Read Kaqchikel Jer 11 Bible Online

Jer 11 - Kaqchikel bible

Jer 11

¹Ri Jehová xch'on chik jun bey wik'in yin Jeremías y xubij chuwe:

²Tawak'axaj ri ch'abel ri nubij ri nujikibel-tzij y kach'on kik'in ri achi'a' aj-Judá y kik'in ri aj-Jerusalem.

³Rat tabij chike ri awinaq chi yin Jehová ri in i-Dios richin Israel kere' ninbij: Itzel ruwa-ruq'ij ri wineq ri man nunimaj ta ri ch'abel ri k'o chupan ri nujikibel-tzij.

⁴Re jikibel-tzij re' xinya' chike ri iwati't-imama' toq xenwelesaj-pe pa ruwach'ulew Egipto, akuchi rije' xkitej janila poqon, toq xek'oje' achi'el pa jun horno akuchi niya'erisex-wi ri q'eqapueq. Chupan ri q'ij ri' xinbij chike chi tikak'axaj ri nuch'abel y tikibana' ronojel re'. Y wi keri' nikiben, rije' xke'ok nutinamit y yin xkinok ki-Dios, xicha' chike.

⁵Y re wakami wi rix ninimaj nutzij, yin kan xtintaqej ri ya'on-tzij ri xinben kik'in ri iwati't-imama' ojer kan, toq xinsuj chike rije' ri ruwach'ulew ri akuchi nuya' ronojel tiko'n, ri akuchi ixk'o-wi rix wakami, xcha' ri Dios chuwe. Y yin xinbij chire ri Jehová chi kan keri' xtibanatej.

⁶Chuqa' ri Jehová xubij chuwe chi tinwelesaj rutzijol re ch'abel re' pa taq tinamit richin Judá y pa taq bey richin Jerusalem. Y jare' ri rutzijol: Tiwak'axaj re ch'abel ri k'o chupan re jikibel-tzij re' y kan tibana' k'a achi'el ri nubij.

⁷Roma chupan ri q'ij toq xinben chike ri iwati't-imama' chi xe'el-pe pa ruwach'ulew Egipto, xinbij chi rije' k'o chi nikiben ri nubij ri nuch'abel. Y kan k'a ja na re' ninbij re wakami.

⁸Jak'a rije' xa man xkak'axaj ta y man xkiya' ta kixikin chire ri nuch'abel. Xa kan ja ri rurayibel ri kánima ri xuk'uan kichin y roma ri' xinben chi xpe ri ruk'ayewal pa kiwi', achi'el ri nubij chupan ri jikibel-tzij, xcha' ri Dios.

⁹Chirij re' ri Jehová xubij chuwe chi ri winaqi' richin ri tinamit Jerusalem y ri ruwach'ulew Judá xkiya' chikiwech richin yeyakatej chuwij.

¹⁰Kan nikiben k'a chuqa' rije' achi'el ri mak ri xkiben ri qati't-qamama', ri kan man xkajo' ta k'a xkinimaj rutzij y xa xekitzeqelibej k'a ch'aqa' chik dios. Konojel k'a winaqi' israelita y ri aj-Judá kan xkixolq'otij ri rujikibel-tzij ri xuben rija' kik'in ri qati't-qamama'.

¹¹Roma ri' rija' nubij: Wakami kan xtinbenya' k'a jun ruk'ayewal pan iwi' y man jun xtitikir xtukol ta ri' chuwech ri ruk'ayewal ri'. Stape' xtiraqaqej-ichi' richin nik'utuj to'onik, man xkixinwak'axaj ta.

¹²K'ari' rix aj-Jerusalem y aj-Judá, xke'iwoyoj ri i-dios ri nisuj pom chikiwech, jak'a rije' xa man xketikir ta xkixkito' toq xtapon ri ruk'ayewal ri'.

¹³Kan e janila k'a i-dios ek'o, kan achi'el ri rajlabal ri itinamit. Y kan e janila k'a porobel-pom ri xe'ipabala-q'anej richin chi niporoj pom chire ri Baal, achi'el ri rajlabal ri bey ri ek'o chiri' pa Jerusalem.

¹⁴Roma ri', rat Jeremías, man kach'on-pe wik'in pa kik'exel re awinaq. Man kakamela'an-pe chinuwech koma rije' toq xtikik'utuj-pe to'onik chuwe toq ek'o chupan re ruk'ayewal, roma yin kan man xkenwak'axaj ta, xcha' chuwe.

¹⁵Chuqa' xubij chi kere' tinbij chike ri nuwinaq: Rix ri ix wichin yin y ri kan janila yixinwajo', kan man jun iq'a' richin ixk'o wawe' pa wachoch roma xa janila etzelal ibanalon. Ri sipanik ri ye'isuj man yixruto' ta chupan ri rutojbalil.

¹⁶Yin kan nubanon chiwe chi yixbe pa jotol, achi'el jun che' olivo ri rex-rex rubanon y janila ruxaq y nojineq rik'in jebelej ruwech. Jak'a re wakami xkenteq-pe itzel taq winaqi' achi'el jun koqolajay richin xkixruk'et y xkixkik'is.

¹⁷Yin Jehová ri k'iytisanel richin ronojel, ninbij chi stape' yin ri xijikiban iwichin, xtoqaqa ruk'ayewal pan iwi', roma k'iy ruwech etzelal ibanon chi'iwonojel rix y kan iyakon woyowal roma nisuj pom chuwech ri Baal.

¹⁸Chirij k'a ronojel re', ri Jehová xuya' rutzijol chuwe chi ri e etzelanel wichin k'o ri itzel nikich'ob chuwij y chuqa' xubij chuwe ri achike nibekibana'.

¹⁹Yin kan man jun k'a ninmey, achi'el jun ti karne'l ri yuqen-el richin nibekamisex y kan man wetaman ta k'a chi k'o itzel nikich'ob chuwij. Y nikibij chi yichoy-el achi'el jun che' ri jebel ruwech, richin yinkelesaj-el chuwech re ruwach'ulew, richin chi man jun chik xtinatan wichin.

²⁰Jak'a yin xinbij chire ri Jehová k'iytisanel richin ronojel: Rat ri at to'onel y kan pa ruchojmilal ri naben. Rat awetaman ri nuch'ob ri wineq y chi xinjech yan wi' pan aq'a'. Roma ri' taya' k'a rutojbalil pa kiwi' richin yentz'et, xicha'.

²¹Roma ri' kere' xubij ri Jehová pa kiwi' ri aj-Anatot ri kan nikikanoj ri nukamik y nikibij chuwe: Man yach'on chik pa rubi' ri Jehová, richin chi man yatkikamisaj ta, xecha' chuwe.

²²Y ri Jehová k'iytisanel richin ronojel xubij: Xtinbenya' rutojbalil pa kiwi'. Ri achi'a' ri kan k'o kuchuq'a' xkeken chupan ri labal y ri kimi'al-kik'ajol xkeken roma wayjal.

²³Kan man jun k'a chike rije' xtik'ase' kan roma kan xtipe ri q'ij chi yin xtinchojmirisaj ronojel kik'in ri aj-Anatot y kan xtinya' k'a tijoj-poqonal pa kiwi', xcha' ri Dios chuwe.