Read Kaqchikel Lev 16 Bible Online

Lev 16 - Kaqchikel bible

Lev 16

¹Ri Jehová xch'on k'a rik'in ri Moisés, toq e kaminaqi' chik el ri e ka'i' ruk'ajol ri Aarón, ri xeken roma xe'ok-apo chirij ri tzieq tasbel rupan ri rachoch ri Dios y xa man rubin ta chike chi keri' nikiben.

²Y ri Jehová kere' k'a ri xubij chire: Tabij chire ri Aarón, ri animal, chi man xabachike ta ramaj nok-apo chirij ri tzieq ri tasbel rupan ri wachoch, ni chuwech-apo ri tz'apebel ruwi' ri káxa, richin chi man niken ta, roma yin kan chiri' chupan jun mokol sutz' ninbenk'utu-wi'.

³Jak'a wi k'o chi nok-apo chirij ri tzieq tasbel rupan ri wachoch, k'o chi nuk'en-pe jun nima-alaj achij wákix richin nusuj richin kamelabel richin kuyubel rumak, y chuqa' jun achij karne'l richin niporox chijun.

⁴Ri nabey, ri k'o k'a chi nuben ri Aarón, ja ri natin, y k'ari' nukusaj ri rutziaq ri kan ch'aron richin pa nusamaj, ri e banon rik'in lino: Ri rupan rutziaq, ri nim raqen rutziaq, ri ximibel-rupan y ri kuchubel-rujolon retal ri rusamaj.

⁵Y ri awinaq israelita k'o chi nikik'en-pe ka'i' achija' tzuntzun y nikijech chire ri Aarón, richin kamelabel richin nikuyutej kimak, y jun achij karne'l richin niporox chijun.

⁶K'ari' ri Aarón xtusuj k'a ri wákix richin nikuyutej ri rumak rija', ri rumak ri rixjayil y ri kimak ri ralk'ual; y rik'in ri' nink'en k'a kiwech rije'.

⁷Y k'ari' rija' xkeruk'en k'a pe ri e ka'i' tzuntzun chuchi' re wachoch, richin chi yeruya' chinuwech yin Jehová.

⁸K'ari' ri Aarón yeruya' k'a pa sakinik ri e ka'i' tzuntzun richin yin xtinq'alajirisaj ri achike ri xtok kan wichin, y ri achike ri xtibe'isq'opex kan richin nuk'uaj-el ri imak rix.*f5*

⁹Y ri achij tzuntzun ri xtok kan wichin yin, jari' ri xtusuj chuqa' richin jun kamelabel richin kuyubel imak rix.

¹⁰Jak'a ri ruka'n tzuntzun ri k'a k'es na, ri nuk'uan-el ri imak rix, k'a nik'oje' na chinuwech yin y k'a toq k'achojineq chik na ronojel ri nik'atzin, k'ari' k'a xtibe'isq'opex kan pa tz'iran ruwach'ulew richin xtink'en chik iwech.

¹¹Ri Aarón kan xtuqupij ri ruqul ri nima-alaj achij wákix richin xtusuj richin kamelabel, y xtikuyutej ri rumak rija' y ri kimak ri e aj pa rachoch. Keri' kan xtink'en chik kiwech.

¹²Chirij ri' nuk'uaj-apo jun porobel-pom ri k'o el racheq-q'aq' chupan, ri elesan-el chupan ri porobel richin kamelabel. Y chuqa' nuk'uaj-apo ka'i' moq' jubulej pom ri kan jebel chik jok'on ruwi'. Xtuk'uaj k'a ronojel re', y nok-apo k'a chirij ri tzieq ri tasbel rupan ri wachoch.

¹³Y xtuya' k'a ri pom pa ruwi' ri q'aq' toq k'o chik chinuwech yin, richin chi ri rusibil ri pom xtunojisaj ruwi' ri tz'apebel ruwi' ri káxa richin chi man nutz'et ta ri ruwi', y keri', man niken ta.

¹⁴K'ari' nuk'en juba' chire ri rukik'el ri achij wákix, ri ruk'uan chuqa' apo y nuju' jun chike ri ruwi-ruq'a' chupan, y nuchikaj pa ruwi' ri tz'apebel ruwi' ri káxa, y chuqa' nuchikaj wuqu' mul ri kik' ri chuwech-pe ri káxa.

¹⁵Y chirij re' ri Aarón xtukamisaj ri achij tzuntzun ri xkik'en-pe ri winaqi', richin nikuyutej kimak. Y xtuk'uaj-apo ri kik' chirij ri tzieq ri tasbel rupan ri wachoch. Y k'ari' xtuben achi'el xuben rik'in ri rukik'el ri wákix; xtuchikaj k'a chuwech-pe ri káxa y pa ruwi' ri tz'apebel.

¹⁶Y keri' k'a xtuben ri Aarón richin nuch'ajch'ojirisaj ri akuchi k'o-wi ri káxa ri tz'ilobitajineq roma ri itzel taq kibanobal ri awinaq, ri kiyakatajinenri'il y ri kimak. Y keri' chuqa' xtuben rik'in chijun ri wachoch richin molojri'il, ri k'o chi'ikojol rix.

¹⁷Man jun k'a tok-apo pa wachoch rokik ri Aarón k'o-apo chuwech ri káxa richin nijunamatej-kiwech wik'in yin, rija', ri e aj pa rachoch, y konojel ri winaqi'.

¹⁸Chirij ri' ri Aarón xtel k'a pe richin nuch'ajch'ojirisaj ri porobel ri k'o chinuwech. Xtuchop juba' rukik'el ri achij wákix y juba' rukik'el ri achij tzuntzun y xtuya' chikij ri achi'el uk'a' ri ek'o pa taq kaji' ruxikin ri porobel.

¹⁹Y xtuju' k'a qa jun chike ri ruwi-ruq'a' chupan ri kik' ri k'a k'o kan, y xtuchikaj k'a wuqu' mul chirij ri porobel, richin chi nujech chuwe yin. Y keri' xtich'ajch'ojir chire ri itzel taq kibanobal ri awinaq.

²⁰Toq ri Aarón xk'achoj yan chi ch'ajch'ojirisaxik ri jay akuchi k'o-wi ri káxa, ri wachoch richin molojri'il y ri porobel, jari' toq niberuk'ama-pe ri jun chik achij tzuntzun ri k'es.

²¹Y k'ari' ri Aarón nuya' chi e ka'i' ruq'a' pa ruwi' ri rujolon ri tzuntzun ri' y nuq'alajirisaj-el ronojel ri kimak ri e rijatzul ri Israel; ri mak ri e nojin y ri man e nojin ta. Y ronojel re mak re' yeqaqa-el pa ruwi' ri tzuntzun. Y nicha'ox k'a jun wineq richin chi ja rija' ri xtuk'uan-el k'a pa tz'iran ruwach'ulew.

²²Chiri' k'a xtiberisq'opej kan y ja ri tzuntzun k'a ri xtuk'uan-el ronojel ri kimak ri winaqi' k'a pa taq tz'iran ruwach'ulew ri akuchi man jun chik wineq k'o.

²³K'ari' ri Aarón nitzolin chik apo ri pa wachoch, y chiri' nrelesaj-wi kan ri rutziaq ri banon rik'in lino, ri xukusaj richin xok chupan ri akuchi k'o-wi ri káxa y chiri' nuyek-wi kan.

²⁴K'ari' natin ri akuchi kan cha'on-wi ri chiri' pa wachoch; y nukusaj-pe ri rutziaq richin ri jun chik rusamaj. Y xeri' nel-pe richin nusuj ri kamelabel ri niporox chijun, ri nusuj rija' chuwe yin. Y rija' nusuj chuqa' ri kamelabel ri xkik'en-pe ri winaqi' chuwe yin, ri niporox chijun. Kere' k'a xtuben chi nink'en chik kiwech rija' y ri winaqi'.

²⁵Y ri Aarón xtuk'uaj-apo ri kiq'anal ri chikopi' ri xerukamisaj richin kamelabel richin kuyubel-mak, y xtuporoj pa ruwi' ri porobel.

²⁶Y ri wineq ri xuk'uan-el ri achij tzuntzun, richin chi xberisq'opej kan pa tz'iran ruwach'ulew, k'o chi natin, nuch'ej rutziaq y k'ari' nok-apo ri akuchi ek'o-wi-qa ri winaqi'.

²⁷Y ri ti'ij, ri kitz'umal y ri kipan ri wákix y ri tzuntzun, ri xukusex ri kikik'el richin ri kuyubel-mak, k'o chi nuk'uex k'a chirij-el ri akuchi ek'o-wi-qa ri winaqi' y chiri' niporox-wi richin xukusex akuchi k'o-wi ri káxa, richin chi nink'en chik kiwech.

²⁸Y ri wineq ri xtiporon, k'o chi natin, nuch'ej rutziaq y k'ari' nok-apo ri akuchi ek'o-wi-qa ri winaqi'.

²⁹Jak'a ruchojmilal re' ri xinya' chiwe richin jantape' niben y xtiben chupan ri q'ij lajuj chire ri ik' wuqu'. Chupan ri q'ij ri' man k'a yixsamej ta, nichajij-iwi' y man k'a yixwa' ta, roma ri q'ij ri' kan janila rejqalen, keri' niben rix y keri' chuqa' ri man e iwinaq ta ri ek'o chi'ikojol.

³⁰Ri q'ij ri', q'ij richin kuyubel-mak y jari' toq nink'en chik iwech, roma kan xkixch'ajch'ojir chire ri imak.

³¹Ri q'ij ri', kan janila rejqalen, y kan jun uxlanibel-q'ij, kan nichajij k'a iwi' y man yixwa' ta. Re' kan jun ruchojmilal richin q'asen, ri k'o chi niben rix.

³²Y k'o chi jantape' k'o jun nimalej sacerdote. Jak'a wi niken-el, k'o chi nok kan jun ruk'ajol pa ruk'exel. Niq'ej k'a aceite richin cha'onri'il pa ruwi', richin chi nok kan nimalej sacerdote pa ruk'exel ri rutata'. Ja chik k'a rija' ri xtukusan ri tzieq banon rik'in lino, ri kan ch'aron richin ri nusamaj y xtusuj ri kamelabel richin nink'en chik ruwech.

³³Y xtuch'ajch'ojirisaj k'a ri jay akuchi k'o-wi ri káxa y chijun ri wachoch richin molojri'il y ri porobel, richin utz chik xkentz'et. Y chuqa' ja rija' ri xtibanon ri kamelabel richin nink'en chik kiwech ri ch'aqa' chik sacerdote y chijun ri tinamit.

³⁴Jare' k'a ri ninya' chiwe rix re wakami y nok k'a jun ruchojmilal richin q'asen. Kan xtisuj k'a jun kamelabel jun bey pa jun juna' roma ri imak, richin nink'en chik iwech, xcha' ri Jehová chire ri Moisés. Y ri Moisés kan xuben k'a achi'el ri xubij ri Jehová chire.