Read Kaqchikel Lev 22 Bible Online

Lev 22 - Kaqchikel bible

Lev 22

¹Ri Jehová xch'on chik rik'in ri Moisés y xubij chire:

²Tabij chire ri Aarón y chike ri e ruk'ajol: Kan tiya' rejqalen ri sipanik ri nikisuj ri iwinaq, richin keri' man niyoq' ta ri nubi'; yin Jehová ri yibin.

³Chuqa' tabij chike rije': Xabachike chike ri iwijatzul ri ek'o wakami y ri xkepe chiwech-apo, wi xtijel-apo rik'in ri sipanik ri sujun chuwe yin Jehová, koma ri iwinaq, y ri sacerdote ri' xa man ch'ajch'oj ta, kan xtelesex k'a el chinuwech yin; yin Jehová ri yibin.

⁴Jun sacerdote nok man ch'ajch'oj ta wi k'o ta yabil ri nutaluj-ri' chirij, o ri nel ta ri achi'el ya' chupan ri rukowil, o xtuchop jun ch'akulaj kamineq, o jun wineq ri man ch'ajch'oj ta, o jun chikop ri man ch'ajch'oj ta. Roma ri' man nutej ta ri sipanik ri e jachon chuwe k'a toq xtich'ajch'ojir na.

⁶Ri sacerdote ri xtichapo jun chike ronojel re', kan xtok man ch'ajch'oj ta. K'o chi natin richin utz nutej ri sipanik ri', ri e jachon chuwe. K'a toq niqaq'ij-qa, k'ari' xtich'ajch'ojir, y k'ari' utz nutej ri sipanik ri e jachon chuwe, roma nuya'on q'ij chire richin chi jari' nutej.

⁸Man nitej ri ti'ij richin jun chikop ri xken ruyon o ri xkamisex roma jun k'uxunel chikop, roma rik'in re' xa kan niben chi kan man ix ch'ajch'oj ta. Yin Jehová ri yibin.

⁹Kan tiyaka' k'a pan iwánima ri pixa' ri nuya'on chiwe, richin keri' man yixqaqa ta pa mak, y richin man yixken ta roma niben chi man jun rejqalen ri pixa' ri'; yin Jehová ri in ch'arayon iwichin.

¹⁰Xaxe ri aj pan iwachoch xketijo ri sipanik ri e jachon chuwe yin, y man tikitej ri man aj pan iwachoch ta, achi'el ri jun ta q'ejelonel richin ri sacerdote, o jun aj-ik'.

¹¹Jak'a wi k'o ta jun sacerdote nuloq' ta jun rusamajel, ri samajel ri' kan utz nutej ri sipanik ri', chuqa' ri rusamajel ri alaxineq pa rachoch utz nutej.

¹²Wi k'o ta jun imi'al ri k'ulan rik'in jun ri man sacerdote ta, man niya' q'ij richin nutej ri sipanik ri'.

¹³Jak'a wi k'o jun chike ri imi'al ri nitzolin pan iwachoch roma xmalkanej kan o roma rujachon-ri' rik'in rachijil, y man xk'oje' ta ral, y xa nuben achi'el toq k'a xten na, chire rija' ninya' q'ij richin nutej ri sipanik ri'. Jak'a ri man aj pan iwachoch ta man tikitej.

¹⁴Wi k'o ta jun wineq ri man ya'on ta q'ij chire richin nutej ri sipanik ri', y man retaman ta chi xa ch'aron chiwe rix, y toq nunabej, k'o chi nuya' ruk'exel chiwe rix, y pa ruwi' ri', nuya' jun chire ri ro' chire ri rajel.

¹⁵Rix ri ix sacerdote man tiya' k'a q'ij chi ri iwinaq nikiben chi maneq rejqalen ri sipanik ri', ri nikisuj chuwe.

¹⁶Keri' man tiya' q'ij richin rije' nikitej ri sipanik, richin man nikejqalej ri tojbalil mak, roma kan ja yin Jehová ri in ch'arayon ri sipanik ri', xcha'.

¹⁷Ri Jehová xch'on chik jun bey rik'in ri Moisés y xubij chire:

¹⁸Kere' tabij chire ri Aarón y chike ri ralk'ual y chuqa' chike ri iwinaq israelita: Jare' ri ruchojmilal ri xtiben wi niwajo' ta nisuj jun chikop chinuwech roma xalex-pe pan iwánima, o roma ri ibin chi niben, richin niporoj chinuwech yin. Re chojmilal re' kan xtiban iwik'in rix y kik'in ri man iwinaq ta ri ek'o chi'ikojol.

¹⁹Richin nink'ul chiwech ri isipanik, k'o chi nisuj jun chike ri achij wákix, jun achij karne'l, o jun achij tzuntzun ri kan e tz'aqet.

²⁰Jak'a man tisuj jun chikop chuwe ri man tz'aqet ta, roma wi keri' man xtink'ul ta chiwech.

²¹Keri' chuqa' wi nisuj jun kamelabel richin jun sipanik richin niq'alajirisaj chi nijunamatej-iwech wik'in, roma ri ibin chi niben, o roma xalex-pe pan iwánima, k'o chi nisuj jun wákix o jun karne'l o jun tzuntzun ri kan e tz'aqet richin kan xtink'ul chiwech.

²²Man tisuj chinuwech jun chikop moy, jetz' raqen, maneq jun ruq'a', nipujan rij, k'o ri yabil sarna chirij, o k'o sal chirij. Ronojel re' kan man tisuj richin niporoj chinuwech yin.

²³Wi nalex-pe pan iwánima jun sipanik, ninya' k'a q'ij chiwe richin nisuj jun chikop xotoxik. Jak'a wi niwajo' nisuj jun sipanik roma ibin chi niben, kan man ninya' ta k'a q'ij richin nisuj ri chikop ri', roma man xtink'ul ta chiwech.

²⁴Chuqa' man tisuj chinuwech yin jun chikop ri xa man tz'aqet ta ri rukowil. Re' kan man tisuj stape' pa taq itinamit.

²⁵Man tik'ul ri chikop ri' chuwi-kiq'a' ri man e iwinaq ta richin nisuj chinuwech yin. Wi xtisuj, man xtink'ul ta chiwech roma man tz'aqet ta, xcha'.

²⁶Ri Jehová xch'on chik rik'in ri Moisés y xubij chire:

²⁷Toq nalex jun ti iwákix, jun ti ikarne'l, o jun ti itzuntzun, k'o chi nik'oje' rik'in ri rute' wuqu' q'ij richin nitz'uman. Jak'a toq nuchop-el ruwaqxaq q'ij kan utz chik richin niporoj chinuwech.

²⁸Ri chikop ri k'o ralaj, man nikamisaj ta pa jun q'ij junan rik'in ri alaj.

²⁹Y toq nisuj jun sipanik richin matioxinik chinuwech yin, kan tibana' k'a pa ruchojmilal richin kan xtink'ul chiwech.

³⁰Chuqa' kan titija' ronojel ri ti'ij chupan ri q'ij ri', y man tiyek kan richin ri jun chik q'ij. Yin Jehová ri yibin.

³¹Kan tiyaka' k'a pan iwánima ri pixa' richin jantape' ri nuya'on chiwe, y kan titaqej. Yin Jehová ri yibin.

³²Man tiben chi niyoq'otej ri nubi' yin, richin keri' kan xtinimirisex k'a nuq'ij yin iwoma rix, ja yin Jehová ri in ch'arayon iwichin.

³³Yin xinelesan-pe iwichin chupan ri ruwach'ulew Egipto richin chi xinok i-Dios. Yin Jehová ri yibin, xcha'.