Read Kaqchikel Jer 1 Bible Online

Jer 1 - Kaqchikel bible

Jer 1

¹Yin Jeremías in ruk'ajol ri Hilquías jun chike ri sacerdote ri ek'o chiri' chupan ri tinamit Anatot, ri k'o chupan ri ruwach'ulew Benjamín.

²Ri Dios xch'on wik'in toq niq'aton-tzij ri Josías, ruk'ajol ri Amón, chiri' pa Judá, chupan ri juna' oxlajuj chire ri ruq'atbal-tzij rija'.

³Chuqa' xch'on wik'in pa ruq'ijul ri Joaquim, ri ruk'ajol ri Josías, chupan ri ik' wo'o' chire ri julajuj juna' chire ri q'atbel-tzij richin ri Sedequías, ri chuqa' ruk'ajol ri Josías, toq ri aj-Jerusalem xe'uk'uex-el pa ximonri'il.

⁴Y toq ri Jehová xch'on wik'in, kere' xubij chuwe:

⁵Toq k'a man jani katintz'uk rik'in ri ate'; yin kan wetaman chik awech. Kan k'a man jani k'a katalex, toq yin at nucha'on chik. Xatincha' richin naq'alajirisaj ri nuch'abel chikikojol konojel tzobaj winaqi' richin re ruwach'ulew, xcha'.

⁶Jak'a yin xinbij chire chi man yitikir ta yich'on, roma xa k'a janila in k'ajol.

⁷Y rija' xubij chuwe: Man tabij chi k'a janila at k'ajol. Rat kan xkabe k'a kik'in ri winaqi' akuchi xkatinteq-wi-el yin y kan xtabebij chike ri achike ri xtinbij-el chawe.

⁸Man taxibij-awi' chikiwech ri winaqi' ri', roma yin kan xkik'oje' awik'in richin xkatinchajij, ja yin Jehová ri yibin y ninya' nutzij chawe, xcha'.

⁹Jari' toq ri Jehová xuya-apo ri ruq'a' y xuchop ri nuchi' y xubij chuwe:

¹⁰Wakami yin ninya' ri nuch'abel pan achi'. Chupan re q'ij re' ninben chawe chi rat yach'on kik'in ri q'atbel taq tzij y ri tzobaj taq winaqi', richin yenwelesaj-el y yenwulaj, richin yek'is y yenke'ej; richin yenpaba-q'anej y yentik-qa, xcha' chuwe.

¹¹K'ari' ri Jehová xch'on chik wik'in y xubij chuwe: ¿Achike ri natz'et rat Jeremías? Y yin xinbij chire chi nintz'et jun ruq'a' almendro.

¹²Y rija' xubij k'a chuwe: Ja' kan keri' wi, roma yin kan ninchajij-wi'*f1* richin ninben ri ninbij.

¹³Ri Jehová xch'on chik k'a pe wik'in y xubij chuwe: ¿Achike k'a la yatajin chutz'etik re wakami?, xcha'. Y yin xinbij: Yin nintz'et jun bojo'y ri jebel niroqo y kan nipulin yan el keri' pa xaman.

¹⁴K'ari' ri Jehová xubij chuwe: Pa xaman k'a xtipe-wi ri ruk'ayewal ri xtiqaqa pa kiwi' konojel ri winaqi' ri ek'o chuwech re ruwach'ulew re'.

¹⁵Roma yin yenwoyoj konojel ri tzobaj winaqi' ri ek'o pa xaman. Xkepe ri e ki-rey y xtikiq'et-tzij chiri' chuchi' ri tinamit Jerusalem, chikiwech-apo ri tz'aq ri nikisutij-rij ri tinamit y chuwech-apo ronojel ri tinamit richin ri Judá.

¹⁶Xtinya' rutojbalil-mak pa kiwi' ri awinaq aj-Judá roma ronojel ri mak ri xkiben chinuwech yin. Xinkimalij kan, richin xkiporoj pom y xexuke' chikiwech ri ch'aqa' chik dios ri xa ja rije' e banayon.

¹⁷Wakami k'a tachojmirisaj-el awi' y kabiyin y tabebij chike ronojel ri xinbij chawe. Kan kow k'a kapa'e' y man taxibij-awi', roma wi man kow ta xkapa'e' y xtaxibij-awi', xtinben chawe chi xkatzaq chikiwech rije'.

¹⁸Roma wakami, yin ninben k'a chawe achi'el jun tinamit ri sutin-rij chi tz'aq, achi'el jun xata't ri banon rik'in q'eqapueq o jun tz'aq ri banon rik'in q'enq'oj-pueq, richin chi napaba-awi' chikiwech ri e rey richin Judá, chikiwech ri e tata'al, ri e sacerdote y konojel ri tinamit richin re ruwach'ulew.

¹⁹Rije' xtikiben labal awik'in rat, jak'a man xketikir ta xkatkich'ek, roma yin xkik'oje' awik'in richin yatinto'. Ja yin Jehová ri yibin.