Read Kaqchikel Lev 14 Bible Online

Lev 14 - Kaqchikel bible

Lev 14

¹Ri Jehová xch'on chik rik'in ri Moisés y xubij:

²Jare' ri ruchojmilal pa ruwi' ri jun wineq richin nich'ajch'ojir chire jun chike ri itzel taq yabil ri nutaluj-ri'. Ri q'ij toq niq'alajirisex chi ch'ajch'oj chik ri wineq ri', jari' toq ri sacerdote nel-el chirij ri akuchi ek'o-wi-qa. Y ri wineq ri' k'o chi napon rik'in. Y rija' xtutz'et ri yawa' wi k'a k'o na ri itzel yabil chirij.

⁴K'ari' xtuteq ruk'amik ka'i' taq aj-xik' chikopi' ri kan e ch'ajch'oj, y chuqa' juba' tiox-che', kaqkoj k'an, y juba' q'ayis hisopo.

⁵Chuqa' xtuteq ruk'amik jun bojo'y y nuya' ya' chupan ri k'a juba' telesex-pe pa jun ralaxbel-ya'. Y k'ari' xtuteq k'a ruqupixik ri ruqul jun chike ri taq aj-xik' chikopi' pa ruwi' ri bojo'y ri'.

⁶Xeri' nuk'en-apo ri jun chik aj-xik' chikop k'es, ri juba' tiox-che', ri q'ayis, y ri kaqkoj k'an; ronojel re' yeruju-qa chupan ri bojo'y akuchi k'o-wi ri rukik'el ri nabey aj-xik' chikop ri xolon rik'in ya'.

⁷K'ari' ri sacerdote xtuchikaj wuqu' mul ri kik' ri xolon rik'in ya' chirij ri wineq ri xk'oje' ri itzel yabil chirij, richin nich'ajch'ojir. Xeri' xtibix chi ri wineq ch'ajch'oj chik, y xtisq'opex-el ri jun chik aj-xik' chikop richin xtibe pa juyu'.

⁸Ri wineq ri nuch'ajch'ojirisaj-ri' k'o chi nuch'ej rutziaq, natin y xtujos-el ronojel ri rusumal, y k'ari' nich'ajch'ojir. Y k'ari' utz napon chik akuchi k'o-wi-qa ri tinamit, stape' man nok ta pa rachoch wuqu' q'ij.

⁹Toq xtitz'aqet ri wuqu' q'ij jun bey chik xtujos-el ri rusumal-ruwi', ri rusumal-ruchi', ri rumetz' y ronojel ri rusumal. K'ari' nuch'ej ri rutziaq, natin jun bey chik y keri' k'a xtich'ajch'ojir.

¹⁰Y ri ruka'n q'ij, toq napon ri ruwaqxaq q'ij, ri wineq nuk'en-pe ka'i' alaj taq achija' karne'l ri kan e tz'aqet y chuqa' nuk'en-pe jun ti ixoq karne'l ri k'o jun rujuna' ri kan tz'aqet, nuk'en-pe wo'o' libra k'ej ri xolon aceite rik'in, y jun qumbel nojineq chi aceite olivo.

¹¹Ri sacerdote xtuk'en-pe ronojel re' y chuqa' nuk'en-pe ri wineq, k'a chuchi' re wachoch.

¹²K'ari' ri sacerdote nuk'en-pe jun chike ri achija' karne'l richin kamelabel richin nikuyutej rumak roma jun ch'a'oj, junan rik'in ri aceite; xtuyakala-q'anej richin jun sipanik yakon chinuwech.

¹³K'ari' niqupix ri ruqul ri chikop ri' ri akuchi kan ch'aron richin niqupix ri kiqul ri chikopi' richin kamelabel richin kuyubel-mak y ri chikop richin niporox chijun. Ja ri sacerdote ri k'o chi nikamisan ri chikop ri' richin kamelabel richin ch'a'oj ri chiri'; y ri ruch'akul ri chikop ri' kan ch'aron richin nok richin rija', achi'el ri ruch'akul ri chikop richin nikuyutej mak.

¹⁴Xeri', ri sacerdote nuk'uaj-el juba' rukik'el ri chikop, y jari' ri nuya' juba' chirij ri wineq ri nuch'ajch'ojirisaj-ri': nuya' juba' chutza'n-qa ri ruxikin, chuwi' ri nim ruwi-ruq'a' y chuqa' chuwi' ri nim ruwi-raqen ri ek'o pa rijkiq'a'.

¹⁵K'ari' ri sacerdote niberuk'ama-pe ri aceite y nuq'ej-el juba' pa ruq'a' ri k'o pa rajxokon;

¹⁶y xeri' xtuju' jun chike ruwi-ruq'a' ri k'o pa rijkiq'a', chupan ri aceite ri k'o chupan ri jun chik ruq'a', y k'ari' xtuchikaj chinuwech yin. Wuqu' k'a bey ri k'o chi nuben kere'.

¹⁷Y rik'in ri juba' chik chire ri aceite ri man xk'is ta, ri k'o pa ruq'a' ri sacerdote, xtuyala' chik chirij ri akuchi xuyala-wi ri kik' chirij ri wineq ri nuch'ajch'ojirisaj-ri'.

¹⁸Y ri juba' chik aceite ri xtotej kan pa ruq'a' ri sacerdote, nuya' pa rujolon ri nuch'ajch'ojirisaj ri'. K'ari' ri sacerdote xtuben chi xtink'en chik ruwech ri wineq,

¹⁹toq xtuk'en-pe ri ti ixoq karne'l richin kamelabel richin kuyubel-mak. Y kan xtuben k'a rik'in ri wineq, ronojel ri nik'atzin richin niban richin chi nich'ajch'ojir. K'ari' xtiporox chijun ri ruka'n achij karne'l pa ruwi' ri porobel.

²⁰Y junan k'a rik'in re kamelabel re', ri sacerdote xtuporoj chuqa' ri k'ej ri k'amon-pe. Y keri' xtuben ri sacerdote, y yin xtink'en chik ruwech ri wineq, y keri' kan xtich'ajch'ojir k'a.

²¹Y wi ri wineq man jun k'o rik'in, y man nitikir ta nuk'en-pe ri oxi' karne'l, utz k'a chi nuk'en-pe xaxe jun achij karne'l richin xtuyakala' k'a chikaj richin nusuj chuwe yin. Y k'ari' xtuporoj ri ch'aqa' chire ri ruch'akul re chikop re' richin chi ninkuy rumak, y yin kan xtink'en chik k'a ruwech. Y chuqa' nuk'en-pe jun qumbel ri nojineq chi aceite olivo, y ka'i' libra k'ej xolon aceite rik'in.

²²Chuqa' nuk'en-pe ka'i' paloma e nima'q o e ka'i' taq kokoj; xabachike k'a chike ri aj-xik' chikopi' ri' ri nitikir nuk'en-pe ri wineq. Jun chike ri' nusuj richin kamelabel richin kuyubel-mak, y ri jun chik niporox chijun chinuwech yin.

²³Y chupan ri q'ij toq ri wineq nusuj ri chikop richin chi rija' nich'ajch'ojir, yeruk'en-pe ri e oxi' chikopi' y nuya' chire ri sacerdote re wawe' chuchi' re wachoch.

²⁴Jari' toq ri sacerdote niberuk'ama-pe ri karne'l richin kamelabel roma jun ch'a'oj, y junan rik'in ri aceite, xtuyakala-q'anej richin jun sipanik yakon chinuwech yin.

²⁵K'ari' ri sacerdote nuqupij ri ruqul ri chikop richin kamelabel richin ch'a'oj, y nuk'uaj-el juba' rukik'el ri chikop, y jari' ri nuya' juba' chirij ri wineq ri nuch'ajch'ojirisaj-ri': nuya' juba' chutza'n-qa ri ruxikin, chuwi' ri nim ruwi-ruq'a' y chuqa' chuwi' ri nim ruwi-raqen ri ek'o pa rijkiq'a'.

²⁶K'ari' ri sacerdote niberuk'ama-pe ri aceite y nuq'ej-el juba' pa ruq'a' ri k'o pa rajxokon;

²⁷y xeri' xtuju' jun chike ri ruwi-ruq'a' ri k'o pa rijkiq'a', chupan ri aceite ri k'o chupan ri jun chik ruq'a', y k'ari' xtuchikaj chinuwech yin. Wuqu' k'a bey ri k'o chi nuben kere'.

²⁸Y rik'in ri juba' chik chire ri aceite ri man xk'is ta, ri k'o pa ruq'a' ri sacerdote, xtuyala' chik chirij ri akuchi xuyala-wi ri kik' chirij ri wineq ri nuch'ajch'ojirisaj-ri'.

²⁹Y ri juba' chik aceite ri xtotej kan pa ruq'a' ri sacerdote, nuya' pa rujolon ri nuch'ajch'ojirisaj-ri'. K'ari' ri sacerdote xtuben k'a chi xtink'en chik ruwech ri wineq.

³⁰Y keri' k'a chuqa' xtusuj ri e ka'i' aj-xik' taq chikopi' ri xeruk'en-pe.

³¹Ri jun nusuj richin nikuyutej rumak, y ri jun chik nusuj richin niporox chijun chinuwech. Y chuqa' nusuj ri sipanik richin k'ej. Keri' xtuben ri sacerdote, y yin utz chik xtintz'et ri wineq, y xtich'ajch'ojir k'a chinuwech yin.

³²Jare' ri ruchojmilal ri xtibanatej rik'in jun wineq ri k'o jun chike ri itzel taq yabil chirij, ri nutaluj-ri', ri man xtitikir ta xtuk'en-pe ri karne'l richin nich'ajch'ojir, xcha' ri Jehová.

³³Ri Jehová xch'on chik jun bey rik'in ri Moisés y ri Aarón y xubij chike:

³⁴Jare' ri ruchojmilal re ninya' yan chiwe richin niben toq ixk'o chik chupan ri ruwach'ulew Canaán: Wi ta yin ninben chi nibek'ulun-pe pus pa jun jay y ri pus ri' nutaluj-ri'.

³⁵Jari' toq ri rajaw ri jay k'o chi xtuya' rutzijol chire ri sacerdote, y xtubij chire chi k'o pus pa rachoch, achi'el pus ri nutaluj-ri'.

³⁶Y rokik k'a chi ri sacerdote man jani nibe chutz'etik y nubij chi man ch'ajch'oj ta, rija' nuteq k'a relesaxik ronojel ri k'o chupan ri jay, richin chi ronojel re', yekolotej chuwech ri xtubij ri sacerdote, y k'ari' napon k'a.

³⁷Ri sacerdote xtunik'oj k'a ruwech ri tz'aq richin ri jay, ri chiri' chupan y xtutz'et wi ri seq'eseq-seq, raxroj o kaqkoj nitzu'un, y wi kan beneq chupan ri tz'aq.

³⁸Y wi keri', ri sacerdote xtibepa'e' k'a chuchi' ri jay y xtubij chi ri jay nitz'ape' kan richin wuqu' q'ij.

³⁹Y toq xtz'aqet yan ri wuqu' q'ij napon chik jun bey ri sacerdote chutz'etik ri jay, y xtutz'et k'a wi xnimer ri itzel pus chupan ri jay chuwech ri tz'aq.

⁴⁰Y wi keri', ri sacerdote xtubij chi ye'elesex-el ri abej ri e ukusan chire ri tz'aq akuchi k'o-wi ri pus chikiwech; y xke'uk'uex-el nej chire ri tinamit, ri kan cha'on akuchi yetorix-wi ri kan man e ch'ajch'oj ta.

⁴¹Y rija' xtuteq rujosik ronojel ruwech ri tz'aq chupan ri jay, y keri' chuqa' ri poqolaj xtuk'uex-el nej chire ri tinamit, ri kan cha'on akuchi yetorix-wi ri kan man e ch'ajch'oj ta.

⁴²K'ari' xke'ik'en-pe ch'aqa' chik abej y ye'iya' kan pa kik'exel ri xe'elesex-el y nibek'ama-pe juba' ulew, nimuba' richin xke'iq'olij kan y xtitz'apej kan kiwech.

⁴³Y wi ta ri seq'eseq-seq nibek'ulun chik pe toq xa xelesex yan el ri abej chire ri jay y xjos yan ruwech ri tz'aq y xk'ojox yan chik jun bey,

⁴⁴ri sacerdote nok chik jun bey pa jay richin nutz'et ri seq'eseq-seq. Wi re' xa xnimer chuwech ri tz'aq, re' kan jun chike ri itzel pus ri nutaluj-ri', y ri jay ri' kan man ch'ajch'oj ta chik.

⁴⁵Wi keri', kan xtiwulex k'a ri jay jumul y ronojel ri ukusan chire ri jay; ri abej, ri che' y ri ulew, kan xtibetorix kan nej chire ri tinamit, ri kan cha'on akuchi yetorix-wi ri kan man e ch'ajch'oj ta.

⁴⁶Y toq ri sacerdote rubin chik k'a chi titz'apex ri jay, y k'o ta jun wineq nok-apo chupan, re wineq re' kan xtok man ch'ajch'oj ta chijun ri q'ij ri', k'a toq nok pe ri aq'a'.

⁴⁷Chuqa' xabachike wineq ri niwa' o niwer-el chupan ri jay ri', kan k'o chi nuch'ej na ri rutziaq richin nich'ajch'ojir.

⁴⁸Y toq ri sacerdote nok-apo chupan ri jay ri xchojmirisex yan, y nutz'et chi xa xk'is-el ri itzel pus chuwech ri tz'aq, xtubij k'a chi re jay re' kan ch'ajch'oj, roma xk'is-el ri itzel pus ri nutaluj-ri'.

⁴⁹Richin chi nuch'ajch'ojirisaj ri jay, ri sacerdote nuteq ruk'amik ka'i' aj-xik' taq chikopi', juba' tiox-che', kaqkoj k'an y juba' q'ayis hisopo.

⁵⁰K'ari' xtuteq ruk'amik jun bojo'y y nuya' ya' chupan ri k'a juba' telesex-pe pa jun ralaxbel-ya'. Y k'ari' nuqupij ri ruqul jun chike ri taq aj-xik' chikopi' pa ruwi' ri bojo'y ri'.

⁵¹Xeri' nuk'en-apo ri jun chik aj-xik' chikop, ri juba' tiox-che', ri q'ayis, y ri kaqkoj k'an: ronojel re' yeruju-qa chupan ri bojo'y akuchi k'o-wi ri rukik'el ri nabey aj-xik' chikop ri xolon rik'in ya'. Y ri sacerdote xtuchikaj wuqu' mul ri kik' ri xolon rik'in ya' chirij ri jay.

⁵²Keri' nuben ri sacerdote richin chi nich'ajch'ojir ri jay rik'in ronojel re': Rik'in ri rukik'el ri nabey aj-xik' chikop xolon rik'in ya', rik'in ri aj-xik' chikop k'es, rik'in ri tiox-che', rik'in ri q'ayis hisopo y rik'in ri kaqkoj k'an.

⁵³Y k'a nej juba' chire ri tinamit niberisq'opej-wi kan ri ti aj-xik' chikop ri k'a k'es na. Y keri' utz xtintz'et ri jay y xtich'ajch'ojir, xcha' ri Dios.

⁵⁴Jare' ri ruchojmilal pa kiwi' ri itzel taq yabil ri nikitaluj-ki':

⁵⁵toq jun wineq ye'el-pe sipojik chirij, nipujan ri ruch'akul, ri ye'el-pe seq'eseq yabil chirij ri seq yetzu'un, o toq ye'el-pe pus chirij jun tzieq o pa jun jay,

⁵⁶

⁵⁷richin keri' rix yixtikir nitz'et ri ch'ajch'oj y ri man ch'ajch'oj ta. Jare' ri ruchojmilal ri k'o pa kiwi' ri itzel taq yabil ri nikitaluj-ki'.