Read Kaqchikel Lev 9 Bible Online

Lev 9 - Kaqchikel bible

Lev 9

¹Toq q'axineq chik ri wuqu' q'ij, chupan ri ruwaqxaq q'ij ri Moisés xroyoj ri Aarón y chuqa' xeroyoj ri e ruk'ajol y ri achi'a' ri k'o kiq'ij ri chiri' pan Israel.

²Y rija' xubij k'a chire ri Aarón: Tik'ama-pe jun nima-alaj achij wákix, richin kamelabel richin kuyubel-mak y chuqa' tik'ama-pe jun achij karne'l richin niporoj. Y re ka'i' chikopi' re' kan k'o chi e tz'aqet richin yesuj chire ri Jehová.

³Y k'ari' tabij k'a chike ri qawinaq israelita chi tikik'ama-pe jun achij tzuntzun richin kuyubel imak, jun nima-alaj achij wákix y jun nima-alaj karne'l ri k'o jun kijuna', re' k'o chi e tz'aqet richin yeporox.

⁴Tikik'ama-pe jun achij wákix y jun achij karne'l richin kamelabel richin nikiq'alajirisaj chi nijunamatej-kiwech rik'in ri Dios richin nisuj chire, y chuqa' tikik'ama-pe jun sipanik richin k'ej ri banon rik'in jalajoj ruwech ixin ri ya'on aceite rik'in. Re' kan xtikiben roma ri Jehová kan xtuk'ut ri' chikiwech wakami, xcha' ri Moisés chire ri Aarón.

⁵Y ri winaqi' xkik'uaj k'a apo ronojel ri xubij ri Moisés chi k'o chi nikik'uaj-apo chuwech ri rachoch ri Dios, y ri winaqi' richin ri tinamit xkimol-apo-ki' chiri' chuwech ri Jehová.

⁶K'ari' ri Moisés xubij: Jare' k'a ri rubin-pe ri Jehová ri k'o chi niben, richin keri' yixtikir nitz'et ri nimalej rusaqil rija', xcha'.

⁷K'ari' ri Moisés xubij chire ri Aarón: Kajel-apo chunaqaj la porobel y tasuju' k'a ri chikop richin kamelabel richin nikuyutej ri amak, y tasuju' chuqa' ri kamelabel ri niporox jumul. Y tasuju' k'a ri kamelabel ri niporox ronojel koma ri winaqi' y tasuju' ri kamelabel richin nikuyutej ri kimak rije'. Keri' xtaben chi ri Jehová utz xkarutz'et rat y utz xkerutz'et ri winaqi', kan achi'el ri rubin ri Jehová chuwe, xcha'.

⁸Y keri' ri Aarón xjel-apo rik'in ri porobel y xuqupij k'a ri ruqul ri nima-alaj achij wákix richin jun kamelabel richin nikuyutej rumak rija'.

⁹Y ri e ruk'ajol xkiq'axaj-apo ri kik' chire ri Aarón y rija' xuya' ri ruwi-ruq'a' chupan ri kik' y ri kik' ri' xuyala' chikij ri rutza'n ri porobel ri achi'el uk'a' kibanik, y ri ch'aqa' chik kik' xukaq'uj chuxe' ri porobel.

¹⁰Y pa ruwi' ri porobel, rija' xuporoj ronojel ri q'en, ri ka'i' rukinaq' y ri q'en ri k'o chirij ri sase' ri elesan-pe chire ri wákix, kan achi'el ri rubin ri Jehová chire ri Moisés chi tubana' ri Aarón.

¹¹Y jak'a ri ti'ij y ri rutz'umal xebeporox k'a chirij-el ri akuchi ek'o-wi-qa.

¹²Xeri' rija' xuqupij chuqa' ruqul ri chikop ri kamelabel ri niporox, y ri e ruk'ajol rija' xkiq'axaj-apo ri kik' chire y rija' xuchikaj ri kik' chi kaji' ruwech ri porobel y pa taq ruxikin.

¹³Y rije' xkiq'axaj-apo chuwech ri Aarón ri kamelabel ri niporox ronojel; xkiq'axaj-apo ri rujolon y ri ruch'akul ri chikop chi peraj chi peraj. Y ri Aarón xuporoj ronojel ri' pa ruwi' ri porobel.

¹⁴Y chuqa' ri Aarón kan k'a xeruch'ej na k'a ri ixkolob y ri e ka'i' ra' ri chikop ri', k'ari' xeruya' pa ruwi' ri kamelabel ri niporox ronojel, richin xeruporoj.

¹⁵Y chirij k'a re', ri Aarón xberuk'ama-pe ri achij tzuntzun richin ri kamelabel richin nikuyutej rumak ri tinamit. Xuqupij k'a ri ruqul y k'ari' xusuj ri kamelabel ri', kan achi'el xuben rik'in ri nabey chikop.

¹⁶Y ri Aarón xberuyuqej-pe ri jun chik chikop richin ri kamelabel richin nuporoj y xusuj k'a, kan achi'el ri pixa' ri ruya'on chire.

¹⁷Y rija' xuk'uaj chuqa' apo ri sipanik richin k'ej ri banon rik'in jalajoj ruwech ixin: Xuchop jun moq' chire ri sipanik y xuchikikej pa ruwi' ri porobel richin xuk'et. Re sipanik re' xuya' pa ruwi' ri chikop ri kamelabel ri niporox ri nimaq'a' richin chi chiri' xk'at-wi.

¹⁸Y ri Aarón xuqupij k'a ruqul ri wákix y ruqul ri achij karne'l richin ri kamelabel richin nuq'alajirisaj chi nijunamatej-ruwech ri tinamit rik'in ri Dios. Y ri e ruk'ajol xkiq'axaj-apo ri kik' chire, y rija' xuchikaj ri kik' chi kaji' ruwech ri porobel y pa taq ruxikin,

¹⁹y chuqa' xkiq'axaj-apo ri ruq'anal ri wákix y ri richin ri karne'l richin niporox: ri q'en ri k'o chirij ri kixkolob, ri kikinaq', ri q'en ri k'o chirij ri kisase' y ri q'en ri k'o chirij ri kijey.

²⁰Y jari' ri yebe chuwech ri peraj ruwa taq kik'u'x ri chikopi' y keri' ri Aarón niberuya' kan ri q'en pa ruwi' ri porobel richin nuporoj.

²¹Y ri Aarón xeruli'ej k'a ri peraj ruwa taq kik'u'x ri chikopi' y ri ka' ri chikopi' ri k'o pa kijkiq'a' y k'ari' xuyakala-q'anej chuwech ri Jehová richin chi nusuj chire, y chirij re' ri ti'ij nok kan kichin ri sacerdote. Kan xuben k'a achi'el ri rubin ri Moisés.

²²Y toq rusujun chik k'a kan ri kamelabel richin kuyubel-mak, ri kamelabel ri niporox ronojel y ri jun chik sipanik richin nuq'alajirisaj chi junan kiwech rik'in ri Dios, jari' toq ri Aarón xutzeqej k'a ri ruq'a' pa kiwi' ri winaqi' y xerurtisaj. K'ari' xqaqa-pe chiri' ri akuchi k'o-wi ri porobel.

²³K'ari' ri Moisés y ri Aarón xe'ok-apo chupan ri rachoch ri Dios richin molojri'il y toq rije' xe'el-pe, xekurtisaj chik ri winaqi' y jari' toq ri ruk'ojlemal ri Jehová xuk'ut-ri' chikiwech konojel ri winaqi'.

²⁴Y toq xoq'alajin-qa ri ruk'ojlemal ri Jehová kan xorepero' jun q'aq' y xuk'is ri kamelabel ri k'a nik'at na; kan xuk'is k'a ri kiq'anal ri chikopi' ri k'o pa ruwi' ri porobel. Y jari' toq konojel ri winaqi' xkitz'et ri xbanatej, xkireq kichi' roma kikoten y xkiqasaj-ki' k'a pan ulew.