Read Kaqchikel Lev 18 Bible Online

Lev 18 - Kaqchikel bible

Lev 18

¹Ri Jehová xch'on chik rik'in ri Moisés y xubij chi

²tubij chike ri winaqi': Ja yin Jehová ri i-Dios.

³Man k'a titzeqelibej ri kibanobal ri aj-Egipto ri akuchi xixk'oje-wi. Man k'a tiben achi'el ri nikiben ri aj-Canaán, ri ruwach'ulew ri akuchi yixink'uaj-wi. Y man k'a tiben achi'el ri kibanobal rije'.

⁴Jak'a ri pixa' richin chojmirisabel ri ninbij chiwe yin, jari' k'a ri titaqej, y kan tibana' k'a achi'el ri nubij ri pixa' ri nuya'on chiwe. Ja yin Jehová ri i-Dios ri yibin.

⁵Roma ri' kan tiyaka' pan iwánima ri pixa' ri nuya'on chiwe rix ri ix nutinamit. Roma achike k'a ri xtitaqen, kan xtik'ase'. Ja yin Jehová ri yibin.

⁶Man jun k'a chiwe rix tichapo-qa jun ri xa rach'alal richin nik'oje' rik'in. Yin Jehová ri yibin.

⁷Man jun tik'oje-qa rik'in ri rute', richin man nuqasaj ruq'ij ri rutata'. ¡Man xaxe ta ri', roma re' kan rute-wi!

⁸Chuqa' man jun tik'oje' rik'in ri rixjayil ri rutata', richin man nuqasaj ruq'ij ri rutata'.

⁹Man jun tik'oje' rik'in ri yijrana', stape' alaxineq pa rachoch o juk'an chik alaxineq-wi.

¹⁰Man jun tik'oje' rik'in ri rumam richin nuqasaj ruq'ij, roma re' kan jun ruk'ixbilal roma xa kan junan kikik'el.

¹¹Chuqa' man jun tik'oje' rik'in ri yijrana', roma re' xa kan junan kikik'el.

¹²Man jun k'a tik'oje' rik'in ri ruch'utite', ri rach'alal ri rutata'; y chuqa' rik'in ruch'utite', ri rach'alal ri rute', roma rije' xa kan kach'alal-ki' y kan junan kikik'el.

¹⁴Man jun tik'oje' rik'in ri rixjayil ri ruch'utitata', roma rija' kan ruch'utite' chuqa'.

¹⁵Man jun tik'oje' rik'in ri rali', roma rija' rixjayil ri ruk'ajol.

¹⁶Man jun achin tik'oje-qa rik'in ri rixnan, roma rija' rixjayil ri rach'alal.

¹⁷Wi k'o ta jun achin ri nik'oje-qa rik'in jun ixoq, kan man utz ta k'a chi nik'oje' chik qa rik'in ri ral ri ixoq ri' y chuqa' rik'in ri riy, roma xa kan junan kikik'el. Re' kan jun itzel banobel chinuwech yin.

¹⁸Rokik k'a k'es na ri rixjayil, man tik'ule' rik'in ri rixnan, ri ruchaq' o runimal ri rixjayil y chuqa' man tik'oje' rik'in roma rik'in juba' ye'ok kik'ulel-ki' pa jay.

¹⁹Man jun achin tik'oje-qa rik'in jun ixoq rokik k'o ri yabil richin chi ik' chire.

²⁰Chuqa' man jun tik'oje' rik'in ri rixjajil jun chik achin, roma ri keri' xa kan man ch'ajch'oj ta chinuwech yin.

²¹Man tisuj k'a jun chike ri iwalk'ual richin jun sipanik ri niporox chire ri dios rubini'an Moloc, richin man niyoq'otej ri nubi', yin ri in i-Dios. Yin Jehová ri yibiyin.

²²Chuqa' man jun achin tik'oje' rik'in jun chik achin achi'el xa ta nik'oje' rik'in jun ixoq, roma re' kan man utz ta nintz'et yin.

²³Man jun achin tik'oje' rik'in jun chikop achi'el xa ta nik'oje' rik'in jun ixoq roma re' xa kan man ch'ajch'oj ta chinuwech. Y ni ta chuqa' jun ixoq man tuya' q'ij chire jun chikop richin nik'oje' rik'in. Roma re' kan jun itzelej banobel.

²⁴Man k'a ke'iben itzel taq banobel achi'el nikiben ri winaqi' aj-Canaán, roma rije' xa kan man e ch'ajch'oj ta chik chinuwech. Y roma ri' xkenwelesaj-el chupan ri kiruwach'ulew, y xtinjech ri ruwach'ulew pan iq'a' rix.

²⁵Roma k'a ri itzel taq banobel ri xekiben, kan xok man ch'ajch'oj ta ri kiruwach'ulew, y yin kan xinya' k'a ri rutojbalil-mak pa kiwi'; y roma ri' xinben chire ri ruwach'ulew richin xek'is ri winaqi' chuwech.

²⁶Jak'a rix y ri man e iwinaq ta ri ek'o chi'ikojol, kan tibana' k'a achi'el nubij ri pixa' ri nuya'on chiwe y ri pixa' richin chojmirisabel, y man k'a tiben ri itzel taq banobel ri xkiben rije'.

²⁷Ri winaqi' ri ek'o chuwech ri ruwach'ulew ri xtinbenya' chiwe, kan yenwixowaj k'a, roma rik'in ronojel ri itzel taq kibanobal ri ruwach'ulew kan xok man ch'ajch'oj ta.

²⁸Man ke'iben itzel taq banobel richin man yixk'is-el chuwech ri ruwach'ulew, achi'el xekibanala' ri winaqi', ri ek'o nabey chiwech rix.

²⁹Xabachike k'a wineq ri xtibanon jun chike ri itzel taq banobel re', kan xtelesex k'a el chi'ikojol rix.

³⁰Roma ri' kan tibana' k'a achi'el ri nubij ri pixa' ri nuya'on chiwe, y man tiben ri itzel taq banobel, roma yin kan ninwixowaj ri xekibanala' ri winaqi' ri ek'o nabey chiwech rix. Roma ri' kan man k'a tiben rix ri keri', richin keri' kan jantape' ix ch'ajch'oj chinuwech. Ja yin Jehová ri i-Dios ri yibin chiwe, xcha'.