

¹²Ri pa relebel-q'ij xkepe ri aj-Siria, y ri pa qajbel-q'ij ja ri aj-Filistea. Y rije' kan xkekitej chi rex ri israelita. Y man rik'in ri' man ik'owineq ta qa ri royowal ri Jehová. Xa kan k'a ruya'on na q'ij richin yek'is konojel.

¹³Jak'a rije' xa man xtzolej ta kik'u'x rik'in ri Dios, ni man xkikanoj ta ri Jehová k'iytisanel richin ronojel, stape' rija' xuya' tijoj-poqonal pa kiwi'.

¹⁴Roma ri' ri Jehová kan xkerelesaj-el konojel ri winaqi', nitiker-pe k'a pa kijolon y napon k'a chikaqen. Ri e tata'al y ri aj-raqen kan xkerutzak'ij-el, achi'el toq nitzak'ix-el ri rutum ri che' palma. Ri e q'alajirisey richin ri yebanatej xkechoy-el, achi'el yechoy ri pop, roma xaxe tz'ukun-tzij ri nikiben.

¹⁶Chuqa' ri q'atoy taq tzij xa kan yekiq'ol ri winaqi', richin rije' yesach-el.

¹⁷Xa roma ri' ri Jehová kan man xtujoyowaj ta kiwech; ri alaboni', ri meba'i' y ri malkani'. Roma konojel rije' xa xkimalij kan ri Dios, y kan janila e itzel. Konojel xaxe yoq'onik ri k'o pa kichi'. Y man rik'in ri' man ik'owineq ta qa ri royowal ri Jehová. Xa kan k'a ruya'on na q'ij richin yek'is konojel.

¹⁸Kan qitzij na wi chi ri etzelal chi'anin nutaluj-ri', achi'el toq nitzijtej jun q'aq' pa jun li'aj-k'ix nuk'is ronojel. Chuqa' nuk'is chijun k'echelaj, y k'ari' yerusututej chikaj ri sib achi'el nuben jun sutz'.

¹⁹Roma ri royowal ri Jehová k'iytisanel richin ronojel, kan xtik'at chijun ri ruwach'ulew; y ri q'aq' kan xtuk'is ri kitinamit. Y ri winaqi' xkek'atzin richin si'. Rije' man xtikijoyowaj ta kiwech ri kach'alal;

²⁰chikijujunal ri winaqi' kiyon rije' nikitej-qa-ki'. Stape' nikitej-qa-ki' xa man xkenoj ta. Y chikijujunal xtikitej-qa ri kalk'ual.

²¹Ri israelita ri ek'o pa xaman xtikiben-qa oyowal chikiwech rije', y k'ari' rije' xke'ok chirij ri qaruwach'ulew Judá. Y man rik'in ri' man ik'owineq ta qa ri royowal ri Jehová. Xa kan k'a ruya'on na q'ij richin yek'is konojel.