Read Kaqchikel Lev 3 Bible Online

Lev 3 - Kaqchikel bible

Lev 3

¹Y chuqa' xubij ri Jehová: Wi ta ri sipanik kan richin ta nijunamatej ruwech ri wineq wik'in, y wi nuk'en ta pe jun chike ri wákix, ixoq o achij, k'o chi kan tz'aqet richin nusuj chinuwech yin Jehová.

²Ri rajaw xtuya' ri ruq'a' pa ruwi' ri chikop y xtukamisaj chuchi' ri wachoch richin molojri'il, y ri e sacerdote ri e rijatzul ri Aarón xtikichikaj ri kik' chi kaji' ruwech ri porobel y pa taq ruxikin.

³Ri rajaw ri chikop xtusuj ri rusipanik richin nijunamatej-ruwech wik'in; k'o chi nusuj ri ruq'anal ri k'o chirij ri rixkolob y chuqa' ri k'o chirij ri rupan.

⁴Y xtusuj chuqa' ronojel ri q'en ri k'o chikij ri e ka'i' rukinaq', ri k'o chirij ri tzan-racheq, y chuqa' ri q'en ri k'o chirij ri rusase'.

⁵K'ari' ri e sacerdote ri e rijatzul ri Aarón xtikiporoj ronojel re' pa ruwi' ri porobel richin jun sipanik poron; y re' kan nijubulin chinuwech yin.

⁶Wi ta ri rusipanik ri nuk'en-pe jun ta chike ri karne'l o tzuntzun, ixoq o achij, k'o chi kan tz'aqet.

⁷Wi nusuj jun karne'l k'o chi jun rujuna' toq xtusuj chinuwech yin.

⁸Ri rajaw xtuya' ri ruq'a' pa ruwi' ri chikop, y k'ari' xtukamisaj chuchi' ri wachoch. K'ari' ri sacerdote nikichikaj ri kik' chi kaji' ruwech ri porobel y pa taq ruxikin.

⁹Ri rajaw ri chikop richin ri sipanik richin nijunamatej-ruwech wik'in, k'o chi nusuj chinuwech jun sipanik ri niporox: Nusuj ri chijun ri ruq'anal, chijun ri rujey ri qupin-pe chunaqaj ri che'el-rij, ri q'en ri k'o chirij ri rixkolob y chuqa' ri k'o chirij ri rupan,

¹⁰ri ka'i' rukinaq' y ri ruq'anal ri k'o chirij, ri q'en ri k'o chirij ri tzan-racheq, y ri rusase'.

¹¹Y ri sacerdote xtuporoj ronojel re' pa ruwi' ri porobel; ri sipanik ri xtisuj chinuwech yin achi'el jun q'utun.

¹²Wi nusuj jun tzuntzun, kan xtusuj k'a chinuwech yin.

¹³Ri rajaw xtuya' ri ruq'a' pa ruwi' ri chikop, y k'ari' xtukamisaj chuchi' ri wachoch. K'ari' ri e sacerdote nikichikaj ri kik' chi kaji' ruwech ri porobel y pa taq ruxikin.

¹⁴K'ari' xtusuj ri rusipanik ri niporox chinuwech yin: ri q'en ri k'o chirij ri rupan y ri k'o chirij ri rixkolob,

¹⁵y ri e ka'i' rukinaq' y ri ruq'anal ri k'o chirij, y ri q'en ri k'o chirij ri tzan-racheq, y ri rusase'.

¹⁶Y ri sacerdote xtuporoj ronojel re' pa ruwi' ri porobel, y re' kan nijubulin chinuwech: Ri sipanik ri' xtisuj chinuwech yin achi'el jun q'utun. Ronojel q'en kan wichin yin.

¹⁷Man titej k'a ri q'en ni ta ri kik'. Re' jun ruchojmilal richin jantape'; y chuqa' kichin ri iwijatzul, y xabakuchi ta k'a ixk'o-wi, xcha' ri Jehová.