Read Kaqchikel Lev 2 Bible Online

Lev 2 - Kaqchikel bible

Lev 2

¹Y chuqa' xubij ri Jehová: Toq k'o jun wineq nusuj chuwe jun sipanik ri banon rik'in jalajoj ruwech ixin, k'o chi nuk'en-pe ri k'ej chayun y xolon rik'in aceite, y xtuya' pom pa ruwi'.

²K'ari' xtuk'uaj kik'in ri e sacerdote, ri e rijatzul ri Aarón. Y jun chike rije' xtuchop jun moq' chire ri k'ej chayun rik'in aceite y ronojel ri pom. Ri ti juba' ri niporox pa ruwi' ri porobel, jari' ri retal richin ronojel. Y re' jun sipanik poron richin nijubulin chinuwech yin Jehová.

³Y ri nik'oje' kan chire ri sipanik ri man xporox ta, xtok kichin ri e sacerdote. Y re' kan jun sipanik ch'aron roma xelesex-el juba' chire richin xporox chinuwech yin.

⁴Toq nasuj jun sipanik richin jalajoj ruwech ixin ri chaq'arisan pan horno, k'o chi naben rik'in k'ej chayun y man naya' ta ch'amilej-q'or rik'in. Ri rubanik ri jun, ponon y naxol aceite rik'in, y ri jun chik tz'ajin y yuquyik rubanik y su'un aceite chuwech.

⁵Wi nasuj jun sipanik richin jalajoj ruwech ixin ri chaq'arisan pa xot, k'o chi naben rik'in k'ej chayun y naxol aceite rik'in, y man naya' ta ch'amilej-q'or rik'in;

⁶y k'ari' naq'ututej y nachikaj aceite pa ruwi', y kan jare' k'a ri sipanik.

⁷Wi ri sipanik richin jalajoj ruwech ixin chaq'arisan pa jun lik'ilik bojo'y, k'o chi banon rik'in ri k'ej chayun rik'in aceite.

⁸Y xtak'en k'a pe chinuwech re sipanik re' y xtak'uaj-apo chuwech ri sacerdote, y ja rija' ri xtuk'uan-apo chuchi' ri porobel.

⁹Y ri sacerdote xtuchop jun moq' chire ri sipanik, y re' xtuporoj pa ruwi' ri porobel richin jun sipanik poron. Ri ti juba' ri niporox pa ruwi' ri porobel, jari' ri retal richin ronojel. Y re' kan nijubulin chinuwech yin.

¹⁰Y ri xtik'oje' kan chire ri sipanik ri man xporox ta, xtok kichin ri e sacerdote, y re' kan jun sipanik ch'aron roma xelesex-el juba' chire richin xporox chinuwech yin.

¹¹Ronojel ri sipanik ri nisuj chuwe yin banon rik'in ri jalajoj ruwech ixin richin niporox man jun ch'amilej-q'or k'o ta rik'in, ni ta ri kab ri nikiya' taq chikopi'.

¹²Jak'a toq nisuj ri nabey ruwech tiko'n, utz chuqa' nisuj ri ch'amilej-q'or y ri kab ri nikiya' ri taq chikopi', xaxe man niporox ta richin nijubulin chinuwech yin.

¹³Y ri jalajoj ruwech ixin ri nasuj, naya' atz'an rik'in, y man jun bey xtasuj wi maneq atz'an rik'in, roma ri atz'an jun retal richin jun jikibel-tzij chiqakojol; y ronojel k'a re sipanik re' kan k'o atz'an rik'in.

¹⁴Toq nawajo' nasuj ri nabey taq ruwech ri atiko'n chuwe yin, k'o chi nawotz'otz'ij pa q'aq' ri trigo y naq'ututej ri ruwech ri nel kan; jari' ri nasuj chuwe yin Jehová.

¹⁵Y pa ruwi' natix ri aceite y chuqa' naya' ri pom, y re' kan jare' jun sipanik richin ri jalajoj kiwech ixin.

¹⁶K'ari' ri sacerdote xtuporoj k'a juba' chire re sipanik re' richin jun retal ri k'o chik aceite pa ruwi', y chuqa' xtuporoj ronojel ri pom; y re' jare' ri sipanik poron chinuwech yin, xcha' ri Jehová.