Read Kaqchikel Lev 10 Bible Online

Lev 10 - Kaqchikel bible

Lev 10

¹Y ek'o k'a e ka'i' chike ri e ruk'ajol ri Aarón kibini'an, Nadab y Abihú, y chikijujunal rije' xkiya' racheq-q'aq' chupan ri kiporobal-pom y k'ari' xkiya-el juba' pom pa ruwi'. Jak'a ri Dios man rubin ta chi tikikusaj xabachike racheq-q'aq'.

²Y roma ri keri', xrepero-pe jun q'aq' rik'in ri Jehová richin xuk'is ri kik'aslen. Rije' kan chuwech k'a apo ri Jehová xeken-wi.

³Xeri' ri Moisés xubij chire ri Aarón: Ri Jehová kan ch'owineq chik k'a kan chirij achi'el re xbanatej re wakami, kan rubin chik k'a: Ri kan yejel k'a pe wik'in richin yinkisamajij, kan qitzij wi chi niq'alajin ri nuq'ij-nuk'ojlen chupan ri kik'aslen, y xtitz'et koma konojel winaqi' chi kan man jun chik ri achi'el ta yin; keri' rubin ri Dios, xcha' ri Moisés. Y ri Aarón kan man jun k'a ch'abel ri xubij.

⁴Ri Aarón ek'o k'a ka'i' rach'alal, e ruk'ajol ri ruch'utitata' rubini'an Uziel. Y kibini'an Misael y Elsafán. Y ri Moisés xeroyoj rije' y xubij chike: Kixjel-pe y ke'iwelesaj chi jujun la kich'akul la iwach'alal k'a chuchi-el re akuchi ojk'o-wi-qa. Ke'ik'uaj-el nej chire re jay richin ri Dios, xcha'.

⁵Y rije' xejel-apo y xekitzeqej k'a el chi kitziaq ri kaminaqi' y keri' xekelesaj-el ri kich'akul k'a chirij-el ri akuchi ek'o-wi-qa, kan achi'el ri xubij ri Moisés chike.

⁶Y ek'o k'a ka'i' chik ruk'ajol ri Aarón, ri kibini'an Itamar y Eleazar. Ri Moisés xeroyoj k'a rije' y ri Aarón, y xubij k'a chike: Ri qawinaq xkebison kichin ri e ka'i' ri xuben ri Jehová chi xk'is kik'aslen roma ri q'aq'. Jak'a rix man tiben keri': xa kan jantape' k'a tichojmirisaj ri rusumal-iwi', y chuqa' man niretz ta ri itziaq chiwij roma bis. Jak'a wi rix xtik'ut richin yixbison, kan xkixken k'a, y xtiyakatej royowal ri Dios chikij konojel ri qawinaq.

⁷Chuqa' kan man k'a tiya' kan ri ruchi' ri rachoch ri Dios rokik k'o ri bis ri', richin man kixken, roma rix kan ya'on aceite richin cha'onri'il pan iwi' richin re samaj re', xcha' ri Moisés chike. Y rije' xkiben k'a achi'el xubij ri Moisés.

⁸Xeri' ri Jehová xch'on rik'in ri Aarón y xubij chire:

⁹Rat y ri e ak'ajol man nitej k'a vino, ni man jun chik ri niq'abarisan toq k'a man jani yixok-apo chupan ri wachoch richin man yixken ta. Re' kan jun pixa' re ninya' chiwe ri xtik'atzin chike ri iwijatzul richin jantape'.

¹⁰Y keri' xtiben richin niya' rukojol ri ch'ajch'oj y ri man ch'ajch'oj ta, y chuqa' ri rukojol ri e ch'aron chuwe yin y ri e choj relik.

¹¹Y chuqa' ye'itijoj ri iwinaq rik'in ronojel pixa' ri nuya'on chiwe, ri kan iwichin rix ri nuya'on chik chire ri Moisés, xcha' ri Jehová.

¹²Chirij ronojel ri' ri Moisés xubij chire ri Aarón y chike ri Eleazar y ri Itamar ri e ruk'ajol ri k'a xek'oje' kan: Tik'ama' k'a k'ej chire ri k'ej ri totajineq kan chire ri sipanik ri xsuj chuwech ri Jehová y tibana' kaxlan-wey rik'in, xaxe man tiya' ch'amilej-q'or rik'in y titija' chunaqaj ri porobel. Rix ri ix sacerdote ri xkixtijo, roma re' jare' ri ch'aron richin ri Dios.

¹³Re' kan titija' k'a ri akuchi cha'on-wi. Y re' nok iwichin, roma jare' ri ye'el kan chike ri sipanik ri yesuj chuwech ri Jehová, ri yeporox. Keri' ri rubin ri Jehová chuwe.

¹⁴Jak'a ri peraj ruwa-ruk'u'x y ri tzan-racheq ri chikop ri niyak chikaj toq nisuj chire ri Jehová, utz natej rat, y chuqa' ri e awalk'ual. Kan titija' xabakuchi xaxe wi ch'ajch'oj. Y re' nok kan iwichin, roma jare' ri ye'el kan chire ri kamelabel ri yesuj chuwech ri Jehová richin nuq'alajirisaj chi junan kiwech rik'in ri Dios.

¹⁵K'o chi xke'ik'en-pe ri tzan-racheq y ri ruwa-ruk'u'x ri chikop toq niporoj ri q'en, richin jun sipanik chuwech ri Dios. Re' kan xtok awichin rat y kichin ri awalk'ual. Y jare' ri pixa' ri ruya'on ri Dios, xcha'.

¹⁶K'ari' ri Moisés xuk'utuj achike kibanon chire ri achij tzuntzun ri richin kamelabel richin kuyubel-mak, y xretamaj k'a chi xa xporox yan ronojel y roma ri' janila k'a xyakatej royowal chikij ri Eleazar y ri Itamar y xubij k'a chike:

¹⁷¿Achike roma xa xiporoj ronojel ri ruch'akul ri chikop richin ri kamelabel ri richin kuyubel-mak y man xitej ta ri akuchi ri kan cha'on-wi? Re kamelabel re' kan richin ri Jehová, y rija' ruya'on chi kan nok iwichin rix, richin chi nitej y utz yixrutz'et.

¹⁸¿Achike roma man xitej ta ri ti'ij richin ri kamelabel? Ni man xuk'uex ta apo ri kik' chupan la rachoch ri Dios, y k'o ta chi xitej ri ti'ij ri' ri akuchi ruk'amon-wi, achi'el ri nubin chiwe, xcha' ri Moisés.

¹⁹Y ri jari' toq ri Aarón xubij chire ri Moisés: Rat natz'et chi ri winaqi' xkik'amala-pe chikopi' richin nisuj richin kamelabel richin ri kimak y ri chikop richin niporox chuwech ri Jehová, jak'a yin xa yibison roma ri xkik'uluwachij ri nuk'ajol y wi ta yin xintej ri ti'ij richin ri kamelabel ¿Kan xqa' ta kami chuwech ri Jehová?, xcha'.

²⁰Toq ri Moisés xrak'axaj ronojel ri xubij ri Aarón xqa' chuwech.