Read Kaqchikel Lev 24 Bible Online

Lev 24 - Kaqchikel bible

Lev 24

¹Ri Jehová xch'on chik rik'in ri Moisés y xubij chire:

²Tabij chike ri awinaq israelita chi tikik'ama-pe aceite ri banon rik'in jebelej olivo, richin chi jantape' k'o aceite richin yek'at ri taq candil ronojel aq'a'.

³Ri Aarón y ri nimalej sacerdote ri xtik'oje' kan pa ruk'exel, ja rije' ri xkechojmirisan ri candil richin chijun aq'a' yek'at chinuwech yin chupan ri wachoch ri juk'an-pe chire ri tasbel rupan ri jay. Re' kan jun pixa' ri nuya'on chiwe rix richin q'asen y chike ri iwijatzul.

⁴Kan nikichojmirisaj k'a ri taq candil ri ek'o pa ruwi' ruq'a' ri candelabro ri banon rik'in q'anapueq richin chi yek'at chinuwech yin.

⁵Rik'in k'ej chayun niben kablajuj nima'q kaxlan-wey y nichaq'arisaj k'a, y chikijujunal ri kaxlan-wey niya' más juba' kaji' libra k'ej rik'in.

⁶Y kan xtiya' k'a pa ruwi' ri mesa banon rik'in q'anapueq, y tibana' ka'i' tunaj chire, waqi' kaxlan-wey ke'iya' pa jujun tunaj.

⁷Y niya' ri jubulej pom pa ruwi' ri ka'i' tunaj kaxlan-wey. Y k'ari' ri pom ri' xtiporoj chinuwech yin, richin chi nuk'ut chi ri kaxlan-wey kan wichin yin.

⁸Y chupan ri q'ij richin uxlanibel kan xke'iyala' k'a meq'en kaxlan-wey pa ruwi' ri mesa chinuwech yin; re' kan xtiben pan ibi' rix israelita richin q'asen.

⁹Re kaxlan-wey re' xtok kichin ri Aarón y ri rijatzul roma re' kan jun sipanik poron ri ch'aron chuwe. Y k'o chi nitej ri akuchi cha'on-wi. Y re' kan jun ruchojmilal chiwe rix tibe-q'ij tibe-seq.

¹⁰Chupan k'a ri q'ij ri' k'o jun achin, ruk'ajol jun aj-Egipto, y ral jun aj-Israel rubini'an Selomit, rumi'al ri Dibrí rijatzul ri Dan. Y k'o k'a jun q'ij ri achin ri' xech'ayon-ki' rik'in jun israelita ri chiri' ri akuchi ri ek'o-wi-qa. Y ri ral ri Selomit xuyoq' rubi' ri Jehová, y roma ri' xkik'uaj-el chuwech ri Moisés.

¹²Y xekiya' k'a chajinela' rik'in, k'a toq xq'alajirisex na chire ri Jehová.

¹³Y ri Jehová xch'on k'a pe rik'in ri Moisés y xubij chire:

¹⁴Tiwelesaj-el ri chiri' ri akuchi ixk'o-wi-qa ri xyoq'on ri nubi', y konojel k'a ri xe'ak'axan ri xubij k'o chi nikiya' ri kiq'a' pa rujolon ri achin ri xch'ayon, y ri awinaq ri ek'o chiri' xtikik'eq chi abej.

¹⁵Y chuqa' chike ri awinaq kere' k'a xtabij: Xabachike k'a xtiyoq'on ri nubi', kan xtrejqalej k'a ri itzel rubanobal, y kan xtikamisex k'a chi abej koma konojel winaqi'. Keri' xtiban chire xabachike wineq ri xtuyoq' ri nubi', y re' xtiban kik'in ri iwinaq y ri man iwinaq ta.

¹⁷Keri' chuqa' wi k'o ta jun wineq ri xtikamisan jun chik wineq, chuqa' rija' kan xtikamisex.

¹⁸Wi k'o ta jun wineq xtukamisaj jun chikop, kan k'o chi xtuya' ruk'exel.

¹⁹Wi k'o ta jun wineq nuben jun sokotajik chire jun chik wineq; achi'el ri xuben kan, keri' chuqa' xtiban chire rija'.

²⁰Wi xtuq'ej jun wineq, kan keri' chuqa' xtiban chire rija'; y chuqa' wi xtusok runaq'-ruwech, o wi xtel jun rey, o xabachike sokotajik; achi'el ri xuben kan, keri' chuqa' xtiban chire rija'.

²¹Achike xtikamisan jun chikop xtuya' ruk'exel; jak'a wi xtukamisaj jun wineq kan xtikamisex chuqa' rija'.

²²Re pixa' re' nuya'on chiwe rix israelita y ri man iwinaq ta ri ek'o chi'ikojol, roma ja yin Jehová ri i-Dios ri yibin. Keri' tabij chike ri awinaq, xcha'.

²³Y ri Moisés xubij k'a ronojel re' chike ri ruwinaq. Keri' xkelesaj k'a el ri xyoq'on rubi' ri Jehová, y xkikamisaj chi abej chirij-el ri akuchi ek'o-wi-qa, achi'el xubij ri Dios chire ri Moisés.