Read Kaqchikel Jer 10 Bible Online

Jer 10 - Kaqchikel bible

Jer 10

¹Rix nuwinaq israelita kan tiwak'axaj k'a ri nubij ri Jehová,

²kere' nubij: Man titzeqelibej kibey ri ch'aqa' chik tzobaj winaqi'. Chuqa' man tixibij-iwi' chuwech ri retal ri yepe chila' chikaj, achi'el nikiben rije'.

³Ri bey ri kik'uan re winaqi' re' man jun nik'atzin-wi, roma rije' xa nikichoy jun che' pa k'echelaj. Y k'ari' nibekiya' kan chire jun ajanel richin nuben jun wachibel chire.

⁴K'ari' nikiwiq rik'in saqipueq y q'anapueq y richin chi man nisilon ta nikiya' clavo chupan.

⁵Rije' e achi'el poy pa jun qejoj ri tikon pepino chuwech. Rije' man yech'on ta; k'o chi ye'uk'uex na, roma man yetikir ta yebiyin. Roma ri' man tixibij-iwi' chikiwech, roma rije' man jun achoq chire nikiben-wi, utz ni itzel, xcha' ri Jehová.

⁶K'ari' xinbij chire ri Dios: Kan man jun chik achi'el rat Jehová. Rat kan janila utzilej atzijol ri k'o. Kan janila nim ri aq'ij y k'o ronojel uchuq'a' pan aq'a'.

⁷Kan konojel k'o chi nik'oje' akiy chikiwech roma rat ri at rey pa kiwi' konojel tzobaj winaqi'. Roma ri' xaxe rat ruk'amon chi nik'oje' akiy. Y chikikojol konojel aj-na'oj richin chijun ruwach'ulew, kan man jun chik achi'el rat.

⁸Konojel rije' xa maneq kina'oj y xa maneq kinojibal, roma xa xketamaj kik'in ri wachibel ri e banon rik'in che'.

⁹Ri saqipueq ri ya'on chikij ri wachibel ri nikiya' kiq'ij xa k'amon-pe pa ruwach'ulew Tarsis. Chuqa' ri q'anapueq xa k'amon-pe chiri' pa ruwach'ulew Ufaz. Y ri kitziaq xa banon rik'in tzieq raxroj, y keq. Ronojel re' xa e banon koma ri kan jebel yetikir yekiben re samaj re'.

¹⁰Jak'a rat Jehová kan at qitzij Dios. Ja rat ri at k'aslik Dios, rey richin q'asen. Toq nipe awoyowal, ri ruwach'ulew kan nisilon y ri tzobaj taq winaqi' man yetikir ta nikikoch' ri awoyowal.

¹¹Ja rat xabin chuwe chi ninbij chike ri nuwinaq chi ri wachibel ri' man ja ta rije' xebanon ri kaj, ni ri ruwach'ulew. Y rije' kan xkek'is k'a el chuwech re ruwach'ulew y man jun k'a chike rije' xtik'oje' kan.

¹²Rat Jehová rik'in ri nimalej awuchuq'a' y ri ana'oj xaben ri ruwach'ulew y rik'in nojibel xajikiba' ri kaj.

¹³Naben chi nel-el ri sutz' chuwech re ruwach'ulew. Y toq najin job, naben chi nich'ich'an-pe ri koyopa' y chuqa' ja rat ri yabanon chi niq'ajan-pe ri koqolajay. Y ja rat ri yabanon richin nipe ri kaq'iq'.

¹⁴Konojel ri yebanon kichin ri wachibel ri' xa man yenojin ta roma maneq ketamabal y kan xkek'ixbitej k'a, roma ri wachibel xa man e qitzij dios ta y maneq kik'aslen.

¹⁵Kan man jun k'a kejqalen y toq xtapon k'a ri q'ij richin ri aq'atbel-tzij, k'ari' k'a xke'ak'is.

¹⁶Ja rat ri xabanon ronojel ri k'o chuwech re ruwach'ulew. Y ja rat ri at qa-Dios, ri oj rijatzul kan ri Jacob. Ja rat xacha'on qichin richin xojok atinamit. Y ri abi' rat Jehová k'iytisanel richin ronojel, xicha' chire ri Dios.

¹⁷K'ari' xinbij chike ri nuwinaq: Tik'olo-el ronojel ri kan iwichin rix roma sutin chik iwij.

¹⁸Roma ri Jehová nubij chi wakami yixruk'eq-el chupan re qaruwach'ulew, achi'el toq ri ikeq' nuk'eq jun abej. Rija' kan xkixruya' pa tijoj-poqonal y pa ruk'isibel kan xkixchapatej, xicha' chike.

¹⁹K'ari' rije' xkibij: Toq'ex qawech roma re qak'uluwachin, roma ri qasokotajik kan man nik'achoj ta chik. Kan qabin richin niqakoch', jak'a re wakami xa man niqakoch' ta.

²⁰Ri akuchi ojk'o-wi-qa xa xk'is yan; ri kolo' ri e chapayon richin ri qachoch xa xeraq'ach'itej. Ri qalk'ual xek'is-el y wakami e maneq chik. Man jun chik achike xtipaban-q'anej ri qachoch.

²¹Ri aj-raqen ri ek'o pa qawi' kan maneq na'oj kik'in y man nikikanoj ta ri Jehová. Roma ri' xebe pa xulan y qonojel roj xa xqataluj-el-qi'.

²²Kan peteneq k'a jun rutzijol kere' pa xaman chi peteneq jun nimalej ruk'ayewal, richin chi nuben chire ronojel tinamit richin Judá chi man jun chik nik'oje' kan chuwech y nuben chi chiri' xkebek'ase-wi ri utiwa', xecha' rije'.

²³K'ari' yin xich'on rik'in ri Jehová y xinbij: Rat awetaman chi roj man ja ta roj oj rajaw ri qak'aslen y qayon roj man yojtikir ta niqachojmirisaj ri qak'aslen.

²⁴Toq yojmakun, tabana' utzil qojach'olij pa ruchojmilal, jak'a man rik'in ta awoyowal, roma wi keri', xa xqojak'is.

²⁵Jak'a tawelesaj k'a awoyowal chikij ri tzobaj winaqi' ri man ketaman ta awech y pa kiwi' chuqa' ri winaqi' ri man nikinataj ta ri abi', roma rije' xojkik'is roj ri oj awinaq. Rije' kan xojkik'is k'a jumul y kan xojkiya' kan pa k'ayew, xicha' chire ri Dios.