Read Kaqchikel Jer 15 Bible Online

Jer 15 - Kaqchikel bible

Jer 15

¹Ri Jehová xubij chuwe: Stape' kan ja ta ri ánima Moisés y ri ánima Samuel xkepe wawe' richin nokik'utuj utzil chuwe richin chi xtinjoyowaj ta kiwech re winaqi' re', yin kan man xkento' ta. Tabij chike ri awinaq chi ke'el-el chinuwech yin y kan kebiyin nej.

²Y wi nikik'utuj akuchi yebe-wi, tabij chike: Ri kan k'o chi yeken roma ri nima-yabil, kan xkeken roma ri', ri k'o chi xkeken pa labal, kan xkeken roma ri', ri k'o chi xkeken roma wayjal, kan xkeken roma ri' y ri k'o chi xke'uk'uex-el pa ximonri'il, kan xkebe pa ximonri'il.

³Yin Jehová ri yibin. Yin xtinteq kaji' ruwech ruk'ayewal pa kiwi': Xkekamisex pa labal o chuqa' xkekiwech' tz'i' o ja ri aj-xik' taq chikopi' ri xketijo ri kich'akul o ri chikopi' k'uxunela' xkek'ison kichin.

⁴Xtinben chi konojel tzobaj winaqi' richin ri ruwach'ulew xtikik'en rukiy rik'in ri xtinbenbana' kik'in, roma ri rumak ri xuben ri rey Manasés, ri ruk'ajol ri Ezequías chiri' pa Jerusalem.

⁵¿Achike kami xtijoyowan iwech rix aj-Jerusalem? ¿Achike xtipoqonan iwech? ¿Achike kami xtik'utun achike ibanon?

⁶Rix xinimalij kan y kan ja ri ruche'el-iwij ri xiya' kan chinuwech y roma ri' yin xtinyek ri nuq'a' pan iwi' y xkixink'is. Xikos yan janila richin chaq ninjoyowaj iwech. Yin Jehová ri yibin.

⁷Xkixintaluj k'a el achi'el nutaluj ri' ri páxa y xkixink'uaj-el chupan ri ch'aqa' chik ruwach'ulew. Kan iwonojel xkixk'is roma kan man xiwajo' ta xiya' kan ri itzel k'aslen.

⁸Xtinben k'a chi xkemalkanej kan janila chi ixoqi', kan más e k'iy chuwech ri sanayi' ri k'o chuchi' ri palou. Kan ja ri pa nik'aj-q'ij xtinteq k'a pe ri kamik pa kiwi' ri alk'ualaxela'. Chuqa' chaq k'ate' k'a xtinya-pe bis y nimalej xibinri'il pa kiwi'.

⁹Y ri teja' ri e k'iy kal kan xtimayamo-qa ri kánima y kan man jun xtik'oje' kan richin nukuquba' kik'u'x. Xkek'ixbitej y xtiqasex kiq'ij. Xkeken toq man jani kiq'ij, achi'el ta ri saqil richin pa nik'aj-q'ij ri xa q'equ'm nuben-qa. Wi k'o ta jun ri nik'ase' kan, kan ninben chire chi nikamisex roma ri etzelanel richin, ja yin Jehová ri yibin.

¹⁰Yin xinbij k'a qa: Toq'ex nuwech yin, roma ri nte' xiralaj chuwech re ruwach'ulew, xaxe richin konojel winaqi' nikiben oyowal wik'in. Man jun k'a achoq chire nuqajon-wi méro, ni man ya'on ta méro pa qajik chuwe yin. Man rik'in ri' konojel nikirayij chi niqaqa ta itzel pa nuwi'.

¹¹Jehová, xtibanatej ta k'a ri itzel oyonik ri nikibij, wi yin man at nusamajin ta achi'el ruk'amon, wi yin man nuk'utun ta utzil chawe pa kiwi' ri e etzelanel wichin toq rije' xek'oje' chupan ri ruk'ayewal y ri tijoj-poqonal, xicha'.

¹²Ri Jehová xubij k'a: Tabij chike ri awinaq ¿Achike kami nitikir nipaxin ri q'eqapueq ri xolon rik'in q'enq'oj-pueq? Keri' chuqa' rix man yixtikir ta chikij ri e peteneq pa xaman.

¹³Y ri ibeyomel xtinjech chaq keri' chike, roma ronojel ri imak ri ibanalon pa taq iruwach'ulew.

¹⁴Y rix xkixok loq'on samajela' kichin ri e etzelanel iwichin, chupan jun ruwach'ulew ri man iwetaman ta, roma kan yakatajineq woyowal achi'el q'aq' y kan xkixruk'is, xcha' chuwe.

¹⁵K'ari' yin xich'on chik rik'in ri Jehová y xinbij: Rat kan awetaman ronojel. ¡Tabana' utzil kinato'. Taya' k'a tijoj-poqonal pa kiwi' ri e etzelanel wichin! Man k'a taben kik'in rije' chi kan janila ye'akoch'; y man taya' q'ij chi yin yiken. Tatz'eta' chi kan awoma rat ninq'axaj janila q'axo'n.

¹⁶Toq yach'on-pe wik'in, ri ach'abel kan ninben wichin chire. Ri ach'abel jebel nuben chuwe y jari' ri nibanon chire ri wánima richin nikikot, roma yin kan in awichin rat Jehová, Dios k'iytisanel richin ronojel.

¹⁷Yin kan man nuk'uan ta k'a wi' kik'in ri winaqi' ri chaq jantape' yenimaq'ijun. Kan ja toq rat xaya' re jun ruk'ayewal re' pa nuwi', kan nuyon ink'o.

¹⁸¿Achike roma ri nuq'axo'n man jun bey nik'is? Roma ri nuq'axo'n achi'el jun sokotajik ri man nik'achoj ta el y man jun aq'om ri nik'achojirisan. ¿Naben kami utzil yinato'? o xaben wik'in achi'el jun alaxibel-ya' ri xa maneq chik ya' nuya-pe o xa achi'el jun ti raqen-ya' ri xa man ninkuquba' ta chik nuk'u'x rik'in, xicha' chire.

¹⁹K'ari' ri Jehová xubij chik chuwe: Wi yatzolin-pe wik'in, xkatink'ul chik jun bey y xkatikir chik xkinasamajij. Man chaq ch'owen man ch'owen taben y ri xtabij xaxe ri ch'abel ri kan k'o rejqalen, wi keri' xtaben ja rat ri xkach'on pa nuk'exel. Ja rije' ri k'o chi yetzolin-pe awik'in y man ja ta rat ri k'o chi yatzolin kik'in.

²⁰Wi keri' xtaben, yin kan xtinben chawe chi rat xkatok kow achi'el jun tz'aq ri banon rik'in q'enq'oj-pueq. Y re winaqi' re' xtikiben labal awik'in, jak'a man xkatkich'ek ta, roma yin kan ink'o awik'in richin yatinkol y yatinwelesaj chuwech ronojel. Yin Jehová ri yibin.

²¹Kan xkatinkol pa kiq'a' ri banoy etzelal; kan xkatinkol pa kiq'a' ri kamisanela', xcha' ri Dios chuwe.