Read Kaqchikel Jer 12 Bible Online

Jer 12 - Kaqchikel bible

Jer 12

¹Chirij re' xinbij chik chire ri Jehová: Toq yin yisujun chawech, rat beneq ruwech naben pa ruchojmilal. Jak'a yin wakami k'o ninwajo' ri nink'utuj chawe. ¿Achike roma jebel e beneq ri e banoy etzelal? ¿Achike roma man jun nikimey ri xaxe yekiq'ol ch'aqa' chik winaqi'?

²Ja rat xatikon kichin achi'el jun che' y rije' ruk'amon-qa jebel kixe'; xek'iy-q'anej y xkiya' kiwech jebel. Stape' rije' yech'on pan abi', ri kánima kan nej k'a k'o kan chawe rat.

³Jak'a yin, kan awetaman nuwech y chuqa' awetaman chi yin kan nukuquban nuk'u'x awik'in. Roma ri' ke'ak'uaj k'a re winaqi' re' achi'el toq ye'uk'uex-el ri taq karne'l richin yebekamisex. Kan ke'ach'ara' k'a kan richin yekamisex chupan ri q'ij richin ri aq'atbel-tzij.

⁴¿K'a janipe' k'a xtibanatej?, roma ri ruwach'ulew janila chaqi'j y ri ichaj ri ek'o pa taq juyu' xemayamo-qa. Roma ri itzel taq kibanobal ri winaqi' ri', ri chikopi' y ri aj-xik' taq chikopi' kan yekamiyaj k'a. Pa ruwi' ri', ri winaqi' ri' kan nikich'ob chi rat man ye'atz'et ta pe rik'in ri itzel taq kibanobal, xicha' chire rija'.

⁵Y ri Jehová xubij chuwe: Rat kan xakos yan chire re jun samaj re', stape' achi'el yatanin chirij jun chik wineq. ¿Achi'el toq xkatikir xkatanin chikij winaqi' ri e beneq chirij kiej? Chuqa' rat kan yatzaqilan chik chupan ri jun samaj ri man k'ayew ta, achi'el yabiyin chupan jun ruwach'ulew taq'aj. ¿Achike xtaben chiri' pa taq ruwach'ulew akuchi xaxe siwan k'o?

⁶Roma ri e awach'alal y ri e aj pan awachoch ja jun rije' xatkiq'ol. Ja jun rije' nikireq kichi' richin yech'on itzel chawij. Man takuquba' ak'u'x kik'in, stape' nikibij jebel taq ch'abel chawe, xcha' chuwe.

⁷Y ri Jehová xubij chik: Kan janila yenwajo' ri nuwinaq, jak'a wakami xtinmalij kan ri wachoch y chuqa' xkenmalij kan rije' y kan xkenjech kan pa kiq'a' ri e etzelanel kichin.

⁸Ri tinamit ri' ri kan wichin yin, nikireq kichi' chuwij yin, achi'el jun koj ri k'o pa k'echelaj y kan niq'ajan-pe. Roma ri' kan yenwetzelaj.

⁹Chuqa' rije' kan e achi'el jun kot, y xkepe k'a ch'aqa' chik aj-xik' chikopi' richin nikiben oyowal kik'in. Tikimolo-pe-ki' y kepe richin ye'okik'isa-el ri nuwinaq.

¹⁰E k'iy k'a chike ri e etzelanel wichin ri xkiwulaj kan ri ruwach'ulew, achi'el jun yuq'unel kan nuxeq' kan akuchi tikon-wi uva. Y ri ulew ri' kan janila jebel nutz'eton yin, jak'a kan xtikixolq'otij richin xtok kan tz'iran ruwach'ulew.

¹¹Kan xtikitoloba' k'a kan y kan xtikiben kan tz'iran ruwach'ulew chire y k'ari' man jun chik xtiniman chire.

¹²Xkepe k'a ri itzel taq achi'a' pa ruwi' chijun ri juyu' richin ri tz'iran ruwach'ulew ri', roma rije' e achi'el jun nu-espada ri xtik'ison ri jun ruchi' k'a ri jun chik ruchi' ri ruwach'ulew y kan man jun chik nuwinaq ri xtikolotej kan.

¹³Rije' xtikitik-qa trigo y xa ruyon k'ix ri xtel-pe. Ronojel ri kisamaj xa man jun xuq'ajuj-wi. Kan xek'ixbitej roma ri kitiko'n roma yin kan yakatajineq woyowal chikij.

¹⁴Jak'a yin Jehová chuqa' xtinya' rutojbalil-mak pa kiwi' ri ch'aqa' chik winaqi' ri ek'o chunaqaj ri ruwach'ulew Israel, ri xek'ison kichin. Yin kan xkenwelesaj k'a el chupan ri kiruwach'ulew y chuqa' kan xkenwelesaj k'a pe ri nuwinaq chikikojol rije'.

¹⁵Jak'a toq xenwelesaj yan el ri ch'aqa' chik winaqi' ri', jari' toq xtinjoyowaj kiwech y xtinben chike richin xketzolin pa taq kitinamit richin ri kiruwach'ulew.

¹⁶Jak'a rije' ri xek'utu chikiwech ri nuwinaq richin nikiya' kitzij chuwech ri Baal. Jak'a re wakami rije' k'o chi niketamaj kik'in ri nuwinaq richin nikiya' nuq'ij yin y nikiya' kitzij pa nubi' yin. Wi nikiben kere', kan xkejike' chikikojol ri nuwinaq.

¹⁷Jak'a wi man xtikinimaj ta nutzij, kan xkenwelesaj-el y xkenk'is-el jumul, xcha' ri Jehová.