Read Kaqchikel Lev 17 Bible Online

Lev 17 - Kaqchikel bible

Lev 17

¹Ri Jehová xch'on rik'in ri Moisés y xubij chire chi

²tubij chire ri Aarón, ri e ruk'ajol y chuqa' chike ri ruwinaq:

³Wi ta jun chiwe rix nrajo' nusuj jun wákix, jun karne'l o jun tzuntzun, jak'a wi nukamisaj ta chirij-el o chupan ri akuchi ixk'o-wi-qa, y man nukamisaj ta chuchi' ri wachoch achi'el ri nubin yin, ri wineq ri xtibanon keri' kan xtrejqalej k'a ri kik' roma xuben richin xbiyin kik'; y roma ri' kan xtelesex k'a el chupan ri tinamit.

⁵Richin keri' ri israelita kan xtikik'uaj k'a ri chikop ri nikisuj y xtikijech chire ri sacerdote richin nikamisex chuchi' ri wachoch y man nikamisex ta xabakuchi ri nikajo-wi rije'. Keri' nikamisex ri chikop richin nuq'alajirisaj chi nijunamatej-iwech wik'in.

⁶Ri sacerdote nuchikaj k'a ri kik' chi kaji' ruwech ri porobel y pa taq ruxikin, y chuqa' nuporoj ri q'en richin nijubulin chinuwech yin.

⁷Y man jun bey chik tisuj kamelabel chikiwech itzel taq espíritu ri iya'on kiq'ij ri xa koma rije' xixtzaq. Re' kan jun k'a pixa' chiwe rix tibe-q'ij tibe-seq.

⁸Chuqa' tabij chi xabachike chike ri iwinaq o ri man e iwinaq ta ri ek'o chi'ikojol, wi k'o jun nrajo' nusuj chuwe jun kamelabel ri niporox chijun o xabachike kamelabel,

⁹y man nuk'uaj ta chuchi' ri wachoch richin chiri' nukamisaj-wi, ri xtibanon keri' kan xtelesex k'a el chi'ikojol.

¹⁰Yin Jehová kan man utz ta nintz'et chi jun wineq nutej kik', stape' iwinaq o man iwinaq ta. Ri xtitijo kik', kan xtinwelesaj k'a el chi'ikojol rix.

¹¹Ri kik' jari' ri ruk'exewach ri kik'aslen konojel ri e k'es. Roma ri' nubin chiwe chi ri kik' richin ri kamelabel, k'o chi niya'ox pa ruwi' ri porobel richin nijunamatej-iwech wik'in. Ri kik' ri', ruk'exewach ri ik'aslen, richin nuben chi nijunamatej-iwech wik'in.

¹²Y roma ri' nubin chiwe rix israelita chi man jun chiwe titijo kik', y keri' chuqa' ri man e iwinaq ta ri ek'o chi'ikojol.

¹³Xabachike k'a chike ri iwinaq, o ri man e iwinaq ta ri k'o chi'ikojol, wi ta nukamisaj jun chikop o jun aj-xik' chikop richin tijel, xtrelesaj k'a kan ri rukik'el y xtumuq kan rik'in ulew.

¹⁴Roma ri k'aslen ja ri kik', roma ri' nubin chiwe chi man nitej ti'ij ri xa k'a ruk'uan na kik'. Achike k'a ri xtitijo ri kik', kan xtelesex k'a chi'ikojol.

¹⁵Keri' chuqa' ri iwinaq o man iwinaq ta, wi k'o xtitijo ri ruch'akul jun chikop ri xken ruyon o xwech' koma ch'aqa' chik chikopi', ri wineq ri' k'o chi natin y nuch'ej rutziaq, y kan xtok man ch'ajch'oj ta chi jun q'ij k'a toq nok-pe ri aq'a'.

¹⁶Y wi man natin ta y man nuch'ej ta ri rutziaq kan xtrejqalej k'a ri mak, xcha' ri Jehová.